بۇعان دەيىن الەۋمەتتىك جەلىدە اقتاۋدا ادامداردىڭ جاپپاي ۋلانعانى تۋرالى اقپارات تاراعان ەدى. اۆتورلاردىڭ ايتۋىنشا, 50-دەن استام ادام ۋلانعان, ولاردىڭ كوپشىلىگى دارىگەرلەر.
اقتاۋ اكىمدىگىنىڭ ءباسپاسوز قىزمەتى اقپاراتتى راستادى. ءباسپاسوز قىزمەتىنىڭ مالىمەتىنشە, 10 ساۋىردە قالاداعى مەيرامحانالاردىڭ بىرىندە اۋىزاشار ءوتىپ, وعان اۋداندار مەن قالاداعى ەمدەۋ مەكەمەلەرىنىڭ دارىگەرلەرى شاقىرىلعان. مەرەكەلىك شاراعا بارلىعى 50 ادام قاتىسقان. ۋلانۋ بەلگىلەرىمەن 16 ادام كومەك سۇراعان. التى ادام ماڭعىستاۋ وبلىستىق كوپسالالى اۋرۋحاناسىنا ەمدەلۋگە جىبەرىلگەن.
«ناۋقاستاردا جوعارى قىزۋ, قۇسۋ, ءىش ءوتۋ, جەدەل ىشەك ينفەكتسياسىنا ءتان ينتوكسيكاتسيا سيندرومى انىقتالعان. بارلىق قاجەتتى شارالار قولدانىلىپ, ەم جۇرگىزىلىپ جاتىر. ەشقانداي قاۋىپ جوق, ناۋقاستاردىڭ جاعدايى تۇراقتى, تەمپەراتۋراسى بىرقالىپتى, ديناميكاسى وڭ. قازىر ناۋقاستار قاجەتتى ەم قابىلداپ جاتىر. شاعىممەن كەلگەن كەزدە قان قىسىمدارى تومەن بولعان, ينفۋزيوندى تەراپيادان كەيىن جاعدايلارى جاقساردى», دەيدى وبلىستىق كوپبەيىندى اۋرۋحاناسىنىڭ جۇقپالى اۋرۋلار ءبولىمىنىڭ مەڭگەرۋشىسى گۇلبانۋ نۇرجانوۆا.
