دەگەنمەن, كادرلىق تاپشىلىقتان ارىلۋدىڭ جولى دا, ءجونى دە تابىلىپ, ولقىلىقتىڭ ورنى تولا باستاعانى قۋانتادى. پرەزيدەنت جانىنداعى مەملەكەتتىك باسقارۋ اكادەمياسىنىڭ اباي وبلىسىنداعى فيليالىنىڭ اشىلۋى – سونىڭ ايقىن دالەلى. سەمەي پوليتەحنيكالىق كوللەدجىنىڭ عيماراتىندا ورنالاسقان اكادەميا فيليالىنىڭ اشىلۋىنا قاتىسقان اباي وبلىسى اكىمىنىڭ ورىنباسارى شالقار بايبەكوۆ بۇل باستامانىڭ كادر ماسەلەسىن شەشۋدەگى ماڭىزدى قادام ەكەندىگىن اتاپ ءوتتى.
– ويتكەنى وبلىستاعى كوپتەگەن مەملەكەتتىك قىزمەتشىلەر, نەگىزىنەن بۇل سالاعا ەندى عانا كەلگەن جاس ماماندار. اكادەميادا ولارعا ءبىلىمىن كەڭەيتىپ, داعدىلارىن دامىتۋ ءۇشىن ۇلكەن مۇمكىندىكتەر بار. مۇندا دەپارتامەنتتەر مەن باسقارمالاردىڭ ماماندارى دايىندالادى. قازىر مۇندا 68 مەملەكەتتىك قىزمەتكەر ءبىلىم الىپ جاتىر. ولاردىڭ بارلىعى قىزمەتتەگى ماماندار. بىردەن 17 ءتۇرلى ۆەدومستۆونىڭ قىزمەتكەرلەرىن تابۋ مۇمكىن ەمەس. سوندىقتان كادر ماسەلەسىن شەشۋگە جەتە ءمان بەرىپ وتىرمىز, – دەيدى شالقار بايبەكوۆ.
جالپى, جاڭا وبلىستىڭ دامۋىنا جاۋاپكەرشىلىكپەن قاراۋ مەملەكەتتىك قىزمەتتەگى ساپالى كادرلاردى شىڭداۋعا دا بايلانىستى ەكەنى تۇسىنىكتى. مەملەكەتتىك قىزمەت ىستەرى اگەنتتىگىنىڭ وبلىس بويىنشا دەپارتامەنتىنىڭ باسشىسى ادىلبەك مۇقاشەۆتىڭ ايتۋىنشا, وبلىستا 3,5 مىڭعا جۋىق مەملەكەتتىك قىزمەتكەر جۇمىس ىستەيدى. فيليالدىڭ اشىلۋى ولاردىڭ بىلىكتىلىگىن ارتتىرۋعا, قايتا دايارلىقتان وتۋىنە دە جول اشادى.
وبلىس قۇرىلعانعا دەيىن سەمەيلىك مەملەكەتتىك قىزمەتشىلەر ءبىلىم مەن بىلىگىن ارتتىرۋ ءۇشىن وسكەمەن قالاسىنا شاپقىلايتىن. ەندى ول كۇندەر ارتتا قالدى. بۇدان بىلاي اۋدان اكىمدىكتەرىندە, باسقارمالار مەن بولىمدەردە قىزمەت اتقارىپ جۇرگەن ماماندار وبلىس ورتالىعى مارتەبەسىن العان سەمەي قالاسىنا كەلىپ, مەملەكەتتىك باسقارۋ اكادەمياسىنىڭ فيليالىندا ءبىلىمىن جەتىلدىرە الادى.
اباي وبلىسى
