ول سوڭعى بىرنەشە جىلدا وتاندىق استىق نارىعى شەكارالاس ەلدەردەن بيدايدىڭ كونتراباندالىق يمپورتى سالدارىنان شىعىنعا ۇشىراعانىن حابارلادى. سالالىق قاۋىمداستىقتاردىڭ مالىمەتتەرى بويىنشا, «سۇر» يمپورت كولەمى جىلىنا 1,5-2 ملن تونناعا جەتەدى, ال مەملەكەتكە كەلتىرىلگەن جالپى شىعىن جىل سايىن 500 ملن دوللار مولشەرىندە باعالانادى.
بۇل رەتتە ىشكى نارىقتا باعانىڭ تومەندەۋى بايقالادى. ماسەلەن, 2022 جىلدىڭ شىلدە ايىنىڭ باسىنان باستاپ بيدايدىڭ قۇنى تونناسىنا 170-185 مىڭ تەڭگەدەن 80-85 مىڭ تەڭگەگە دەيىن تومەندەگەن.
پاۆلودار وبلىسى, سونداي-اق رەسەيمەن شەكارالاس اقتوبە جانە باتىس قازاقستان وبلىستارى زاڭسىز استىقتى قابىلداۋ جانە ترانزيت بويىنشا انتيليدەرلەر بولىپ سانالادى. اكەلىنگەن بيداي ققس تولەمەي شارۋا قوجالىقتارىنا جانە جاسىرىن كەرى ەكسپورت تۇرىندە رەسىمدەلىپ, ترانزيتتىك تاريف تولەمەستەن اۋعانستان مەن ورتالىق ازيا ەلدەرىنە جىبەرىلەدى.
وسى تۇستا ەربول تاسجۇرەكوۆ كونتراباندانىڭ بىرنەشە اشىق فاكتىلەرىن مىسالعا كەلتىردى.
«قارجى مونيتورينگى اگەنتتىگىنىڭ پاۆلودار وبلىسى بويىنشا دەپارتامەنتى وڭىردەگى جشس-ءنىڭ ءبىرى 2021-2022 جىلدار ارالىعىندا وزبەكستان, اۋعانستان جانە تاجىكستانعا 1 ملرد تەڭگەدەن استام سوماعا 8,3 مىڭ توننا كولەمىندە رەسەيلىك كونتراباندالىق استىقتى ەكسپورتتاعانىن انىقتادى. بۇل رەتتە جەڭىلدىكتى ەكسپورتتىق ءتاريفتى الۋ ءۇشىن قازاقستاندىق كومپانيا وتاندىق شارۋا قوجالىقتارىنىڭ جالعان شوت-فاكتۋرالارىن پايدالاندى, بۇل رەتتە ترانزيتتىك تاريفتەن جالتاردى جانە «قتج - جۇك تاسىمالى» جشس-نە 150 ملن تەڭگەگە جۋىق سومادا زالال كەلتىردى», دەدى ۆيتسە-مينيستر.
سپيكەردىڭ ايتۋىنشا, «سۇر يمپورتتىڭ» ءتۇسىمىن ازايتۋ ءۇشىن بيداي يمپورتىن, ەڭ الدىمەن ققس تولەمەي, اۆتوموبيل كولىگىمەن اكەلۋدى شەكتەۋ شارالارىن قابىلداۋ قاجەت بولدى, بۇل وتاندىق بيدايدىڭ قۇنىن تومەندەتەدى جانە وعان سۇرانىستى ازايتادى.
اتالعان شارالار استىق نارىعىنداعى جاعدايدى تۇراقتاندىرۋعا مۇمكىندىك بەرەدى. بۇل رەتتە, فەرمەرلەردى تۇقىم ماتەريالىمەن قامتاماسىز ەتۋ ءۇشىن تۇقىمداردى اۆتوكولىكپەن جەتكىزۋگە رۇقسات ەتىلەدى. بۇل جاعدايدا پارتيالار تۇقىم ساپاسى تۋرالى كۋالىكپەن بىرگە ءجۇرۋى كەرەك. سونداي-اق, بارلىق ءتيىستى سالىقتار مەن الىمداردى تولەي وتىرىپ, استىقتى تەمىرجول كولىگىمەن جەتكىزۋگە ەشقانداي شەكتەۋلەر بەلگىلەنگەن جوق.
ايتا كەتسەك, ەنگىزىلگەن تىيىم ۋاقىتشا سيپاتقا يە جانە ونى ىسكە اسىرۋ قورىتىندىسى بويىنشا ءتيىستى شارالار قابىلداناتىن بولادى.
