اتىراۋ وبلىستىق توتەنشە جاعدايلار دەپارتامەنتى قوعاممەن بايلانىس توبىنىڭ مالىمەتىنشە, قامىس ءورتى كەشە, 6 ساۋىردە ساعات 21:30-دا تولىق سوندىرىلگەن.
«قازاقستان عارىش ساپارى» كوسمومونيتورينگىنىڭ قورىتىندىسىنا سايكەس «اقجايىق» مەملەكەتتىك تابيعي رەزەرۆاتى اۋماعىنداعى ءورتتىڭ جالپى اۋدانى 1 200 گەكتاردى قۇراعان.
«كاسپي جاعالاۋىنداعى باتپاقتى, سۋلى جەردە 2 ساۋىردە قامىس ءورتى تۇتاندى. بۇل – اتىراۋ قالاسىنان 30 شاقىرىم قاشىقتاعى اۋماق. جالىننان فلورا مەن فاۋنا زارداپ شەككەن جوق. ويتكەنى قۇستاردىڭ ۇيا سالۋ كەزەڭى ءالى باستالماعان», دەپ حابارلادى دەپارتامەنتتىڭ قوعاممەن بايلانىس توبى.
قامىس ءورتىن سوندىرۋگە دەپارتامەنتتەن 42 قىزمەتكەر, 7 تەحنيكا, «اقجايىق» مەملەكەتتىك تابيعي رەزەرۆاتىنان 30 ادام, 9 تەحنيكا, 2 قايىق, 4 موتوپومپا جۇمىلدىرىلعان.
ال, «قازاۆياقۇتقارۋ» اق-نىڭ مي-8 تىكۇشاعىنان ستق-5 قۇرىلعىسىمەن 260-قا جۋىق توننا سۋ توگىلگەن.
ايتا كەتەيىك, بۇدان بۇرىن كاسپي جاعالاۋىندا جانعان قامىس ءتۇتىنى اتىراۋدى باسىپ قالعان ەدى.
