«بۇگىنگى شارامىزدىڭ نەگىزگى ماقساتى – ەل پرەزيدەنتىنىڭ وتكەن جىلعى قىركۇيەكتەگى جولداۋىندا بەرىلگەن تاپسىرمالاردىڭ ىسكە اسىرۋ بارىسى تۋرالى اقپاراتتى جانە VIII سايلانعان پارلامەنتتىڭ ءبىرىنشى سەسسياسىنىڭ اشىلۋىندا سويلەگەن سوزىندەگى قويىلعان تاپسىرمالاردى جۇزەگە اسىرۋ جونىندەگى جوسپارلاردى تىڭداۋ. سونىمەن قاتار عىلىمدى باسقارۋ جۇيەسىن جاڭعىرتۋ, عىلىمي الەۋەتتىڭ ساپاسىن ارتتىرۋ, عىلىمنىڭ ناتيجەسىن ەكونوميكاعا ەنگىزۋگە قاتىستى ماسەلەلەردى پىسىقتاۋ دا كۇن تارتىبىندە تۇر», دەدى نۇرتورە ءجۇسىپ.
سەناتورلار مەن عالىمدار عىلىمي مامانداردىڭ جەتىسپەيتىنى جانە جالاقىسىنىڭ تومەندىگى تۋرالى ماسەلەلەردى كوتەردى. سونداي-اق قازاقستاننىڭ جاھاندىق يننوۆاتسيالىق رەيتينگتە ارتتا قالۋى مەن ەلىمىزدەگى يننوۆاتسيالىق ءوندىرىس ۇلەسىنىڭ تومەندىگى دە اتاپ ءوتىلدى.
عىلىم جانە جوعارى ءبىلىم مينيسترلىگىنىڭ اقپاراتى بويىنشا مەملەكەت باسشىسىنىڭ تاپسىرماسىنا سايكەس عىلىمي جانە ساراپتامالىق قوعامداستىقتىڭ اتسالىسۋىمەن ۇلتتىق دەڭگەيدەگى قولدانبالى ماسەلەلەردى شەشۋگە عىلىمدى تارتۋ ءۇشىن عىلىمدى دامىتۋدىڭ 2025-2026 جىلدارعا ارنالعان باعدارلامالىق قۇجاتتارى ازىرلەنگەن ەكەن. بۇل قۇجاتتار سالانىڭ كادرلىق الەۋەتىن نىعايتۋعا, عىلىمي قىزمەتكەرلەر سانىن 1,5 ەسە ارتتىرۋعا, عىلىمي ەكوجۇيەنىڭ باسەكەگە قابىلەتتىلىگىن ارتتىرۋعا, سونداي-اق قازاقستان رەسپۋبليكاسىنىڭ دامۋ باسىمدىقتارىنا سايكەس سالالاردىڭ نەگىزگى عىلىمي-تەحنيكالىق مىندەتتەردى قالىپتاستىرۋ تەتىكتەرىن ەنگىزۋگە باعىتتالعان.
سەناتورلار وسى شاراعا دايىندىق اياسىندا بىرقاتار كوشپەلى كەزدەسۋ وتكىزدى جانە وندا بارلىق مۇددەلى تاراپتاردى تىڭداي وتىرىپ, جەرگىلىكتى جەرلەردەگى وزەكتى ماسەلەلەردى ەگجەي-تەگجەيلى زەردەلەدى. عىلىم قورىنداعى كەزدەسۋ بارىسىندا عىلىمي سالانىڭ دامىتۋعا زاڭ شىعارۋ ىسىندە قولداۋ كورسەتۋگە, ونى نىعايتۋعا ۇلەس قوسۋعا, ونىڭ ىشىندە سالالىق مينيسترلىكپەن جانە باسقا دا ۇيىمدارمەن ءوزارا ءىس-قيمىل جاساۋعا سەناتورلاردىڭ دايىن ەكەندىگى اتاپ ءوتىلدى.
قاتىسۋشىلار كەزدەسۋ ناتيجەسى بويىنشا وسى باعىتتاعى بىرلەسكەن جۇمىس جالعاساتىنىن اتاپ ءوتتى.
