ءمينيستردىڭ ايتۋىنشا, ەل ەكونوميكاسىن گازبەن قامتاماسىز ەتۋ ماقساتىندا گاز ءوندىرۋدى ىنتالاندىرۋ بويىنشا زاڭنامالىق وزگەرىستەر قابىلداندى. سونىمەن قاتار قاشاعان, قاراشىعاناق كەن ورىندارىندا گاز وڭدەۋ بويىنشا جاڭا زاۋىتتاردى ىسكە اسىرۋ جونىندە جۇمىستار جۇرگىزىلىپ جاتىر.
ناتيجەسىندە تاۋارلىق گاز ءوندىرىسى 2025 جىلى ايتارلىقتاي وسەدى دەپ كۇتىلەدى.
«بيىل ءى جارتىجىلدىقتىڭ سونىنا دەيىن ەنەرگيا تيىمدىلىگى مەن تاۋارلىق گازدى ۇتىمدى تۇتىنۋ جوسپارى ازىرلەنەدى. اتاۋلى الەۋمەتتىك كومەك الاتىن حالىقتى قوسپاعاندا, تۇرمىستىق تۇتىنۋشىلار ءۇشىن ۇقىپتى تۇتىنۋدى ىنتالاندىراتىن گازعا سارالانعان تاريفتەر تەتىگى ەنگىزىلەدى», دەدى مينيستر.
بولات اقشولاقوۆ اتاپ وتكەندەي, بيىل 1 شىلدەدەن باستاپ ەلەكتر ەنەرگياسىن بىرىڭعاي ساتىپ الۋشى جانە ەلەكتر ەنەرگياسىن تەڭگەرىمدەۋشى نارىق تەتىگى نەگىزىندە ەلەكتر ەنەرگياسى نارىعىنىڭ جاڭا مودەلىنە كوشۋ جوسپارلاندى.
«بۇگىنگى تاڭدا جۇمىس ىستەپ تۇرعان ەلەكتر ستانتسيالارىن جاڭعىرتۋ بويىنشا جوبالار ىسكە اسىرىلىپ جاتىر. ولار 2027 جىلعا قاراي 1 700 مۆت-تان استام ەلەكتر ەنەرگياسىن ىسكە قوسۋعا مۇمكىندىك بەرەدى. قىزىلوردا قالاسىندا جانە تۇركىستان وبلىسىندا جالپى قۋاتى 1 200 مۆت-تان اساتىن مانەۆرلىك قۋاتتاردىڭ قۇرىلىسى ءجۇرىپ جاتىر. كوكشەتاۋ جانە سەمەي قالالارىندا جاڭا جىلۋ ەلەكتر ورتالىقتارىن سالۋ بويىنشا جوبالار پىسىقتالىپ جاتىر. ەكىباستۇز گرەس-2 №3-4 بلوكتارىن سالۋ, سونداي-اق الماتى ەنەرگيا كەشەنىنىڭ ەنەرگيا كوزدەرىن جاڭعىرتۋ بويىنشا جوبالار ىسكە اسىرىلىپ جاتىر. ۇلتتىق ەلەكتر جەلىسىن جاڭعىرتۋ, ونىڭ ىشىندە باتىس جانە وڭتۇستىك ايماقتاردىڭ ەنەرگيا جۇيەسىن كۇشەيتۋ, باتىس ايماقتى ءبىرتۇتاس ەلەكتر ەنەرگەتيكاسى جۇيەسىنە قوسۋ جۇمىستارى جۇرگىزىلىپ جاتىر», دەدى مينيسترلىك باسشىسى.
