2018 جىلى جەرگىلىكتى بيلىك تۋريستەر سانىنىڭ ارتۋى ەكوجۇيەگە, قورشاعان ورتاعا زيان تيگىزەتىنىنە الاڭداپ, ارالدىڭ حالىق ءۇشىن ۋاقىتشا جابىلاتىنىن حابارلاعان ەدى. باستاپقىدا شەكتەۋ تەك ءتورت ايعا عانا ەنگىزىلگەن, الايدا پاندەميا مەن باسقا دا وقيعالاردىڭ سالدارىنان شەكتەۋ ءتورت جىلعا سوزىلدى. وسى ۋاقىت ىشىندە ارال ماڭىنداعى اكۋلا پوپۋلياتسياسى تولىق قالپىنا كەلىپ ۇلگەرگەن. 2022 جىلى بيلىك ارالعا شەكتەلگەن تۋريزمگە رۇقسات بەرىپ, اكۋلالار سانىن باقىلاۋدى جالعاستىردى.
بىراق تۋريستەردىڭ قايتا ورالۋىمەن پوپۋلياتسيا سانىنىڭ ازايىپ كەتكەنى انىقتالادى. تابيعات قورعاۋشىلارى شەكتەۋلەردى كۇشەيتۋدى تالاپ ەتكەنىمەن, بيلىك بۇعان اسىعار ەمەس. پاندەمياعا دەيىن تۋريزم سالاسى ەلدەگى ءىجو-ءنىڭ 12 پايىزىن قۇرادى, ال پحي-پحي ارالىنداعى ۇلتتىق ساياباقتىڭ كىرىسى تۋريزمگە تىيىم سالىنعاننان بەرى ەكى ەسە ازايعان.
«شەكتەۋلەردىڭ ارقاسىندا ءبىز تۋريزم مەن قورشاعان ورتانىڭ ۇيلەسىمدى جولىن تابا الامىز دەپ ۇمىتتەنەمىز», دەدى تەڭىز زەرتتەۋشىسى مەتاۆي چۋانگچاروەندي.
قازىرگى ۋاقىتتا ارالعا باراتىن تۋريستەر ارنايى ەرەجەلەر تىزبەگىن ساقتاۋى ءتيىس. ماسەلەن, تۋريستىك قايىقتار ارالدىڭ كەلەسى بەتىندە ارقانداۋلى تۇرسا, كەلۋشىلەر جاعاجايعا جاياۋ بارۋى كەرەك. جاعاجايلاردا ساعاتىنا رۇقسات ەتىلگەن كەلۋشىلەر سانى 375-كە دەيىن شەكتەلگەن. سونداي-اق سۋعا تەك تىزە تەرەڭدىگىنە دەيىن تۇسۋگە رۇقسات ەتىلەدى.
