كەشە كەشكى مەزگىلدە جانە بۇگىن تاڭەرتەڭ اتىراۋ قالاسىن ءتۇتىن تۇمشالاپ تۇردى. وسىعان بايلانىستى تۇرعىندار الەۋمەتتىك جەلىدە شاعىم ايتىپ جاتىر.
«كاسپي تەڭىزىنىڭ جاعالاۋىنداعى «اقجايىق مەملەكەتتىك تابيعي رەزەرۆاتىنىڭ اۋماعىندا قامىس ورتەنىپ جاتىر. بۇل – اتىراۋ قالاسىنىڭ ماڭىنداعى دامبى اۋىلىنان 30 شاقىرىم قاشىقتىقتاعى اۋماق. كەشە, 2 ساۋىردە جەرگىلىكتى ۋاقىتپەن ساعات 19:00 شاماسىندا قامىس ءورتى شامامەن 85 گەكتار اۋماقتى شارپىدى. توتەنشە جاعدايلار دەپارتامەنتى مەن «اقجايىق» مەملەكەتتىك تابيعي رەزەرۆاتىنىڭ قىزمەتكەرلەرى 80 گەكتار اۋماقتاعى ءورتتى ءسوندىردى. جەل ەكپىنى ءورتتى سوندىرۋگە قيىندىق كەلتىرىپ تۇر. ەلدى مەكەندەرگە ءتونىپ تۇرعان قاۋىپ جوق», دەپ ءمالىم ەتتى دەپارتامەنتتىڭ قوعاممەن بايلانىس توبىنان.
بۇگىن تەڭىز جاعالاۋىنداعى قامىس ءورتىن ءسوندىرۋ جۇمىستارى جالعاسىپ جاتىر. جالىندى سوندىرۋگە توتەنشە جاعدايلار دەپارتامەنتىنەن 38 قىزمەتكەر, 4 تەحنيكا, «اقجايىق» مەملەكەتتىك تابيعي رەزەرۆاتىنان 30 ادام, 9 تەحنيكا, 2 قايىق, 4 موتوپومپا تارتىلعان.
