ۇقشۇ ەلدەرى كەشەندى وقۋ-جاتتىعۋ وتكىزەدى

28-30 ناۋرىزدا وتكەن كەلىسسوزدەرگە ارمەنيا، بەلارۋس، قازاقستان، قىرعىزستان، تاجىكستاننىڭ مۇددەلى مينيسترلىكتەرى مەن ۆەدومستۆولارىنىڭ، سونداي-اق ۇقشۇ بىرىككەن شتابى مەن حاتشىلىعىنىڭ وكىلدەرى قاتىستى.

بيىل ۇيىم اسكەرلەرىنىڭ (ۇجىمدىق كۇشتەردىڭ) كەشەندى وقۋ-جاتتىعۋلارى بىرلەسكەن جەدەل-ستراتەگيالىق «جاۋىنگەرلىك باۋىرلاستىق» ۇلگىسىندە وتكىزىلەدى. بۇل – ۇيىم فورماتىنداعى بىرلەسكەن دايىندىقتىڭ جوعارعى ۇلگىسى بولىپ سانالادى.

ۇقشۇ جاۋاپكەرشىلىگى ايماعىنىڭ ءتۇرلى وڭىرلەرىندە ۇجىمدىق قاۋىپسىزدىك جۇيەسىنىڭ بارلىق ەلەمەنتتەرى قامتىلادى.

«جاۋىنگەرلىك باۋىرلاستىق-2023» كەشەندى جوسپارى اياسىنداعى بىرلەسكەن وقۋ-جاتتىعۋلاردا ۇقشۇ داعدارىستىق ارەكەت ەتۋ ورتالىعى مەن ۇيىمعا مۇشە ەلدەردەگى ۇلتتىق ورگاندار باسقارۋ پۋنكتىلەرى تەحنيكالىق قۇرالدارىنىڭ مۇمكىندىكتەرى پايدالانىلادى.

بەلارۋس اۋماعىندا ۇيىم اسكەرلەرىنىڭ (ۇجىمدىق كۇشتەردىڭ) ءتۇرلى كومپونەنتتەرىنىڭ دايىندىعىن بىرىكتىرەتىن بىرلەسكەن جانە ارناۋلى وقۋ-جاتتىعۋلار جوسپارلانعان. سونىمەن قاتار بەلارۋستە العاش رەت رادياتسيالىق، حيميالىق جانە بيلوگيالىق قورعانىستى بىرلەسە قالىپتاستىرۋ مەن مەديتسينالىق قامتاماسىز ەتۋگە باعىتتالعان «بارەر-2023» ارناۋلى وقۋ-جاتتىعۋى وتەدى.

ۇقشۇ جەدەل ارەكەت ەتۋ ۇجىمدىق كۇشتەرىنىڭ ارناۋلى باعىتتاعى كۇشتەردى قالىپتاستىرۋ قۇرامىنا ەنگىزىلگەن تجم قۇرىلىمدارىمەن «سكالا-2023» وقۋ-جاتتىعۋىن وتكىزۋ دە جوسپارلانىپ وتىر.

جەدەل جانە جاۋىنگەرلىك دايىندىق ءىس-شارالارىن وتكىزۋ كەزىندە، ۇقشۇ ۇجىمدىق قاۋىپسىزدىك جۇيەسىنىڭ كۇشتەرى مەن قۇرالدارىن دامىتۋدىڭ وزەكتى ماسەلەلەرىن زەرتتەۋ ماقساتىندا قورعانىس ۆەدومستۆولارى، بازالىق وقۋ-ادىستەمەلىك جانە عىلىمي-زەرتتەۋ ۇيىمدارىنىڭ وكىلدەرىن بىرىككەن وقۋ-جاتتىعۋلارعا تارتۋ تاجىريبەسى جالعاسادى.