پرەزيدەنت ماجىلىسكە جاڭا پرەمەر-ءمينيستردىڭ كانديداتۋراسىن ۇسىندى

«مەن سايلاۋدا جەڭىسكە جەتكەن پارتيا مەملەكەت باسشىسىنا پرەمەر-ءمينيستردىڭ كانديداتۋراسىن ۇسىنا الاتىنىن اتاپ ءوتتىم. بۇگىن مەن ءماجىلىس توراعاسى ەرلان جاقان ۇلى قوشانوۆتى قابىلدادىم. جاڭا عانا فراكتسيا جەتەكشىلەرىمەن ارنايى كەزدەستىم. ۇكىمەت باسشىسى لاۋازىمىنا Amanat پارتياسى ۇسىنعان كانديداتتى تالقىلادىق. ورتاق مامىلەگە كەلدىك»، دەدى پرەزيدەنت.

مەملەكەت باسشىسى ەرلان قوشانوۆتىڭ ۇسىنىسىن قابىلداپ، ءاليحان سمايىلوۆتىڭ كانديداتۋراسىن ءماجىلىستىڭ قاراۋىنا ۇسىندى.

«اتا زاڭىمىزدىڭ 44-بابىنا سايكەس، پرەمەر-مينيستر لاۋازىمىنا ءاليحان اسحان ۇلى سمايىلوۆتىڭ كانديداتۋراسىن ۇسىنامىن. بارشاڭىز بۇل ازاماتتى جاقسى تانيسىزدار. بىلىكتى ءارى تاجىريبەلى مامان. جۇمىسقا ادال، ەڭبەكقور ادام. ول ۇكىمەتتىڭ الدىندا تۇرعان مىندەتتەردى جاقسى بىلەدى. وعان جاڭا ۇكىمەتتىڭ تىزگىنىن سەنىپ تاپسىرۋعا بولادى دەپ سانايمىن. كونستيتۋتسيانىڭ 56-بابىنا سايكەس پرەمەر-مينيستر لاۋازىمىنا ءاليحان اسحان ۇلى سمايىلوۆتى تاعايىنداۋ ءۇشىن ءماجىلىستىڭ كەلىسىم بەرۋىن سۇرايمىن»، دەدى قاسىم-جومارت توقاەۆ.