وبلىستىق ءبىلىم باسقارماسى باسشىسىنىڭ ورىنباسارى تىلەكقابىل بايدوشەۆتىڭ ايتۋىنشا, جاڭا وقۋ جىلى باستالعانعا دەيىن 25 مەكتەپتى جاڭارتۋ كوزدەلىپ وتىر.
«2021 جىلى اتىراۋ وبلىسىندا قالا مەن اۋدان ورتالىقتارىنداعى, اۋىلدارداعى مەكتەپتەردى قايتا جاڭعىرتۋ قولعا الىندى. بيىل وبلىستا 25 مەكتەپتە قايتا جاڭعىرتۋ جۇمىسى مەملەكەتتىك ساتىپ الۋ پورتالى ارقىلى جۇزەگە اسىرىلادى. بۇل ماقساتقا بيۋدجەتتەن 800 ملن تەڭگە ءبولىندى. جوندەۋ جۇمىستارى كەزىندە مەكتەپتەر پاندىك كابينەتتەرمەن, جيھازبەن جاراقتاندىرىلىپ, كىتاپحانالارى مەن اسحانالارى جاڭارتىلادى. ءبىلىم وردالارى قاۋىپسىزدىك جۇيەسىمەن قامتىلىپ, وقۋشىلاردىڭ ينكليۋزيۆتى ءبىلىم الۋىنا مۇمكىندىك جاسالادى. بۇل جۇمىس وقۋشىلار جازعى دەمالىسقا شىققان كەزدە باستالىپ, جاڭا وقۋ جىلىنا دەيىن اياقتاۋ جوسپارلانىپ وتىر», دەپ حابارلادى تىلەكقابىل بايدوشەۆ.
ونىڭ ايتۋىنا قاراعاندا, اتىراۋ قالاسىندا ورنالاسقان №32, ب.نىسانباەۆ, ق.سماعۇلوۆ اتىنداعى, المالى ەلدى مەكەنىندەگى, جىلىوي اۋدانىنىڭ №2, №23 مەكتەپتەرى جاڭارتىلادى. سونداي-اق تىزىمدە يندەر اۋدانىنىڭ ك.اباقان, س.سەيفۋللين, جامبىل, ج.مىرزاعاليەۆ اتىنداعى, يساتاي اۋدانىنىڭ نوۆوبوگات, جاڭا جانباي ورتا مەكتەپتەرى بار. بۇل ساناتقا قۇرمانعازى اۋدانىندا س.مۇقانوۆ, ن.يماشەۆ, يۋ.گاگارين, ن.ماناەۆ, ز.سەرىكقالي اتىنداعى جانە شورتانباي ورتا مەكتەپتەرى ەنگىزىلگەن. قىزىلقوعا اۋدانىنداعى ب.امانشين, ش.ەركىنوۆ, ى.شورەكوۆ اتىنداعى, ماقات اۋدانىنان ا.قۇنانباەۆ, م.بايمۇحانوۆ اتىنداعى, ماحامبەت اۋدانىنىڭ ا.بايتۇرسىنوۆ, قاراشا ۇلى اتىنداعى ورتا مەكتەپتەردە دە جاڭارتۋ جۇمىسى جۇرگىزىلەدى.
«مەكتەپتەردى قايتا جاڭعىرتۋ الداعى جىلدارى دا جالعاسىن تابادى. اتىراۋ وبلىسىندا 2025 جىلدىڭ سوڭىنا دەيىن 128 مەكتەپتى جاڭعىرتۋ جوسپارلانعان», دەپ مالىمدەدى تىلەكقابىل بايدوشەۆ.
