ۇلىستىڭ ۇلى كۇنىندە ابايعا ارنالعان ەسكەرتكىش اشىلدى

اقىننىڭ ءمۇسىنى تالدىقورعانداعى بيكەن ريموۆا اتىنداعى دراما تەاترىنىڭ الدىنا قويىلدى. سالتاناتتى شاراعا وبلىس اكىمى بەيبىت يساباەۆ، پارلامەنت سەناتىنىڭ بىرقاتار دەپۋتاتى، اباي وبلىسىنان ارنايى وكىلدەرى، قۇنانباي قاجىنىڭ تىكەلەي ۇرپاعى حۋسمان ۆەرليشەۆ، سول سياقتى ونەر مايتالماندارى، وڭىردەگى ارداگەرلەر، زيالى قاۋىم وكىلدەرى، قالا تۇرعىندارى قاتىستى.  

جالپى ەسكەرتكىشتىڭ تۇعىرى گرانيت پەن مراموردان دايىندالعان، ءمۇسىنى قولادان قۇيىلعان. تۇعىرى 5،3 مەتر، ءمۇسىنى - 3،6 مەتر. ەسكەرتكىشتىڭ ساۋلەتشىسى - قازاقستان رەسپۋبليكاسىنىڭ قۇرمەتتى قۇرىلىسشىسى، ۇزاق جىل ساۋلەتشىلەر وداعىن باسقارعان ساۋلەتشى اقمىرزا رۇستەمبەكوۆ. ءمۇسىنشىسى - مەيىرلان ازماعانبەتوۆ. ول بۇعان دەيىن تالدىقورعانداعى ءسۇيىنباي ارون ۇلىنىڭ، عالي ورمانوۆتىڭ، نۇرعيسا تىلەنديەۆتىڭ ەسكەرتكىشتەرىن، «ايالى الاقان» كومپوزيتسياسىن جاساعان. 

ەسكەرتكىشتىڭ اشىلۋ سالتاناتىندا وبلىس اكىمى ارنايى ءسوز سويلەدى.

«حالىقتىڭ مۇددەسىنەن، كوپتىڭ ماقسات-مۇراتىنان تۋىنداعان سول تاقىرىپتار ءالى كۇنگە وزەكتىلىگىن جويعان جوق. قايتا ونداعى ادامگەرشىلىك قۇندىلىقتار، مورال فيلوسوفياسى، تولىق ادام ءىلىمى جىل وتكەن سايىن جاڭعىرىپ، زامان وزعان سايىن جاڭا قىرلارى اشىلىپ جاتىر. قازاقستاننىڭ جاڭا ءداۋىرىن جاساپ، ادىلەتتى قوعام قۇرۋ بارىسىندا ءبىز تاعى دا ابايعا جۇگىنەمىز. اقىن ايتقان ىستىق قايرات، نۇرلى اقىل، جىلى جۇرەك ارقايسىمىزعا اسا قاجەت ەكەنىن ۇعىنامىز. وسى ءۇش اسىل قاسيەتتىڭ ادامدى العا جەتەلەيتىنىن، اقيقاتقا باستايتىنىن تۇيسىنەمىز. اباي قازاقپەن بىرگە جاسايدى. ونىڭ شىعارمالارى بۇگىنگى قوعامعا عانا ەمەس، كەلەشەك ۇرپاققا دا رۋحاني ءنار بەرىپ، تەرەڭ تاعىلىمىن تانىتاتىنى انىق»، دەدى بەيبىت يساباەۆ.