كۇي كۇمبىرلەگەن كۇن

وقۋ-اعارتۋ ءمينيسترى عاني بەيسەم­باەۆتىڭ ايتۋىنشا، مۋزىكا، اسىرەسە دوم­بىرانىڭ اۋەزدى ءۇنى بارلىق ۇلت­تى جالپى ادامي قۇندىلىقتارعا – تولە­رانتتىلىققا، توزىمدىلىككە، بىرلىككە ۇندەپ، ءبىر ارناعا توعىستىرادى. ءارى وسكە­لەڭ ۇرپاقتىڭ ءوز تاريحى مەن ونەرىن ۇي­رەنۋگە دەگەن ۇمتىلىسى مەن قىزى­عۋشىلىعىن وياتادى.

– دومبىرا – مادەنيەتىمىزدىڭ نەگىزگى سيمۆولدارىنىڭ ءبىرى، ۇلتتىق قۇن­دى­لىعىمىز. بالا­باق­شانىڭ كىشكەنتاي تاربيە­لەنۋشىلەرى، وقۋشىلار، كوللەدج ستۋدەنتتەرى ۇلتتىق اسپاپتا وي­ناۋعا بەل­سەندىلىك تانىتقانى قۋانتادى. بۇگىن دومبىرانىڭ شاناعىنان توگىلگەن ءۇن ەلىمىزدىڭ ءار وڭىرىندە اۋەلەدى. وقۋ­شى­لار ۇرپاقتان-ۇرپاققا جالعاسىپ كەلە جاتقان مادەني مۇرانى ساقتاپ، ودان ءارى جالعاستىرادى دەپ سەنەمىن، – دەدى عاني بەيسەمباەۆ.

چەللەندج سوڭىندا وقۋ-اعارتۋ ءمينيسترى ەلورداداعى د.قوناەۆ اتىن­داعى №66 مەكتەپ-ليتسەيىنىڭ وقۋشىلا­رىمەن بىرگە كۇي ورىندادى. «ناۋرىز مەيرامى» مەرەكەلىك ەستافەتاسىنا 1 ميلليونعا جۋىق وقۋشى قاتىستى. ەڭ كىش­كەنتايى – باتىس قازاقستان وبلىسى تەرەكتى اۋدانىنداعى «اقبوتا» بالا­باقشاسىنىڭ تاربيەلەنۋشىلەرى.

بيىل «ناۋرىز مەيرامى» ەستافەتاسى ەلىمىزدىڭ بارلىق مەكتەبىندە كەڭ كولەمدە قامتىلدى. مەرەكە كەزىندە جال­پى رەسپۋبليكالىق «تازا تابيعات» اكتسياسى، «جاسىل ءۇي» چەللەندجى، «قايىرىمدى ۇلت»، «قولونەرشىلەر جارمەڭكەسى» قايىرىمدىلىق شاراسى، ۇلتتىق تاعامدار فەستيۆالى مەن ۇلتتىق ويىندار مەرەكەسى اتالىپ ءوتىلدى.