ايماقتا 700 مىڭنان استام سايلاۋشى بار. ونىڭ اراسىندا, ءبىرىنشى رەت داۋىس بەرۋگە كەلەتىن جاستىڭ سانى 13 مىڭعا جۋىق. سونىمەن قاتار مۇمكىندىگى شەكتەۋلى جانداردىڭ سايلاۋ ۋچاسكەسىنە كەلۋى ءۇشىن ينۆاتاكسي قىزمەتى جۇمىس ىستەپ تۇر. وبلىستىڭ بارلىق قالالارىندا بۇگىن قوعامدىق كولىك تەگىن.
وڭىردە 863 سايلاۋ كوميسسياسى جۇمىس ىستەيدى. ولار - وبلىستىق, اۋماقتىق, وكرۋگتىك جانە ۋچاسكەلىك كوميسسيالارى. قاراعاندى قالاسىنىڭ كەنشىلەر مادەنيەت سارايىندا ورنالاسقان № 17 سايلاۋ ۋچاسكەسىنە تاڭنان بەرى داۋىس بەرۋشىلەر كەلىپ جاتىر.
قاراعاندى وبلىسىندا پروپورتسيونالدى-ماجوريتارلىق جۇيەنى قولدانا وتىرىپ, ماسليحاتتارعا 214 دەپۋتات جانە ماجىلىسكە ەكى دەپۋتات سايلانادى.
داۋىس بەرۋشىلەر ءتۇرلى ءتۇستى بەس بيۋللەتەن الادى. ءماجىلىس دەپۋتاتتارىن پارتيالىق تىزىمدەر بويىنشا تاڭداۋ ءۇشىن – كوك, ال ءبىر مانداتتى وكرۋگتەر بويىنشا – جاسىل.
وبلىستىق ماسليحاتقا داۋىس بەرۋ ءۇشىن كۇلگىن جانە قىزعىلت سارى ءتۇستى, قالالىق جانە اۋداندىق ماسليحاتتارعا – سۇر ءتۇستى بيۋللەتەندەر بەرىلەدى. ءار بيۋللەتەندە «بارلىعىنا قارسى» جولاعى بار.
داۋىس بەرۋ بارىسىن تاۋەلسىز بايقاۋشىلار باقىلاپ جاتىر.
