ەلوردا جاستارى اراسىندا «ناۋرىز ايتىس» ءوتتى

استانا قالاسىنىڭ اكىمدىگى تىلدەردى دامىتۋ جانە ارحيۆ ءىسى باسقارماسى ەلوردا جاستارى اراسىندا «ناۋرىز ايتىس» اتتى جاس اقىندار اراسىنداعى ونەر سايىسىن ۇيىمداستىردى.

ءىس-شارا ل.گۋميلەۆ اتىنداعى ەۇۋ عيماراتىندا ءوتتى. قالانىڭ جوعارى وقۋ ورىندارى مەن مەكتەپتەرىنەن 14 پەن 23 جاس ارالىعىنداعى تاڭداۋلى 10 اقىن ساحنادا ءسوز سايىستىرىپ، باق سىنادى.

«ناۋرىز - قازاقتىڭ ءتول مەيرامى. بۇل ءىس-شارا مەرەكەنىڭ قارساڭىندا قازاقتىڭ اسىل ونەرى ايتىستى جاستاردىڭ اراسىندا ناسيحاتتاۋ ماقساتىندا ۇيىمداستىرىلىپ وتىر. ايتىستىڭ ەتنوگرافيالىق تاريحىن الىپ قارايتىن بولساق، قايىم ايتىس، بادىك ايتىس، قىز بەن جىگىتتىڭ ايتىسى، ءولى مەن ءتىرىنىڭ ايتىسى نەمەسە وتىرىك ولەڭ ايتىسى سياقتى تۇرلەرى بار. بىراق ايتىستىڭ تۇرلەرى بارىن بىلە بەرمەيمىز. ەندى وسىنى جاستاردىڭ اراسىندا ناسيحاتتاۋ ماقساتىندا بۇگىن وسى زالعا جينالىپ وتىرمىز»، دەدى استانا قالاسى تىلدەردى دامىتۋ جانە ارحيۆ ءىسى باسقارماسىنىڭ باسشىسى ساكەن ەسىركەپ.

ايتىستى بەلگىلى اقىن، فيلولوگيا عىلىمدارىنىڭ كانديداتى سەرىكزات دۇيسەنعازى جۇرگىزدى.

جاس اقىنداردىڭ ونەرىن باعالاعان قازىلار القاسىنىڭ قۇرامى عالىمدار، ايتىسكەر اقىندار جانە جۋرناليستەردەن جاساقتالدى.  ولاردىڭ قاتارىندا، قايرات ساق، بالعىنبەك يماشەۆ، ەركەبۇلان قاينازاروۆ، يرانعايىپ كۇزەمباەۆ، جانجىگىت ومارحان بولدى.

جاس اقىنداردىڭ جان-جاقتى بىلىمدىلىگى، ايتىلعان وي-پىكىردىڭ ۇشقىرلىعى، تاقىرىپتىڭ اشىلۋى، قارسىلاسىنا تاباناستى ۇتىمدى جاۋاپ قايتارىپ تويتارىس بەرۋى،  ساحناداعى مادەنيەتى، سوزگە توقتاۋى ت.ب. شەبەرلىگى سىنالدى. ايتىسكەرلەردىڭ ونەرىنە 10 بالدىق جۇيەدە باعا بەرىلدى، ءار جۇپقا 15-20 مينۋت ۋاقىت ءبولىندى.

قازىلار القاسىنىڭ شەشىمىمەن باس جۇلدە مەن 1-ورىن بىرىكتىرىلىپ ەكى ءبىرىنشى ورىن «قايىم ايتىستىڭ» ۇلگىسىن كورسەتكەن بەك شىمات پەن  №86 مەكتەپ-گيمنازياسىنىڭ 10 سىنىپ وقۋشىسى ناۋات جاقاتاەۆاعا بۇيىردى. جۇلدەلى 2-ورىن ەلدار ءامىرحان مەن تاماشا راحاتقىزىنا، 3-ورىن عالىم ەركىنبەك پەن ايىم اسىلبەكقىزىنىڭ قانجىعاسىنا بايلاندى.

ءى ورىن (ەكەۋ) – 250 000 تەڭگەدەن، ءىى ورىن (ەكەۋ) – 150 000 تەڭگەدەن، ءىىى ورىن (ەكەۋ) 100 مىڭ تەڭگەدەن جانە قالعان قاتىسۋشىلارعا 50 000 مىڭ تەڭگەدەن اقشالاي سىيلىق پەن ديپلومدار تابىس ەتىلدى.

جوعارى دەڭگەيدە وتكەن ءسوز بارىمتاسىن قورىتىندىلاعان ۇيىمداستىرۋشىلار، جاستار اراسىندا قازاقي قۇندىلىقتاردى ناسيحاتتاۋدىڭ جاڭا جولدارىن ۇنەمى ىزدەنىپ، ءتول ونەرىمىزدىڭ ناقىشىن بۇزباي زاماناۋي كەلبەتىن قالىپتاستىرا بەرۋىمىز كەرەك دەپ وي ءتۇيدى.