كەشە «حابار» تەلەارناسىنىڭ تىكەلەي ەفيرىندە كەزەكتى پىكىرسايىس ۇيىمداستىرىلدى. وعان «Amanat» پارتياسىنان ەرلان قوشانوۆ, «اۋىل» حالىقتىق دەموكراتيالىق پاتريوتتىق پارتياسىنان جيگۋلي دايراباەۆ, «Respublica» پارتياسىنان ايداربەك قوجانازاروۆ, قازاقستان حالىق پارتياسىنان وكسانا اۋباكىروۆا, قازاقستاننىڭ «بايتاق» جاسىلدار پارتياسىنان ازاماتحان امىرتاەۆ, «اق جول» قازاقستان دەموكراتيالىق پارتياسىنان ازات پەرۋاشەۆ جانە جالپىۇلتتىق سوتسيال-دەموكراتيالىق پارتياسىنان نۇرلان اۋەسباەۆ قاتىسىپ, تىڭ ويلارىن ورتاعا سالدى.
العاشقى كەزەڭنىڭ العاشقى تۋرىندا سپيكەرلەر پارتيانىڭ ماقساتىمەن تانىستىردى. العاش بولىپ ءسوز العان «بايتاق» پارتياسىنىڭ توراعاسى ازاماتحان امىرتاەۆ: ء«بىز اينالامىزعا قورشاعان ورتانى قورعاۋعا بەيجاي قارامايتىن ازاماتتاردى توپتاستىردىق. ەلدەگى ەكولوگيالىق پروبلەمالارمەن قاتار, حالىقتىڭ تابىسىن ارتتىرۋ مەن الەۋمەتتىك ماسەلەلەردى شەشۋگە باسىمدىق بەرىپ وتىرمىز», دەدى ول.
«Respublica» پارتياسىنىڭ توراعاسى ايداربەك قوجانازاروۆ پارتيا باسشىلارى ەڭبەك ادامدارى ەكەنىن, ەڭبەك جولىن قاراپايىم جۇمىسكەر بولىپ باستاپ, ۇلكەن جەتىستىككە جەتكەنىن, جيناقتاعان مول تاجىريبەلەرىن حالىقتىڭ ءال-اۋقاتىن جاقسارتۋعا جۇمساۋعا دايىن ەكەنىن جەتكىزدى.
قازاقستان حالىق پارتياسىنىڭ وكىلى وكسانا اۋباكىروۆا سەنىم ادامدى العا جەتەلەيتىن كۇش ەكەنىن ايتىپ, پارتيا وكىلدەرى حالىقتىڭ سەنىمىنە سەلكەۋ تۇسىرمەۋگە تىرىساتىنىن ايتتى.
«اۋىل» پارتياسىنىڭ وكىلى جيگۋلي دايراباەۆ «اۋىلدىقتار» جۇمىستارىن سوزبەن ەمەس, ىسپەن دالەلدەيتىنىن, قازاقستاندى قۋاتتى ەلگە اينالدىرۋعا كۇش جۇمسايتىنىن العا تارتتى.
«اق جول» پارتياسىنىڭ توراعاسى ازات پەرۋاشەۆ ۋادەنى ءۇيىپ توكپەي, ناقتى ىستەرمەن اينالىسىپ جاتقانىن ااتاپ ءوتتى. وسى ۋاقىتقا دەيىن پارتيا وكىلدەرى تاباندىلىقپەن ۇسىنىپ كەلگەن باستامالار جۇزەگە اسا باستاعانىن جەتكىزدى.
جالپىۇلتتىق سوتسيال-دەموكراتيالىق پارتياسىنىڭ وكىلى نۇرلان اۋەسباەۆ جەمقورلىقپەن كۇرەسىپ, شەتەلدەگى قاراجاتتى ەلگە قايتارۋعا اتسالىسىپ, تۇرعىنداردىڭ تۇرمىسىن ارتتىرۋعا كۇش سالاتىندارىن ايتتى.
«Amanat» پارتياسىنىڭ توراعاسى ەرلان قوشانوۆ پارتيا حالىقتىڭ ءال-اۋقاتىن جاقسارتۋ ماقساتىندا بارلىق سالادا تىڭ رەفورمالاردى جۇزەگە اسىرۋعا دايىن ەكەنىن جەتكىزدى.
العاشقى كەزەڭنىڭ ەكىنشى تۋرىندا سپيكەرلەر ءبىر-بىرىنە ساۋال جولداپ, پىكىرسايىستى قىزدىرا ءتۇستى. ەشكىم توسىلىپ قالعان جوق. بەرىلگەن ۋاقىتتى ءتيىمدى پايدالانىپ, ەموتسياعا بەرىلمەي, جان-جاقتى جاۋاپ بەرۋگە تىرىستى. ساۋالداردىڭ دەنى پارتيالاردىڭ جۇمىسىنا قاتىستى قويىلدى. اتاپ ايتساق, قورعانىس, كاسىپكەرلىك, ەكولوگيا سياقتى ماڭىزدى ماسەلەلەر كوتەرىلىپ, حالىق باتىل باستامالاردى كۇتىپ وتىرعانى ايتىلدى.
ەكىنشى كەزەڭنىڭ العاشقى تۋرىندا سپيكەرلەر ەلىمىزدىڭ الەۋمەتتىك-ەكونوميكالىق دامۋىنا قاتىستى ۇسىنىستارىن ورتاعا سالدى. ا.امىرتاەۆ جول, جىلۋ, تۇرعىن ءۇي ماسەلەسىن كوتەرىپ, قورشاعان ورتانى قورعاۋدى نازاردا ۇستاۋ كەرەك ەكەنىن ايتتى. ج.دايراباەۆ ازىق-ت ۇلىك قاۋىپسىزدىگى ماسەلەسىن كوتەرسە, ا.پەرۋاشەۆ سالىق سالاسىنداعى رەفورمالاردى جاڭعىرتۋدى ۇسىندى. ا.قوجانازاروۆ كاسىپكەرلىكتى دامىتۋعا كوڭىل بولسە, ن.اۋەسباەۆ جەمقورلىقپەن كۇرەستى كۇشەيتۋ كەرەك ەكەنىن ايتتى. و.اۋباكىروۆا ساياسي جۇيەنى جاڭعىرتۋدى سەڭ قوزعالعانىن ايتىپ, بۇل باعىتتاعى جۇمىستاردىڭ جالعاسۋى ماڭىزدى ەكەنىن جەتكىزدى. ە.قوشانوۆ جۇمىسسىزدىق ماسەلەسىن شەشۋگە, وزگە دە الەۋمەتتىك ماسەلەنى شەشۋگە اتسالىساتىندارىنا سەندىردى.
ەكىنشى كەزەڭنىڭ ەكىنشى تۋرىندا سپيكەرلەر تۇرعىنداردان تۇسكەن ساۋالدارعا جاۋاپ بەردى. سايلاۋشىلار كوبىنە الەۋمەتتىك ماسەلەلەردى كوتەرىپ, پارتيالار ونى شەشۋ ءۇشىن قانداي ناقتى جۇمىستار اتقاراتىنىن سۇرادى.
ءتۇيىن: وسىلايشا, الداعى ساياسي ناۋقان اياسىندا ورتالىق سايلاۋ كوميسسياسىنىڭ تاپسىرىسى بويىنشا ءۇشىنشى تەلەدەبات تارتىستى ءوتتى دەۋگە نەگىز بار. تىكەلەي ەفيردە توسىننان قويىلعان سۇراققا جاۋاپ بەرىپ, ويىڭدى جيناقتاپ ءسوز سويلەۋ وڭاي ەمەس. بۇل رەتتە پارتيا وكىلدەرى شاما-شارقىنشا سايلاۋالدى باعدارلامالارىنىڭ باسىم باعىتتارىن تىلگە تيەك ەتىپ, سايلاۋشىلاردىڭ سەنىمىن اقتاۋعا تىرىساتىندارىن دالەلدەپ باقتى. ەندىگى كەزەك – سايلاۋشىلاردا!
