«بۇگىن استانا اكىمدىگى مەن PetroRetail كومپانياسى اراسىندا ءوزارا ءىس-قيمىل تۋرالى مەموراندۋمعا قول قويىلدى. مەموراندۋم شەڭبەرىندە وسى جىلدىڭ سوڭىنا دەيىن كومپانيا ەلوردانىڭ مۇقتاج وتباسىلارىنا 4 مىڭ دانا ازىق-ت ۇلىك جيىنتىعى تۇرىندە كومەك كورسەتەتىن بولادى. وسى ايدا ناۋرىز مەيرامىنىڭ قۇرمەتىنە مىڭ وتباسى كومەك الادى», دەدى ەلوردا اكىمىنىڭ ورىنباسارى ەسەت بايكەن.
استانا قالاسى اكىمىنىڭ ورىنباسارى اكتسيا ۇيىمداستىرۋشىلارى مۇقتاج ازاماتتارعا كومەكتەسىپ قانا قويماي, بۇكىل ەل بويىنشا ورتا جانە ءىرى بيزنەس سۋبەكتىلەرىن قايىرىمدىلىققا ەرەكشە نازار اۋدارۋعا جانە بەلسەندى بولۋعا شاقىرۋعا نيەتتى ەكەنىن ايتتى.
«Qazaq Oil ساۋدا برەندىمەن PetroRetail كومپانياسى ناۋرىز مەرەكەسى قارساڭىندا استانا اكىمدىگىمەن بىرلەسىپ, قايىرىمدىلىق اكتسياسىن وتكىزۋ جانە وعان مۇقتاج جاندارعا كومەك كورسەتۋ تۋرالى شەشىم قابىلدادى. ناۋقان ءبىر رەتتىك ەمەس. ءبىزدىڭ باستامامىز كومپانيامىزدىڭ قاعيداتتارىنا سايكەس كەلەدى. ءبىز ءوزىمىزدى الەۋمەتتىك جاۋاپتى بيزنەس رەتىندە سانايمىز. وزگەلەرى بۇل باستامانى قولدايدى دەپ ويلايمىن», دەپ اتاپ ءوتتى ءوز كەزەگىندە PetroRetail باس ديرەكتورى تولەمىس شوتانوۆ.
ەرىكتىلەر مەن قاراپايىم تۇرعىندار قازىر جالعىزباستى زەينەتكەرلەردىڭ, ارداگەرلەردىڭ, ەرەكشە قاجەتتىلىكتەرى بار بالالاردى تاربيەلەپ وتىرعان كوپبالالى وتباسىلاردىڭ, از قامتىلعان وتباسىلاردىڭ جانە حالىقتىڭ الەۋمەتتىك وسال توپتارىنداعى باسقا ادامداردىڭ ۇيلەرىنە مىڭنان استام سەبەت تاپسىردى. مىڭ قوراپتىڭ ارقايسىسىندا ەڭ قاجەتتى ونىمدەر بار — ۇن, قانت, ماي, ماكارون, قاراقۇمىق, كۇرىش جانە ت.ب. قاجەتتى تاۋارلارى بار ازىق-ت ۇلىك جيىنتىقتارى سەگىز اۋىر جۇككە تيەلگەن.
«قايىرىمدىلىق اكتسياسىن ۇيىمداستىرۋشىلارعا العىسىمىز شەكسىز. بۇل بىزگە جانە باسقا وتباسىلارعا ۇلكەن كومەك. ناۋرىز مەرەكەسى قارساڭىندا وسىنداي يگى ءىس جاسالدى. ءبىز اكىمدىك پەن كاسىپكەرلەر تاراپىنان ۇنەمى كومەك پەن قولداۋ الىپ وتىرامىز. ءبىزدىڭ جاعدايىمىزدى باقىلاۋدا ۇستاپ وتىرعاندارىڭىزعا راقمەت!», دەدى كوپبالالى انا زۋلفيا تىلەۋوۆا.
استانالىق ليۋدميلا سيماكوۆا دا قايىرىمدىلىق اكتسياسى اياسىندا ازىق-ت ۇلىك سەبەتىن الدى. ول ۇيىمداستىرۋشىلار مەن ەرىكتىلەرگە كورسەتكەن كومەگى ءۇشىن العىسىن ءبىلدىردى.
«ەلوردامىزدا جانە ەلىمىزدە جاعدايىمىز كەرەمەت بولسىن. مەرەكەلىك كوڭىل-كۇي سىيلاعاندارىڭىزعا راحمەت. وسى جانە باسقا دا قايىرىمدىلىق شارالارى ۇيىمداستىرىلىپ جاتقانىنا العىس ايتامىز», دەدى ول.
