«جان-جاقتى جاڭعىرۋ ۇدەرىسىن باستادىق. ونىڭ باعىت-باعدارىن بىلتىر ناۋرىز ايىنداعى جولداۋدا ايقىنداپ الدىق. ەلىمىز دامۋدىڭ جاڭا كەزەڭىنە قادام باستى. ءبىر جىلدىڭ ىشىندە اۋقىمدى رەفورمالاردى جۇزەگە اسىردىق. بيلىك جۇيەسىن جاڭا تالاپقا ساي جاڭعىرتۋ ءۇشىن بىرنەشە ساياسي ناۋقان وتكىزدىك. ماڭىزدى ماسەلەلەردى تالقىلاۋ ءۇشىن ۇلتتىق قۇرىلتايدى قۇردىق. مەملەكەتتىگىمىزدىڭ تۇعىرىن جانە ەل بىرلىگىن نىعايتاتىن جاڭا يدەولوگيالىق تۇجىرىمدار ۇسىندىق. ناۋرىز مەيرامىن جاڭاشا اتاپ وتە باستادىق. رەسپۋبليكا كۇنىن قايتا جاڭعىرتۋ تاريحي قادام بولدى», دەپ اتاپ ءوتتى پرەزيدەنت.
مەملەكەت باسشىسىنىڭ ايتۋىنشا, ەلىمىزدەگى تۇبەگەيلى وزگەرىستەر جايلى ەل ىشىندە عانا ەمەس, الىس شەتەلدە دە ايتىلىپ جاتىر.
ء«بىزدىڭ بولاشاعىمىز – ايقىن, ناقتى جوسپارىمىز بار. ءماجىلىس جانە ءماسليحاتتار سايلاۋى – بيلىك ينستيتۋتتارىن جاڭارتۋ جۇمىسىنىڭ قورىتىندى كەزەڭى. وسىلايشا, بيلىك جان-جاقتى رەفورمالاردى جالعاستىرۋ ءۇشىن جاڭا سەنىم مانداتىنا يە بولادى. ەلىمىزدى دامىتۋ جولىندا تىڭ باستامالار كوتەرىپ, ونى تابىستى جۇزەگە اسىرۋ – باستى مىندەت. قازىر جەتىستىككە ءماز بولىپ وتىراتىن زامان ەمەس. جۇمىستى تىڭ قارقىنمەن جالعاستىرۋ قاجەت», دەپ ناقتىلادى قاسىم-جومارت كەمەل ۇلى.
