ەريسلانديدىڭ جاسى 40-قا تاياپ قالدى. ول 1983 جىلدىڭ 11 ساۋىرىندە كۋبانىڭ گۋانتانامو قالاسىندا دۇنيەگە كەلدى. اۋەلى اۋەسقويلار اراسىندا وتە جاقسى كورسەتكىشتەرگە قول جەتكىزدى. اتاپ ايتساق, 2005 جىلى قىتايدىڭ مينيان قالاسىندا 69 كيلو سالماق دارەجەسىندە جۇدىرىقتاسىپ, الەم چەمپيونى اتاندى. سول جارىس بارىسىندا لارا ۋكراينالىق سەرگەي دەرەۆيانچەنكو (30:9), ۇندىستاندىق ۆيجەندەر سينگح (تازا جەڭىس), اندرەي بالانوۆ (28:16), امەريكالىق مەلسون بويد (تازا جەڭىس), قازاق باقتيار ارتاەۆ (31:22) جانە بەلورۋسسيالىق ماگومەد نۋريددينوۆ (24:9) سىندى دۇلدۇلدەردى ەش كۇمانسىز جەڭدى.
2005 جىلى ماسكەۋدە وتكەن الەم كۋبوگىندە كۋبا قۇراماسى ەكىنشى ورىندى يەلەنگەنى بەلگىلى. سول كوماندانىڭ ساپىندا ەريسلاندي لارا دا ونەر كورسەتتى. بوستاندىق ارالىنىڭ وكىلدەرى جارتىلاي فينالدا قازاقستاننىڭ بوكسشىلارىنان باسىم ءتۇستى. سول كەزدە لارا باقىت سارسەكباەۆتى (39:22) سان سوقتىرعان ەدى. كەيىننەن ول ورتالىق امەريكا ويىندارى جانە باسقا دا اسا ءىرى حالىقارالىق تۋرنيرلەردە جەڭىس تۇعىرىنا كوتەرىلدى. ءسوز ورايى كەلگەندە, ءتۇرلى بايراقتى باسەكەلەردە كۋبالىق بوكسشى ءبىزدىڭ باقتيار مەن باقىتتان ءبىر ەمەس بىرنەشە مارتە جەڭىلگەنىن دە ايتا كەتكەن ابزال.
2007 جىلى برازيليادا الاۋى تۇتانعان پانامەريكا ويىندارى كەزىندە ەريسلاندي ءوزىنىڭ داڭقتى وتانداسى, وليمپيا ويىندارى مەن الەم چەمپيوناتتارىن ەكى رەتتەن ۇتقان گيلەرمو ريگوندومەن بىرگە اقش-قا قاشۋعا ارەكەت ەتەدى. بىراق ولار جەرگىلىكتى پوليتسيانىڭ قولىنا ءتۇسىپ, كۋباعا قايتارىلدى. كەلەسى جىلى اتالعان بوكسشى قايتا تاۋەكەلگە بەل بۋدى. بۇل جولى لارانىڭ جولى بولدى. بىرەر ۋاقىت گەرمانيادا تۇراقتايدى دا, كوپ كەشىكپەي امەريكاعا اتتانادى.
اقش-قا جەتكەننەن كەيىن كاسىپقوي رينگتە كۇش سىناسا باستايدى. 2008-2022 جىلدار ارالىعىندا بارلىعى 35 كەزدەسۋ وتكىزگەن ەريسلاندي 29 رەت جەڭىس تويىن تويلادى. 16 باسەكەدە ايقىن باسىمدىق تانىتتى. ول تەك پول ۋيليامس (2011 جىلى), ساۋل الۆارەس (2014 جىلى) جانە دجاررەتت حەردتەن (2018 جىلى) عانا ۇپاي سانىمەن ۇتىلدى. تاعى ءۇش تارتىستا تەڭ ەسەپ تىركەلدى. ءار كەزدەرى لارا ءتۇرلى بەلدى نۇسقالار بويىنشا التىن بەلبەۋدى يەلەندى. قازىرگى كەزدە WBA-نىڭ تۇراقتى چەمپيونى. ءوزىنىڭ سوڭعى جەكپە-جەگىن ەريسلاندي لارا بىلتىرعى جىلدىڭ مامىر ايىندا يرلانديالىق گەري و’سالليۆانعا قارسى وتكىزىپ, ونى سەگىزىنشى راۋندتا ۇرىپ جىقتى.
ال جانىبەكتىڭ ءجۇرىپ وتكەن جولى جانكۇيەرلەردىڭ كوز الدىندا. ول دا اۋەسقوي رينگتە تولاعاي تابىسقا جەتتى. الەم جانە قۇرلىق چەمپيونى, ازيا ويىندارىنىڭ جەڭىمپازى اتاندى. كاسىپقويلار اراسىندا 13 كەزدەسۋ وتكىزىپ, بارلىعىن جەڭىسپەن اياقتادى. سەگىز قارسىلاسىن نوكاۋتقا جىبەرەدى. بۇل كۇندەرى WBO نۇسقاسىنىڭ التىن بەلبەۋىن يەلەنىپ وتىرعان قازاقتىڭ قايسار ۇلى ەندى ورتا سالماقتىڭ ءابسوليۋتتى چەمپيونى اتانۋدى كوزدەۋدە.
