وبلىستىق پوليتسيا دەپارتامەنتىنىڭ ءباسپاسوز قىزمەتىنەن ءمالىم ەتكەندەي, «يندەر-قاراباۋ-ميالى-ساعىز» تاسجولىنىڭ 248-260 شاقىرىمىندا كولىك قوزعالىسى شەكتەلدى. جولدىڭ بۇل بولىگى قىزىلقوعا اۋدانىنىڭ ورتالىعى ميالى مەن وعان كورشىلەس جانگەلدين اۋىلىن جالعايدى.
وبلىس اكىمى ءباسپاسوز قىزمەتىنىڭ اقپاراتىنا سۇيەنسەك, بۇل – بىلتىر جىرىلعان جولدىڭ ءبىر بولىگى. توپىراق توسەلىپ, كولىك وتەتىندەي ەتىپ جاسالعان. بۇگىن, 11 ناۋرىزدا تاڭعى ساعات 4:45-تە ەرىگەن قار سۋىنىڭ كوپ كەلۋىنە بايلانىستى توپىراق توسەلگەن جول قايتا بۇزىلعان.
«جوسپارعا سايكەس جىرىلعان جولدىڭ بولىگىنە سۋ وتكىزەتىن ارنايى قۇبىر قويىلادى. بىلتىر جولدىڭ بۇل بولىگىنە اسفالت توسەلگەن جوق. جول تەك توپىراق توسەلگەن كۇيىندە تۇر», دەپ ءمالىم ەتتى وبلىس اكىمىنىڭ ءباسپاسوز قىزمەتىنەن.
قازىر ميالى اۋىلىنان جانگەلدين, ويىل, كوزدىعارا, تاسشاعىل, جامبىل, قىزىلقوعا اۋىلدىق وكرۋگتەرىنە كولى قاتىناسى توقتاعان.
قىزىلقوعا اۋدانىنىڭ اكىمى قانات ءازمۇحانوۆتىڭ دەرەگىنە قاراعاندا, 7 ناۋرىزعا قاراعان ءتۇنى نوسەر جاڭبىر جاۋعان.
جاڭبىر مەن ەرىگەن قاردىڭ سالدارىنان ميالى اۋىلدىق وكرۋگىندە سۋ دەڭگەيى كوتەرىلگەن. بۇل اۋىلىشىلىك سۋ باسۋ قاۋپىن تۋىنداتقان.
«تولاسسىز جاۋعان جاڭبىر ساعىز اۋىلىنىڭ ورتاسىمەن وتەتىن نوعايتى وزەنىنىڭ ارناسىن تولتىرىپ جىبەردى. سول سەبەپتەن وزەن جاعالاۋىن بەكىتۋگە 80-نەن استام تۇرعىن جۇمىلدى. قازىر نوعايتى وزەنىندەگى سۋ دەڭگەيى بىرتىندەپ تومەندەپ كەلەدى. ال ساعىز وزەنىندە اعىس باسەڭدەدى», دەگەن ەدى قانات ءازمۇحانوۆ.
