ورتالىق كوممۋنيكاتسيالار قىزمەتى الاڭىندا «استانا بالەت» تەاترىنىڭ مەرەيتويلىق ماۋسىمعا ارنالعان ءىس-شارالار جوسپارى تانىستىرىلدى. القالى جيىندا تەاتر ديرەكتورى الەكساندر سوۆوستيانوۆ, كوركەمدىك جەتەكشى نۇرلان قانەتوۆ, باس ديريجەر ارمان ورازعاليەۆ, سونداي-اق Urker توبىنىڭ مۇشەلەرى ايدوس ساعات پەن رۇستەم مۋسين بايانداما جاسادى.
اتالعان ونەر ورداسى بيىلعى ونىنشى مەرەيتويلىق ماۋسىمنىڭ ەكىنشى جارتىسىندا دا كورەرمەن نازارىنا قىزىقتى ءارى مازمۇندى باعدارلاما ۇسىنباق. ونىڭ ىشىندە تەاتر رەپەرتۋارىنداعى ۇزدىك قويىلىمدار, جاڭا پرەمەرالار, تانىمال ارتىستەرمەن, ۇجىمدارمەن بىرلەسكەن ءىس-شارالار مەن گاسترولدىك ساپارلار بار. تەاتر ديرەكتورى الەكساندر سوۆوستيانوۆتىڭ ايتۋىنشا, 21-22 ناۋرىزدا «استانا بالەت» ساحناسىندا مادەني قۇبىلىسقا اينالعان Urker توبىنىڭ 30 جىلدىعى قارساڭىندا تەاتردىڭ سيمفونيالىق وركەسترىمەن بىرلەسكەن كونتسەرتكە دايىندىق ءجۇرىپ جاتىر. بۇل كەش مامىر ايىندا الماتى قالاسىندا دا وتكىزىلەدى.
«ماۋسىمنىڭ تاعى ءبىر ەرەكشە قويىلىمى – تالانتتى ارتىستەر سۆەتلانا زاحاروۆا مەن ديانا ۆيشنەۆا ونەر كورسەتەتىن «كارمەن-سيۋيتا» سپەكتاكلى. ءبىرى ءساۋىر ايىندا, ەكىنشىسى مامىر ايىندا الماتىداعى گاسترول بارىسىندا ساحناعا شىعادى. سپەكتاكل وركەستردىڭ سۇيەمەلدەۋىمەن وتەدى. ج.بيزە – ر.ششەدريننىڭ مۋزىكاسىنا كۋبالىق حورەوگراف البەرتو الونسو قويعان, تەحنيكالىق ورىندالۋى تۇرعىسىنان اسا كۇردەلى ءارى بۋىرقانعان سەزىمگە تولى «كارمەن-سيۋيتا» بالەتى ءساتتى شىعادى دەپ ويلايمىن. بۇدان بولەك قازاقستانداعى فرانتسيا ەلشىلىگى جىل سايىن «فرانكومفونيا كوكتەمى» دەگەن اتاۋمەن مادەني ءىس-شارالار وتكىزەدى. بيىل تەاتر ونەرىن سۇيەر قاۋىم ءۇشىن ەلشىلىكتىڭ عالامات تارتۋى دا دايىن. فرانتسيانىڭ Rue des arts ۇجىمى ەلىمىزدە العاش رەت ونەر كورسەتىپ, ايگىلى Costard قويىلىمىن 9 ساۋىردە «استانا بالەت» تەاترىنىڭ ساحناسىندا پاش ەتەدى», دەدى الەكساندر سوۆوستيانوۆ.
سونىمەن بىرگە 15-16 ساۋىردە قوس پرەمەرا تانىستىرىلماق. اينۇر ابىلعازينانىڭ «Soli Deo Gloria» جانە ولجاس ماحانبەتاليەۆتىڭ «Nine» اتتى زاماناۋي ءبىر اكتىلى بالەتتەرىنە بۇگىندە قىزۋ دايىندىق ءجۇرىپ جاتىر. ال 1 مامىردا ءى رەسپۋبليكالىق «اشىق ساحنا» بايقاۋىنىڭ جەڭىمپازدارىن سالتاناتتى ماراپاتتاۋ ءراسىمى ءوتىپ, «جەتى قازىنا» حورەوگرافيالىق مينياتيۋراسىنىڭ پرەمەراسى كورسەتىلەدى. ايتا كەتەيىك, وسى بايقاۋدىڭ ارقاسىندا حورەوگرافيا ونەرى سالاسىنداعى دارىندى حورەوگراف, ستسەنوگراف, كومپوزيتور, ستسەناريستەر توپ جارعان ەدى. ءدۇبىرلى دودا زاماناۋي وتاندىق حورەوگرافيانى دامىتۋدا تىڭ يدەيالار مەن فورمالاردى تاۋىپ, بالەت ونەرى سالاسىنداعى ۇلتتىق ءداستۇردىڭ بارىنشا تامىر جايۋىنا ىقپالداسۋ ماقساتىندا باستاۋ العان.
«تەاتر ۇجىمى 22-23 ساۋىردە اقتوبە قالاسىنا گاسترولدىك ساپارىن وتكىزىپ, ع.جۇبانوۆا اتىنداعى اقتوبە وبلىستىق فيلارمونياسىنىڭ ساحناسىندا ريكاردو امارانتەنىڭ «A Fuego Lento» جانە دجوردج ءبالانچيننىڭ «سەرەنادا» بالەتى ۇسىنادى. 13-21 مامىر كۇندەرى ارالىعىندا «استانا بالەت» تەاترىنىڭ ۇجىمى الەمدىك جانە وتاندىق كلاسسيكا جاۋھارلارى مەن بىرەگەي حورەوگرافيالىق قويىلىمدارىن الماتىنىڭ تالعامپاز كورەرمەن قاۋىمىنا تارتۋ ەتەدى. Almaty Theatre ساحناسىندا دج.ءبالانچيننىڭ «سەرەنادا», ا.الونسونىڭ «كارمەن-سيۋيتا», ي.كيلياننىڭ «جولدان تايعاندار», كارينا ابدۋللينانىڭ «تاعدىر بۇلتارىستارى» جانە مۋكارام ءاۆاحريدىڭ «سالومەيا» سەكىلدى تۋىندىلارى كورسەتىلەدى. ال ماۋسىمنىڭ جابىلۋىندا كلاسسيكانىڭ بيىك ۇلگىلەرىنەن باستاپ, زاماناۋي حورەوگرافيا ونەرىنىڭ بىرەگەي تۋىندىلارى پاش ەتىلەدى», دەدى تەاتر ديرەكتورى.
ايتا كەتەيىك, اتالعان جوبا-جوسپارلار مادەنيەت جانە سپورت مينيسترلىگىنىڭ قولداۋىمەن جۇزەگە اسىرىلادى.
