جيىندا ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ ديرەكتورى ايبولات جاۋدىر, رەجيسسەر, قازاقستاننىڭ ەڭبەك سىڭىرگەن قايراتكەرى نۇرلان جۇمانيازوۆ, «گۇلدەر» ءانسامبلىنىڭ كوركەمدىك جەتەكشىسى جانە ديريجەرى سەرىك داۋلەتوۆ الداعى جوسپارلار تۋرالى باياندادى.
ايبولات جاۋدىردىڭ ايتۋىنشا, ونەر ۇجىمى بيىل 8 پرەمەرا جوسپارلاپ وتىر.
«ناۋرىز ايىنىڭ 3, 4, 5 كۇندەرى ەركىن جۋاسبەكتىڭ «ۇيلەنۋ» مۋزىكالىق كومەدياسىنىڭ پرەمەراسىن ۇسىنامىز. رەجيسسەرى – قازاقستاننىڭ ەڭبەك سىڭىرگەن قايراتكەرى نۇرلان جۇمانيازوۆ. كومپوزيتورى – سەرىكجان ءابدىنۇروۆ. سپەكتاكل تەاتردىڭ حالىق اسپاپتار ءانسامبلىنىڭ سۇيەمەلدەۋىمەن وتەدى. ديريجەرى – مارالجان مىرزاقۇلوۆا. سونداي-اق ءسۇلتانالى بالعاباەۆتىڭ «قىز جيىرماعا تولعاندا» تۋىندىسى جەلىسىمەن قويىلىم دايىندالىپ جاتىر. جانرى – مەلودراما. رەجيسسەرى – قازاقستاننىڭ ەڭبەك سىڭىرگەن قايراتكەرى داۋرەن سەرعازين. پرەمەراسى 11, 12 ناۋرىز كۇندەرى وتەدى. ودان بولەك, ەركىن شىعارماشىلىققا ارنالعان «Qalleki» تەاتر زەرتحاناسى «كەشكى توعىز» سپەكتاكل-كونتسەرتىنىڭ پرەمەراسىن ۇسىنادى. رەجيسسەرى – ءبازىل سۇلتانعازى. زەرتحانانىڭ ماقساتى – شىعارماشىل جاندار ءۇشىن بايلانىس ورتاسىن قۇرۋ جانە ونەرگە وزگەشە كوزقاراس جاساپ, تىڭ دۇنيەلەردى ساحنالاۋ», دەدى تەاتر ديرەكتورى.
ءساۋىر ايىندا تەاتر ساحناسىندا بولات ۇزاقوۆتىڭ رەجيسسەرلىگىمەن ساحنالانعان «جوشى حان» تاريحي دراماسى دا ۇسىنىلادى. تۋىندى اۆتورى – دۋمان رامازان. وعان قوسا قازاقستاننىڭ حالىق ءارتىسى تىلەكتەس مەيراموۆتىڭ 75 جىلدىعىنا وراي «اكە» سپەكتاكلىنىڭ پرەمەراسى جوسپارلانىپ وتىر.
م.بۋلگاكوۆتىڭ تۋىندىسى جەلىسىمەن «جەندەتتەر», م.حاسەنوۆتىڭ شىعارماسى نەگىزىندە «پاي-پاي, جاس جۇبايلار-اي» سپەكتاكلدەرى دە كورەرمەندى قۋانتپاق. رەجيسسەرى – نۇرلان جۇمانيازوۆ.
«قازان ايىندا ج.شايحيسلام ۇلى «قىز جىبەك» سپەكتاكلىنىڭ پرەمەراسى ۇسىنىلادى. جاڭا قويىلىمدى ساحنالاۋ ءۇشىن قازاقستان, رەسەي تەاتر فەستيۆالدەرىنىڭ لاۋرەاتى, رەسەي تەاتر ونەرى ينستيتۋتىنىڭ (گيتيس) ستۋدەنتى, د.ا.كرىموۆ پەن ە.ب.كامەنكوۆيچ شەبەرحاناسىندا ءتالىم الىپ جۇرگەن رەجيسسەر الىبەك ومىربەك ۇلى شاقىرىلادى. قۇرمانعازىنىڭ 200 جىلدىعىنا وراي حالىق اسپاپتار ءانسامبلىنىڭ «كۇي اتاسى – قۇرمانعازى» اتتى كونتسەرتى وتەدى. تەاتر ۇجىمى مامىر ايىنىڭ 2-8 كۇندەرى ارالىعىندا الماتى قالاسىنا گاسترولدىك ساپارمەن بارادى. ال 19-25 ماۋسىم ارالىعىندا پەتروپاۆل قالاسىندا اتالعان وبلىس اكىمدىگىنىڭ قولداۋىمەن تەمىربەك جۇرگەنوۆتىڭ 125 جىلدىعىنا ارنالعان قازاقستان دراما تەاترلارىنىڭ ءXXىح رەسپۋبليكالىق فەستيۆالىن وتكىزەيىن دەپ وتىرمىز», دەدى نۇرلان جۇمانيازوۆ.
روزا باعلانوۆا اتىنداعى «قازاقكونتسەرت» مەملەكەتتىك كونتسەرتتىك ۇيىمىنىڭ ديرەكتورى اقتوتى رايىمقۇلوۆا «گۇلدەر» ءانسامبلىنىڭ تۇساۋكەسەر كونتسەرتى جوعارى دەڭگەيدە وتكەنىن ايتتى.
«الداعى جۇمىس جوسپارى بويىنشا جاڭا قۇرامداعى «گۇلدەر» ءان-بي ءانسامبلىنىڭ ەلىمىزدەگى جانە شەتەلدەردەگى گاسترولدىك ءىس-ساپارى باستالادى. قىرعىزستان, وزبەكستان, ماجارستان, بەلگيا, فرانتسيا ەلدەرىندە ونەر كورسەتەدى. الداعى مىندەت – جاڭا قۇرامداعى «گۇلدەر» ءانسامبلىن جانە وزگە دە مادەنيەت جاۋھارلارىن حالىقارالىق كاسىبي ارەنالارعا شىعارۋ, دۇنيەجۇزىنە كورسەتۋ. ودان بولەك, ءانسامبلدىڭ مۇراعاتتاعى ماتەريالدارىمەن كوپ جۇمىس ىستەدىك. ءتۇرلى فوتوسۋرەتتەر, بەينەماتەريالدار مەن كوستيۋمدەر, 6-8 دەرەكتى فيلم تابىلدى. وسى تۇستا اتاپ وتەتەتىن جايت, ءانسامبلدىڭ ارداگەرلەرى قازاقستاننىڭ حالىق ءارتىسى گۇلجان تالپاقوۆا, قاپاش ق ۇلىشەۆا, ءالتىنبۇبى وماربەكوۆا, تاتيانا اۋتاليپوۆا قۇندى جادىگەرلەردى كۇنى بۇگىنگە دەيىن كوزىنىڭ قاراشىعىنداي ساقتاپ, بىزگە امانات ەتتى. تاتيانا قايىربايقىزىنىڭ ارقاسىندا التىن قوردان ەكى قويىلىم تاپتىق. ولار – «بيپىل», «اساتاياق» جانە «مالايزيا», دەدى ا.رايىمقۇلوۆا.
سونداي-اق سپيكەر التىن قوردان الىنعان «16 قىز», «سۋ تاسۋشى», «كۋا بول» اۋەندەرىنە «گۇلدەر» ءانسامبلىنىڭ كوركەمدىك جەتەكشىسى سەرىك داۋلەتوۆتىڭ باستاماسىمەن جاڭادان ارانجيروۆكا جازىلعانىن اتاپ ءوتتى.
