استانادا كۇيەۋىن پىشاقتاعان ايەلگە قاتىستى تىڭ دەرەكتەر شىقتى

استانادا №65 مەكتەپ ديرەكتورى ءارى ءماسليحات سايلاۋىنا كانديدات رەتىندە تىركەلگەن كەلىنشەك كۇيەۋىن پىشاقتاپ ولتىرگەن. قايعىلى وقيعا ەرلى-زايىپتىلاردىڭ شاڭىراعىندا بولعان.

ىشكى ىستەر ورگاندارىنىڭ مالىمەتىنشە، قاراپايىم وتباسىلىق جانجال ءبىر وتباسىنىڭ قارا جامىلۋىنا اكەپ سوققان. 34 جاستاعى مەكتەپ ديرەكتورى سۋىق قارۋدى قورعانۋ ماقساتىندا پايدالانعانى انىقتالدى.

مەكتەپ ۇجىمى ەڭبەك ءوتىلى 10 جىلدان اساتىن بيولوگيا ءپانىنىڭ مۇعالىمى، كەيىننەن ديرەكتور قىزمەتىنە تاعايىندالعان نۇرگۇل ەلەكەەۆا ءوز ىسىنە تياناقتى، جاۋاپتى مامان ەكەنىن ءبىراۋىزدان ايتادى.

«وتە ەڭبەكقور، اشىق ادام. ءوز ءىسىن وتە جاقسى بىلەدى. ۇيىمداستىرۋ قابىلەتى وتە جوعارى دەڭگەيدە. ءيا، ارينە بۇل قايعىلى وقيعا. ءوزىمىزدىڭ دە توبەمىزدەن جاي تۇسكەندەي بولىپ قالدى»، دەيدى استانا قالاسى №65 مەكتەپ ديرەكتورىنىڭ مىندەتىن اتقارۋشى گۇلناش توكيشەۆا.

قۇزىرلى ورگانداردىڭ ايتۋىنشا، اۋەلى كۇيەۋى پىشاقپەن ايەلىنىڭ موينىن ءتىلىپ ءوتىپ، كەيىننەن كەۋدە تۇسىن جاراقاتتاعان. 34 جاستاعى كەلىنشەك ءوزىن-ءوزى قورعاۋ ماقساتىندا جارىنا سۋىق قارۋ الا جۇگىرىپ، سوڭى قايعىلى جاعدايمەن اياقتالعان. ال وسى ءۇيدىڭ تۇرعىندارى سول كۇنى ەشقانداي شۋدى ەستىمەگەندەرىن ايتادى.