وتىرىس بارىسىندا سەناتورلار «سالىق جانە بيۋدجەتكە تولەنەتىن باسقا دا مىندەتتى تولەمدەر تۋرالى» قازاقستان رەسپۋبليكاسىنىڭ كودەكسىنە (سالىق كودەكسى) جانە «سالىق جانە بيۋدجەتكە تولەنەتىن باسقا دا مىندەتتى تولەمدەر تۋرالى» قازاقستان رەسپۋبليكاسىنىڭ كودەكسىن (سالىق كودەكسى) قولدانىسقا ەنگىزۋ تۋرالى» قازاقستان رەسپۋبليكاسىنىڭ زاڭىنا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ەكىنشى وقىلىمدا قارادى. پالاتا دەپۋتاتتارى زاڭ جوباسىنىڭ جاڭاشىلدىقتارىن نەگىزىنەن قولداي وتىرىپ, ونىڭ جەكەلەگەن ەرەجەلەرىنە بىرقاتار تولىقتىرۋ ەنگىزۋدى ۇسىندى. وسىلايشا, قۇجات جاڭا رەداكتسيامەن قابىلداندى.
سەنات توراعاسى قابىلدانعان زاڭ ەلىمىزدەگى سالىق زاڭناماسىن ودان ءارى جەتىلدىرۋ ءۇشىن ازىرلەنگەنىن اتاپ ءوتتى. ناقتى ايتقاندا, جاڭا نورمالار ازاماتتاردىڭ تولەم قابىلەتتىلىگىن جانە بانكروتتىعىن قالپىنا كەلتىرۋ, وسىمدىكتەر دۇنيەسى وبەكتىلەرىن پايدالانۋ جانە حالىقتىڭ كوشى-قونى سالاسىنداعى سالىق ەرەجەلەرىن ناقتىلايدى.
«سەنات بۇل زاڭعا بىرقاتار تۇزەتۋ ەنگىزدى. ولاردىڭ ءبىر توپتاماسى بولشەك سالىقتىڭ ارناۋلى رەجيمىنە قاتىستى. بۇل سالىق رەجيمى پاندەميادان زارداپ شەككەن سەكتورلاردا جۇمىس ىستەيتىن كاسىپكەرلەردى قولداۋ ءۇشىن مەملەكەت باسشىسىنىڭ تاپسىرماسىمەن ۋاقىتشا ەنگىزىلگەن ەدى. مۇنداي شارا شاعىن جانە ورتا بيزنەس سۋبەكتىلەرىنە ۇلكەن دەمەۋ بولىپ, ءوزىنىڭ تيىمدىلىگىن كورسەتتى. سوندىقتان بولشەك سالىقتى قالپىنا كەلتىرىپ, ونىڭ جۇمىسىن مەرزىمسىز ەتۋ ءۇشىن ءتيىستى تۇزەتۋلەر ەنگىزدىك. وسى زاڭ سالىقتىق مىندەتتەمەنى ورىنداۋعا بايلانىستى قاتىناستاردى جەتىلدىرۋگە جانە سالىق سالۋدىڭ ايقىندىلىعىن قامتاماسىز ەتۋگە وڭ اسەرىن تيگىزەدى دەپ سەنەمىز», دەدى ماۋلەن اشىمباەۆ.
سونىمەن قاتار وتىرىس بارىسىندا «2014 جىلعى 29 مامىرداعى ەۋرازيالىق ەكونوميكالىق وداق تۋرالى شارتقا وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» زاڭ قابىلداندى. ونىڭ نورمالارى ەۋرازيالىق ەكونوميكالىق وداق شەڭبەرىندە تاۋارلاردى اكەلۋ كەزىندە جاناما سالىقتار الۋ ءتارتىبىن رەتتەيدى. سونداي-اق زاڭ ەاەو-عا مۇشە مەملەكەتتەردىڭ كاسىپكەرلەرى اراسىنداعى ءوزارا ساۋدانىڭ ارتۋىنا ىقپال ەتۋدى كوزدەيدى.
بۇگىن سەناتورلار «ەۋرازيالىق ەكونوميكالىق وداقتا تاسىمالداۋدى قاداعالاۋ ءۇشىن ناۆيگاتسيالىق پلومبالاردى قولدانۋ تۋرالى كەلىسىمدى راتيفيكاتسيالاۋ تۋرالى» زاڭدى دا قابىلدادى. بۇل زاڭ كولەڭكەلى ترافيكتى قىسقارتۋعا, كەدەندىك باقىلاۋ پروتسەسىن وڭتايلاندىرۋعا جانە كولىكتىك-لوگيستيكالىق قىزمەتتەردى دامىتۋعا وڭ ىقپال ەتۋگە باعىتتالعان. كەلىسىم قاداعالاۋ وبەكتىلەرىن, ناۆيگاتسيالىق مورلەرگە قويىلاتىن تالاپتاردى, ۇلتتىق وپەراتورلاردىڭ قىزمەتىن ايقىندايدى. ودان بولەك, ەۋرازيالىق ەكونوميكالىق وداققا مۇشە مەملەكەتتەردىڭ قاداعالاۋ ورگاندارىنىڭ ءوزارا ءىس-قيمىل نىساندارىن بەلگىلەيدى.
پالاتا وتىرىسىندا «قازاقستان رەسپۋبليكاسىنىڭ ۇكىمەتى مەن ازەربايجان رەسپۋبليكاسىنىڭ ۇكىمەتى اراسىنداعى وسىمدىكتەر كارانتينى جانە ولاردى قورعاۋ سالاسىنداعى ىنتىماقتاستىق تۋرالى كەلىسىمدى راتيفيكاتسيالاۋ تۋرالى» زاڭ ماقۇلداندى. اتالعان زاڭ ەكى ەل اراسىنداعى كارانتين جانە وسىمدىكتەردى قورعاۋ سالاسىنداعى ىنتىماقتاستىقتى دامىتۋعا مۇمكىندىك بەرەدى, سونىمەن بىرگە, ءتيىستى فيتوسانيتاريالىق قاۋىپسىزدىكتى قامتاماسىز ەتەدى.
سونداي-اق سەناتورلار «قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە وزگەرىستەر مەن تولىقتىرۋلار ەنگىزۋ تۋرالى» زاڭدى ەكى وقىلىمدا قاراپ, وعان بىرقاتار تۇزەتۋ ەنگىزىپ, ماقۇلدادى.
زاڭنىڭ نەگىزگى ماقساتى جەر زاڭناماسىنىڭ جەكەلەگەن ەرەجەلەرىن بۇزعانى ءۇشىن اكىمشىلىك جاۋاپكەرشىلىكتى بەلگىلەۋ جانە جەردى پايدالانۋ مەن قورعاۋعا مەملەكەتتىك باقىلاۋ جۇرگىزەتىن ورگاندارعا اكىمشىلىك ىستەردى قاراۋ جانە ءتيىستى جازالار قولدانۋ بويىنشا وكىلەتتىكتەر بەرۋ ەكەنىن اتاپ وتكەن ءجون.
«بۇل زاڭ جەر زاڭناماسىن بۇزعانى ءۇشىن جەكەلەگەن باپتار بويىنشا اكىمشىلىك جاۋاپكەرشىلىكتى ناقتىلاۋعا ارنالىپ وتىر. سونىمەن قاتار زاڭ شەڭبەرىندە جەردى پايدالانۋ مەن قورعاۋعا مەملەكەتتىك باقىلاۋ جۇرگىزەتىن ورگانداردىڭ وكىلەتتىكتەرىن قايتا قاراۋ كوزدەلگەن. جاڭا نورمالار جەر ۋچاسكەسىنە قۇقىق بەرۋ كەزىندە سىبايلاس جەمقورلىق تاۋەكەلدەرىن جويۋعا جانە جەردى پايدالانۋ مەن قورعاۋعا قاتىستى مەملەكەتتىك باقىلاۋدى كۇشەيتۋگە مۇمكىندىك بەرەدى دەپ سەنەمىز», دەدى ماۋلەن اشىمباەۆ.
