بايقوڭىر اۋدانىندا تجد قىزمەتكەرلەرىنە العىس ءبىلدىرۋ ماقساتىندا «باتىرلارعا العىس!» ءىس-شاراسى ءوتتى.
قۇتقارۋشىلار كۇن سايىن ءوز ءومىرىن قاۋىپكە تىگە وتىرىپ, وزگەلەردىڭ ءومىرىن ساقتاپ قالادى.
ءىس-شارا ەلىمىزدە 1 ناۋرىزدا اتاپ وتىلەتىن العىس ايتۋ كۇنىنە ورايلاستىرىلعان. ونى بايقوڭىر اۋدانى اكىمىنىڭ اپپاراتى مەن ەلوردالىق توتەنشە جاعدايلار دەپارتامەنتى ۇيىمداستىردى.
«بارشاڭىزدى 1 ناۋرىز – العىس ايتۋ كۇنىمەن شىن جۇرەكتەن قۇتتىقتايمىن! بۇگىن اۋدانىمىزداعى «قۇتقارۋشىلار» الاڭىنا جينالۋىمىزدىڭ سەبەبى – ەل يگىلىگى ءۇشىن كاسىبي مىندەتىن مۇلتىكسىز ورىندايتىن, قىزمەتتە جانقيارلىق تانىتاتىن ماماندارعا ريزاشىلىق ءبىلدىرۋ. ەلىمىزدە سوڭعى جىلدارى بولعان تابيعي اپاتتاردا ءار ايماقتا قىزمەت ەتەتىن توتەنشە جاعدايلار قىزمەتكەرلەرى مىندەتتەرىنە ادالدىق تانىتتى. شىن مانىندە, بۇل ناعىز ەرجۇرەك ازاماتتاردىڭ قىزمەتى. وزگەلەردى قۇتقارامىن دەپ قايتىس بولىپ كەتكەن قۇتقارۋشىلار دا از ەمەس. ولاردىڭ قاتارىندا ەلوردالىق قۇتقارۋشى اسقار زابيكۋليندى ەرەكشە اتاپ وتكەن ءجون. باتىرلاردىڭ ەرلىگى ەشقاشان ۇمىتىلماۋى كەرەك. سونىمەن قاتار جاقىندا تۇركيادا بولعان جەر سىلكىنىسىنە قۇتقارۋشىلار مەن دارىگەرلەر جىبەرىلدى. سىن ساتتە قۇتقارۋشىلارىمىز بىرنەشە ادامدى امان الىپ قالدى. تۇركيادا كۇندىز-ءتۇنى قىزمەت ەتكەن ازاماتتارىمىزعا العىس ايتامىز!», دەدى بايقوڭىر اۋدانىنىڭ اكىمى ەرلان جاۋلىباەۆ.
ءىس-شارا بارىسىندا قىزمەت بارىسىندا قازا تاپقان باتىرلاردىڭ رۋحىنا تاعزىم رەتىندە ەسكەرتكىشكە گۇل شوقتارى قويىلدى. ال ەلوردالىق وقۋشىلار تجد قىزمەتكەرلەرىنە العىس رەتىندە ءان شىرقاپ, فلەشموب وتكىزدى.
«وقۋشىلار ءبىزدىڭ باتىرلارىمىزعا باتىلدىعى ءۇشىن, كاسىبي بورىشىن ورىنداعانى ءۇشىن العىس ايتۋعا كەلدى. ءبىز وسكەلەڭ ۇرپاققا ەرەكشە كوڭىل بولەمىز, ويتكەنى بالالار ءبىزدىڭ بولاشاعىمىز, ولار تابيعي جانە تەحنوگەندىك سيپاتتاعى توتەنشە جاعدايلاردا ءوزىن قالاي ۇستاۋ كەرەكتىگىن ءبىلۋى ءتيىس. ول ءۇشىن وقۋ ورىندارىندا ءتۇرلى ءىس-شارالار وتكىزەمىز. وندا ءبىز ۇزدىك وقۋشىلاردى انىقتاپ, ولاردى ەستەلىك سىيلىقتارمەن ماراپاتتايمىز», دەدى قالالىق تج دەپارتامەنتى باستىعىنىڭ ورىنباسارى پولكوۆنيك داستان الدابەكوۆ.
تۇركيا ەلشىسىنىڭ كوممۋنيكاتسيالار جونىندەگى كەڭەسشىسى ماحمۋت شەۆكەت بايرام قازاقستاندىق قۇتقارۋشىلارعا العىس ءبىلدىردى.
ء«بىزدىڭ ەلىمىز ءۇشىن قازاقستاننىڭ كومەككە ۇمتىلىپ, قيىنشىلىققا تاپ بولعان تۇرىك حالقىنا كومەكتەسۋ ءۇشىن قولدان كەلگەننىڭ ءبارىن جاساعانىنا قۋانامىن. باۋىرلاس حالىقتان مورالدىق, ماتەريالدىق جانە فيزيكالىق قولداۋدى سەزىنۋ ءبىزدى ەرەكشە سەزىمگە بولەدى. قازاق حالقىنىڭ بىزبەن بىرگە شىن جۇرەكتەن قايعىرىپ, تۇرىك حالقىنىڭ تۇتاستىعى مەن قاۋىپسىزدىگى ءۇشىن دۇعا ەتكەنىن كوردىك. ءبىزدىڭ ەلىمىز باستان كەشكەن اپاتتى وقيعالار قازاقستان مەن تۇركيا اراسىنداعى دوستىق قارىم-قاتىناستى نىعايتۋعا ىقپال ەتتى. قازاقستاندىقتاردىڭ ەڭبەگىنە, كۇش-جىگەرىنە جانە ىستىق نيەتتەرىنە قاراپ, ۇلكەن ريزاشىلىعىمىزدى بىلدىرەمىز», دەدى ەلشىنىڭ كەڭەسشىسى.
