«كونە تاراز» - امان مالدىباەۆتىڭ كۇيى. كۇيشى بۇل تۋىندىسىن جەلتوقسان وقيعاسى كەزىندە جازعان.
«كۇيىنىڭ تاريحى 1986 جىلدان باستاۋ الادى. ەل تاريحىنداعى اۋىر وقيعانىڭ ءبىرى جەلتوقسان كوتەرىلىسى بولعاننان كەيىن كوڭىلىم جابىرقاپ, ەلگە قايتقىم كەلىپ جۇرگەن كەز ەدى. سول ۋاقىتتا «كونە تاراز ساعىنىشى» دەگەن كۇي جازدىم. جالپى كۇيدىڭ ءوزى جارىققا تولعانىپ, تەبىرەنىپ, ساعىنعان كەزدە شىعادى عوي. سول ۋاقىتتا ەجەلگى تارازدى كوز الدىما ەلەستەتىپ, ماڭ-ماڭ باسقان تۇيەلەر, قازاقتىڭ عانيبەت زامانى, جازيرا دالاسى, ۇلكەندى سىيلاپ, كىشىگە ىزەت تانىتىپ, ءبىر-ءبىرىن رياسىز شىنايى قۇرمەتتەپ, جاز جايلاۋى, قىس قىستاۋى بولعان كەرەمەت شاعىن, شاحريستانعا كەلە جاتقان كەرۋەندەردى ويلاپ, كونە زاماننان باستاۋ الىپ شىعاردىم», دەيدى ول.
اۆتوردىڭ ايتۋىنشا, كۇيدىڭ اتاۋى كەيىن وزگەرگەن.
«بۇل جاققا كەلگەننەن كەيىن جاقسىلىق ساتىبەكوۆ اعامىز «امان, سەن قازىر تۋعان جەردە جۇرگەن جوقسىڭ با؟ سوندىقتان كۇي اتاۋىنداعى ساعىنىش دەگەن ءسوزدى الىپ تاستا» دەدى. سولاي اعانىڭ اقىلىمەن كۇي «كونە تاراز» دەپ اتالىپ كەتتى», دەيدى امان مالدىباەۆ
كەيىننەن بۇل كۇي ەل اراسىندا تاراپ, تانىلا باستادى.
«1986 جىلى شىققانىمەن, مەن ول كۇيدى تىعىپ تاستادىم. وڭاشادا ءوزىم عانا تارتىپ, نوتاسىن جازىپ, ساندىققا سالىپ قويدىم. كەيىن بىرەۋلەر تاۋىپ الىپ, وينايدى عوي دەپ ويلادىم. سويتسەم, ەشكىم ىزدەمەيتىن كورىنەدى. ەلدەر كەلىپ جاتىر, ومىردەن ءوتىپ جاتىر. بىرەۋدى بىرەۋ ىزدەپ جاتقان ەشكىم جوق. قوي, كۇيىمدى ناسيحاتتايىن دەپ 1993 جىلى كومپوزيتور باعلان وماروۆ ەكەۋىمىز وتىرىپ, ەسترادالىق تۇردە ءداستۇرلى مۋزىكا قوسىپ جازدىق. ەرتەڭىندە بىردەن ستاديوندا حالىقتىڭ الدىندا ويناۋعا كەتتىم. سودان بەرى ساحنادان تۇسپەي كەلە جاتىر», دەيدى كۇيشى
