«اتا جولى» كارتاسىن بەرۋ – جاڭا باستاما. ول تۋرالى العاش ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا 2022 جىلدىڭ سوڭىندا حابارلاعان بولاتىن. اتالعان كارتا شەتەلدەگى جوعارى دەڭگەيدەگى كاسىبي مامان قازاقتارعا نە وزدەرى تۇراتىن ەلدە تابىستى بيزنەس-كەيستەردى ىسكە اسىرعان جانە ولاردى قازاقستاندا جۇزەگە اسىرۋعا ىقىلاستى قازاقتارعا بەرىلەدى. ول ارقىلى ەتنيكالىق قازاقتار 10 جىلعا جەڭىلدەتىلگەن ۆيزا راسىمدەپ, قازاقستاندا ءوز كاسىبىن دامىتۋعا مۇمكىندىك الادى.
ەڭبەك جانە حالىقتى الەۋمەتتىك قورعاۋ مينيسترلىگىنىڭ 2023-2027 جىلدارعا ارنالعان دامۋ جوسپارىنا سايكەس, قازاقستانعا كەلگەن قانداستار مەن قونىس اۋدارۋشىلاردى جۇمىسپەن قامتۋ كورسەتكىشىن دە ارتتىرۋدى جوسپارلاپ وتىر. 2023 جىلعى مەجە 83 پايىز بولسا, ونى 2027 جىلدىڭ سوڭىنا دەيىن 95 پايىزعا جەتكىزۋ باستى نازاردا بولىپ وتىر.
