نۇرلان ءابدىروۆ تمد پاا بايقاۋشىلارىن جاڭارتىلعان زاڭناما بويىنشا جۇرگىزىلەتىن قازاقستان رەسپۋبليكاسى پارلامەنتى ءماجىلىسىنىڭ دەپۋتاتتارىن سايلاۋ جونىندەگى اعىمداعى سايلاۋ ناۋقانىنىڭ نەگىزگى كەزەڭدەرىمەن تانىستىردى. سونداي-اق كوميسسيا توراعاسى كەزدەسۋگە قاتىسۋشىلاردى پارتيالىق تىزىمدەردى تىركەۋ قورىتىندىلارى, جەرەبە تارتۋدىڭ ناتيجەلەرى, سونداي-اق ءماجىلىس دەپۋتاتتىعىنا بىرمانداتتىق اۋماقتىق سايلاۋ وكرۋگتەرى بويىنشا سايلاناتىن كانديداتتاردى تىركەۋ قورىتىندىلارى تۋرالى حاباردار ەتتى.
ءوز كەزەگىندە تمد پاا دەلەگاتسياسىنىڭ باسشىسى دميتري كوبيتسكي كەزدەسۋدى ۇيىمداستىرعانى ءۇشىن العىسىن ءبىلدىرىپ, قازىرگى ۋاقىتتا اسسامبلەيانىڭ بايقاۋشىلار توبىن قالىپتاستىرۋ جالعاسىپ جاتقانىن اتاپ ءوتتى. توپقا كەمىندە 50 ادام, ونىڭ ىشىندە تمد-عا قاتىسۋشى مەملەكەتتەر پارلامەنتتەرىنىڭ دەپۋتاتتارى, تمد پاا كەڭەسى حاتشىلىعىنىڭ قىزمەتكەرلەرى جانە سايلاۋ ۇدەرىسى سالاسىندا كاسىبي ءبىلىمى بار ساراپشىلار كىرەدى دەپ جوسپارلانىپ وتىر.
ول سونداي-اق تمد پاا بايقاۋشىلار توبىنىڭ ۇيلەستىرۋشىسى بولىپ ارمەنيا رەسپۋبليكاسى ۇلتتىق جينالىسىنىڭ وڭىرلىك ماسەلەلەر جانە ەۋرازيالىق ينتەگراتسيا ماسەلەلەرى جونىندەگى تۇراقتى كوميسسياسى توراعاسىنىڭ ورىنباسارى, ارمەنيا-قازاقستان پارلامەنتتىك دوستىق توبىنىڭ جەتەكشىسى ۆاگارشاك اكوبيان تاعايىندالعانىن حابارلادى.
دەلەگاتسيا باسشىسى اسسامبلەيادان حالىقارالىق بايقاۋشىلار توبى قازاقستان رەسپۋبليكاسى پارلامەنتى ءماجىلىسى دەپۋتاتتارىنىڭ كەزەكتەن تىس سايلاۋىنا دايىندىق پەن وتكىزۋ مونيتورينگىن ساياسي بەيتاراپتىق, الالاماۋشىلىق, اشىقتىق جانە سايلاۋ ۇدەرىسىنە ارالاسپاۋ قاعيداتتارىنا سۇيەنە وتىرىپ, جۇزەگە اسىراتىنىنا سەندىردى.
سونداي-اق تمد پاا وكىلدەرى بۇقارالىق اقپارات قۇرالدارىندا سايلاۋ ناۋقانىن جاريا ەتۋ مونيتورينگى, سايلاۋدى قارجىلاندىرۋ, ەلەكتورالدىق وقىتۋ جانە سايلاۋ ناۋقانىنا قاتىسۋشىلاردىڭ تەڭ قۇقىعىن قامتاماسىز ەتۋ ماسەلەلەرىمەن تانىستى.
ورتالىق سايلاۋ كوميسسياسىنىڭ مۇشەلەرى قويىلعان بارلىق سۇراقتارعا جان-جاقتى جاۋاپ بەردى. جيىن سوڭىندا نۇرلان ءابدىروۆ دەلەگاتسياعا قازاقستانداعى سايلاۋدى حالىقارالىق بايقاۋعا تۇراقتى قاتىساتىنى ءۇشىن العىس ايتىپ, تمد پاا بايقاۋشىلار توبىنىڭ تولىققاندى جانە ءتيىمدى جۇمىسى ءۇشىن بارلىق قاجەتتى جاعداي جاسالاتىنىن اتاپ ءوتتى.
ەستەرىڭىزگە سالا كەتەيىك, بۇگىنگى تاڭدا 11 مەملەكەتتەن جانە 3 حالىقارالىق ۇيىمنان 97 حالىقارالىق بايقاۋشى اككرەديتتەلگەن.
