ءىس-شارانى وتكىزۋدەگى باستى ماقسات – پارلامەنت ءماجىلىسى مەن ءماسليحاتتارى دەپۋتاتتارىنىڭ كەزەكتەن تىس سايلاۋعا دايىندىقتى پىسىقتاپ, ساياسي باسەكەنى وتكىزۋ بويىنشا تۋىنداعان ماسەلەلەر مەن سۇراقتاردى ءتيىستى مەكەمەلەرمەن بىرگە شەشۋ.
سەميناردى اشقان اۋماقتىق سايلاۋ كوميسسياسىنىڭ توراعاسى اسقار ساقىپكەرەەۆ وبلىستىڭ كەزەكتەن تىس سايلاۋعا دايىندىعى جانە بۇگىنگە دەيىن اتقارىلعان جۇمىستار تۋرالى باياندادى. باياندامادا پارلامەنت ماجىلىسىنە دەپۋتات سايلايتىن №24 بىرمانداتتىق اۋماقتىق سايلاۋ وكرۋگى بويىنشا 18 اقپاندا تىركەۋ اياقتالىپ, ءبىر ورىنعا ۇمىتكەر رەتىندە 13 ادام تىركەلگەنى ايتىلدى.
ءوز كەزەگىندە وسك توراعاسىنىڭ ورىنباسارى كونستانتين پەتروۆ ۇگىت-ناسيحات جۇمىسى قالاي باستالعانىن جانە كوشپەلى سەمينار-كەڭەستى وتكىزۋدىڭ ماقساتى تۋرالى باياندادى.
– بيىلعى سايلاۋدىڭ ءبىر ەرەكشەلىگى – ساياسي دودا كەزەكتەن تىس وتكىزىلىپ وتىر. پارلامەنت ءماجىلىسىنىڭ ءVىىى شاقىرىلىمى بولىپ سانالاتىن سايلاۋ ماجوريتارلىق جانە پارتيالىق ءتىزىم بولىپ, ەكى جۇيەدە وتكىزىلەدى. قازىر دەپۋتاتتىققا كانديداتتاردىڭ تىركەلۋى رەسپۋبليكا بويىنشا تولىق اياقتالدى. استانا قالاسىندا №2 بىرمانداتتىق سايلاۋ وكرۋگى بويىنشا 42 ادام تىركەلدى. بۇل – رەسپۋبليكاداعى ەڭ جوعارى كورسەتكىش. وسىنىڭ ءوزى ازاماتتارىمىزدىڭ اراسىندا بۇرىن بولماعان بەلسەندىلىكتى كورسەتىپ وتىر. بىراق بۇل بىزگە قوسىمشا جاۋاپكەرشىلىك جۇكتەيدى, – دەدى ك.پەتروۆ.
ودان ءارى ك.پەتروۆ جاڭادان ەنگىزىلگەن ءتارتىپتى قاراستىرىپ, تۋىنداۋى مۇمكىن ماسەلەلەردى قالاي شەشۋگە بولاتىنىن تالقىلاۋ ءۇشىن كوشپەلى سەمينار-كەڭەس ۇيىمداستىرىلىپ وتىرعانىن ايتتى. سونداي-اق كوميسسيا توراعاسىنىڭ ورىنباسارى بيىلعى ناۋقاننىڭ قارجىلىق شىعىندارى بارىنشا اشىق بولاتىندىعى ەسكەرىلگەنىن جەتكىزدى. وسىعان بايلانىستى وسك-نىڭ وسى ماسەلە بويىنشا بارلىق سۇراققا جاۋاپ بەرۋگە ءازىر ەكەنىن دە اتاپ ءوتتى. سەمينار بارىسىندا بايقاۋشىلاردىڭ جۇمىسىنا ەنگىزىلگەن وزگەرىستەر, ۇەۇ قاتارىنان تىركەلەتىن بارلىق بايقاۋشىعا كەدەرگى بولمايتىنى تۋرالى دا ايتىلدى. سونىمەن قاتار وسك توراعاسىنىڭ ورىنباسارى بىرمانداتتىق سايلاۋ وكرۋگىنەن سايلانعان دەپۋتاتتى كەرى شاقىرىپ الۋ ءتارتىبى قايتا ەنگىزىلگەنىن ءتۇسىندىرىپ ءوتتى.
– ەگەر دەپۋتات ءوز مىندەتىن ورىندامادى دەگەن سايلاۋشىلار بولسا, ونى قايتا شاقىرىپ الۋ جونىندە باستاما كوتەرە الادى. ءبۇل ۇدەرىسكە جەكە ادامداردىڭ دا باستاماشى بولۋ مۇمكىندىگى قاراستىرىلعان, – دەدى ول.
جيىندا سايلاۋ كوميسسيالارىنىڭ ماتەريالدىق-تەحنيكالىق جاراقتاندىرىلۋى تۋرالى وبلىس اكىمى اپپاراتىنىڭ جەتەكشىسى ولجاس ىدىرىسوۆ باياندادى. سەمينار-كەڭەستىڭ سوڭىندا اۋماقتىق, اۋداندىق سايلاۋ كوميسسيالارىنىڭ مۇشەلەرى وزدەرىن تولعاندىرعان سۇراقتارعا جاۋاپ الدى.
پەتروپاۆل
