قازاقستاننىڭ امەريكا قۇراما شتاتتارىنداعى ەلشىلىگىنىڭ وكىلى ەلىمىزدىڭ ۇلتتىق مۋزەيىنە قۇندى XVIII عاسىردا جاسالعان قوبىزدى تاپسىردى.
اتالعان مۋزەيدىڭ ءباسپاسوز حاتشىسى ايگۇل ايتمۇحانوۆانىڭ ايتۋىنشا, اسپاپتى 1996 جىلى قازاقستاننان امەريكالىق تاريحشى, سازگەر, ۆاشينگتوندا ورتالىق ازيا جانە كاۆكاز ينستيتۋتىنىڭ نەگىزىن قالاعان فرەدەريك ستارر الىپ كەتكەن ەكەن.
ول قىلقوبىزدى كەشەگى 90-جىلداردىڭ قۇبىلمالى كەزەڭىندە قازاقستاننىڭ وڭتۇستىگىنە ساياحاتتاپ, تاراز قالاسىنان ولجالاعان. ەلدەگى كۇردەلى ەكونوميكالىق احۋالعا بايلانىستى قوبىزدىڭ قارت يەسى ۇيىندەگى جادىگەردى ساتۋعا مۇقتاج بولىپتى. جالپى, قىلقوبىز ءار ۇيدەن تابىلا بەرمەيتىن كيەلى اسپاپ ەمەس پە؟ ءۇش عاسىر بۇرىن جاسالعان قۇندى دۇنيەنىڭ بەيمالىم قاريادا بولۋى دا تەگىن ەمەس. بالكي, ءوزىنىڭ نەمەسە وتباسىنىڭ ونەرگە قاتىسى بار شىعار.
ساتىپ العان تاريحشى وعان قوبىزدى قايتسە دە قازاقستانعا قايتاراتىنىنا ۋادە بەرەدى. ءسويتىپ, اراعا شيرەك عاسىر سالىپ, 2019 جىلى فرەدەريك ستارر سوزىندە تۇرىپ, مۋزىكالىق اسپاپتى قازاقستاننىڭ اقش-تاعى ەلشىلىگىنە تاپسىرعان.
