كەزدەسۋدى اشا وتىرىپ, ينستيتۋت ديرەكتورى ەلىمىزدىڭ وڭىرلەرىندە بىلىكتى ماماندار جۇمىس ىستەيتىنىن اتاپ ءوتتى. ونىڭ ايتۋىنشا, جەرگىلىكتى ساراپشى وڭىردەگى احۋالدى تولىق سيپاتتاۋعا مۇمكىندىك بەرەتىن ماسەلەلەردى بىلەدى. قسزي الەۋمەتتىك كوڭىل كۇيدى باقىلاۋ ءۇشىن تۇراقتى نەگىزدە زەرتتەۋلەر جۇرگىزىپ وتىرادى. الايدا ينستيتۋتتىڭ وڭىردەگى تۇراقتى وكىلىنىڭ بولۋى شۇعىل اقپارات الۋعا جانە تالداۋعا مۇمكىندىك بەرەدى.
«قازىرگى تاڭدا ايماقتاردى زەرتتەۋ ماڭىزدى. ساپالى تالداۋ دۇرىس شەشىم قابىلداۋعا مۇمكىندىك بەرەدى. باتىس قازاقستاندا وزەكتى ماسەلەلەر بار. ولاردىڭ شەشۋ جولدارىن تابۋ كەرەك. دۇرىس يدەيالار حالىق اراسىندا تۋادى. حالىقتىڭ جاعدايىن بىلەتىن ساراپشىلار كەرەك. زاماناۋي زەرتتەۋلەردى كابينەتتە ەمەس, ايماقتاردا جۇرگىزۋ قاجەت», دەدى ينستيتۋت ديرەكتورى.
ونىڭ ايتۋىنشا, قسزي وڭىرلەردە الەۋمەتتىك كوڭىل كۇيدى باقىلاۋ ءۇشىن ۇنەمى مونيتورينگ جۇرگىزىپ وتىرادى.
ء«بىز شيەلەنىس نۇكتەلەرىنىڭ قاي جەردە پايدا بولاتىنىن كورىپ, پروبلەمالاردىڭ الدىن الۋ بويىنشا تالداۋ جاساپ, تۋىنداعان ماسەلەلەردى شەشۋ ءۇشىن ءوز ۇسىنىستارىمىزدى بەرەمىز. قىزمەتكەرلەرىمىز زەرتتەۋ جۇمىستارىن جۇرگىزۋ ءۇشىن ءتۇرلى ايماقتارعا بارىپ تۇرادى. الەۋمەتتانۋلىق ەكسپەديتسيالاردىڭ قورىتىندىسى بويىنشا وبلىستاردىڭ جاعدايى تۋرالى ەسەپتەر مەن جازبالار دايىندايدى. بۇل جۇمىستىڭ ءتيىمدى ەكەنىن كورىپ, ادىستەمەمىزدى رەسپۋبليكالىق دەڭگەيدە كەڭەيتۋدى ءجون كوردىك. بۇل قسزي-عا «ۇدايى دايىندىقتا» بولۋعا جانە ەل باسشىلىعىنا جەرگىلىكتى دەڭگەيدەگى ماسەلەلەردىڭ شەشىمدەرىن ۋاقتىلى ۇسىنۋعا مۇمكىندىك بەرەدى», دەدى ە.تۇقىموۆ.
جالپى, مۇنداي زەرتتەۋلەردى جۇرگىزۋ ءۇشىن وڭىرلەردە قسزي وكىلدەرى بولۋى قاجەت. ماسەلەن, جەرگىلىكتى ساراپشى جاعداي تۋرالى حاباردار جانە مەملەكەتتىك ورگانداردىڭ ءىس-شارالارىنا تىكەلەي قاتىسا الادى. جاعدايعا قانىق ساراپشىنىڭ تالداۋى باتىس قازاقستاندا بولىپ جاتقان ۇدەرىستەردى ەگجەي-تەگجەيلى زەردەلەۋگە مۇمكىندىك بەرەدى.
جۇبانوۆ ۋنيۆەرسيتەتىمەن بىرلەسىپ جۇزەگە اسىرىلىپ جاتقان بۇل شارا قسزي-دىڭ العاشقى تاجىريبەسى. 30 جىلدىق مەرەيتويى قارساڭىندا قسزي ىنتىماقتاستىقتىڭ جاڭا دەڭگەيىنە كوتەرىلۋدە. قسزي مەن جۇبانوۆ ۋنيۆەرسيتەتىنىڭ كادرلىق الەۋەتى مەن رەسۋرستارىن بىرىكتىرۋ ايماقتىق زەرتتەۋلەرگە سەرپىن بەرەدى. اقتوبەگە جۇمىس ساپار اياسىندا, سونىمەن قاتار «قسزي GPS. Gylym. Pikir. Sayasat» ساراپتاما الاڭىنىڭ «ايماقتىق زەرتتەۋ: قسزي جانە ۋنيۆەرسيتەت ىنتىماقتاستىعى» تاقىرىبىندا كەزەكتى وتىرىسى ءوتتى.
