ۇكىمەت باسشىسى شارانى اشا وتىرىپ, پرەزيدەنت قاسىم-جومارت توقاەۆتىڭ قۇتتىقتاۋ حاتىن وقىدى.
«سپورت شەكارا تالعامايدى, مەملەكەتتەر مەن حالىقتاردىڭ دوستىعىن نىعايتىپ, جاقىنداستىرا تۇسەدى. قازاقستان سپورت سالاسىنا ايرىقشا ءمان بەرەدى. ەلىمىزدە ازاماتتاردىڭ كاسىبي جانە بۇقارالىق سپورتپەن اينالىسۋى ءۇشىن بارلىق جاعداي جاسالعان. بۇل سالانىڭ ينفراقۇرىلىمىن دامىتۋعا كوپ كوڭىل بولىنەدى. 6 مىڭنان استام ادام سياتىن جەڭىل اتلەتيكا كەشەنى – وسىنىڭ ايقىن دالەلى. قازاقستان سپورتشىلارى كوپتەگەن ءدۇبىرلى دودادا توپ جارىپ, ەل ابىرويىن اسقاقتاتىپ ءجۇر. ولار وسكەلەڭ ۇرپاققا ۇلگى-ونەگە بولىپ, جاستاردى جارقىن جەڭىستەرگە باستايدى. ازيا بىرىنشىلىگىنىڭ استانا تورىندە ءوتۋى ەلىمىزدە جەڭىل اتلەتيكانى دامىتۋعا تىڭ سەرپىن بەرەدى دەپ سەنەمىن. ءبىز وسى سالاداعى حالىقارالىق ۇيىمدارمەن ىنتىماقتاستىقتى نىعايتا تۇسەمىز. بارشاڭىزعا زور دەنساۋلىق, تولاعاي تابىس تىلەيمىن!», دەلىنگەن مەملەكەت باسشىسىنىڭ قۇتتىقتاۋ حاتىندا.
جابىق الاڭ ىشىندەگى جەڭىل اتلەتيكادان ازيا چەمپيوناتى تمد ەلدەرىنىڭ اۋماعىندا العاش رەت وتكىزىلىپ وتىر. وعان 31 ەلدەن 500-دەن استام سپورتشى قاتىسادى. سپورتشىلار اراسىندا جۇگىرۋ, ەستافەتالىق جۇگىرۋ, ۇزىندىققا سەكىرۋ, بيىككە سەكىرۋ, ءۇش رەت سەكىرۋ, سىرىقپەن سەكىرۋ, يادرو لاقتىرۋ جانە كوپسايىس سياقتى جارىس تۇرلەرى بويىنشا 26 مەدال جيىنتىعى ساراپقا سالىنادى. قازاقستان ۇلتتىق قۇراماسىندا 69 سپورتشى بار.
حالىقارالىق جارىستار استانا قالاسىندا 10-12 اقپان ارالىعىندا وتەدى.
