ۇرپاقتار ساباقتاستىعى جالعاسقاندا ونەرى ماڭگى وشپەيدى دەيمىز. تۇرسىنبەك نۇرقاليەۆ قازاقستاندىق ارتىستەردىڭ تۇتاس شوعىرىن تاربيەلەپ, كاسىبي تاجىريبەسىن وسكەلەڭ ۇرپاققا ءسىڭىردى. ولاردىڭ قاتارىندا قازاقستاندىق ونەردى ەلىمىزدە جانە شەتەلدەردە ايگىلەپ جۇرگەن بيشىلەر – قازاقستاننىڭ ەڭبەك سىڭىرگەن قايراتكەرلەرى ءمادينا ونەرباەۆا, ايگەرىم بەكەتاەۆا, انەل رۇستەموۆا, باقتيار ادامجان, ەركىن راحماتۋللاەۆ, كوپتەگەن حالىقارالىق بايقاۋدىڭ لاۋرەاتتارى اسەل شايكەنوۆا, ارمان ورازوۆ, سەرىك ناقىسپەكوۆ, دانيار جۇماتاەۆ, باۋىرجان مەكەمباەۆتار بار. ەسكە الۋ كەشىندە تالانتتى تۇلعانىڭ كوزىن كورگەن, ءتالىمىن العان كوپشىلىك وي-پىكىرلەرىمەن ءبولىستى.
ايتا كەتەيىك, تۇرسىنبەك نۇرقاليەۆتىڭ ءوزىنىڭ ايرىقشا مانەرى بولاتىن. سوندىقتان ونىڭ جۇبايى, قازاقستاننىڭ ەڭبەك سىڭىرگەن قايراتكەرى عاليا بورىباەۆا كونتسەرت باعدارلاماسىن ايگىلى بالەتمەيستەردىڭ جۇمىس ىستەۋ قاعيداتى بويىنشا قۇردى. م.حەگەرتيدىڭ «حيكايا», گ.فورەنىڭ «پاۆانا», د.شوستاكوۆيچتىڭ «جول» سەكىلدى حورەوگرافيالىق كومپوزيتسيالارى, س.پروكوفەۆتىڭ «رومەو مەن دجۋلەتتا» بالەتىنەن دۋەت, ك.گليۋكتىڭ تانىمال «مەلوديا» دۋەتى باعدارلامانىڭ ءسانىن كەلتىردى. سونداي-اق بالەت كەشىندە پ.چايكوۆسكيدىڭ «ۇيقىداعى ارۋ», «ششەلكۋنچيك», ل.مينكۋستىڭ «دون كيحوت» بالەتتەرىنەن نومىرلەر, ب.اسافەۆتىڭ «باقشاساراي بۇرقاعى» بالەتىنەن «رومانس» پەن «تاتار ءبيى» اۋقىمدى ءنومىرى, ك.سەن-سانستىڭ ء«ولىم الدىنداعى اققۋ», ا.حاچاتۋرياننىڭ «سپارتاك», ۆ.سولوۆەۆ-سەدويدىڭ «گوپاك» جانە تاعى باسقالار ورىندالدى.
– تۇرسىنبەك ءابدىباي ۇلى تەك باسشى, ۇستاز عانا ەمەس, ول بالەت ارتىستەرىنىڭ بارلىعىنا قامقور اكە بولدى. الدىنا كومەك سۇراپ كەلگەن ءاربىر جانعا قولۇشىن بەرىپ, بالەتپەن اينالىسىپ جۇرگەن جاستاردىڭ تەك تەاتردا عانا ەمەس, ودان تىس جەرلەردە دە وزدەرىن جايلى سەزىنۋىنە قولدان كەلگەننىڭ ءبارىن جاسادى. ول ەلوردانىڭ قالىپتاسۋ كەزەڭىندە كۇردەلى جاعدايلاردا جۇمىس ىستەۋگە كەلىسكەن ساناۋلى ازاماتتاردىڭ ءبىرى بولدى. ارتىستەرمەن بىرگە جاتاقحانادا تۇردى. ونىڭ قالتقىسىز ەڭبەك ەتۋىنىڭ ناتيجەسىندە استانادا اكادەميالىق بالەت پايدا بولدى, – دەپ ەسكە الدى باقتيار ادامجان.
