Polisia.kzء مالىم ەتكەندەي, 8 اقپان كۇنى ساعات 18:00 شاماسىندا كوكشەتاۋ قالاسىنداعى جاتاقحانالاردىڭ بىرىندە بولعان وقيعادان كەيىن ەر ادام پوليتسيا بەكەتىنە كەلىپ, اۋىر قىلمىس جاساعانىن مويىندادى.
ەكى ادامدى ءولتىرۋ فاكتىسى بويىنشا پوليتسەيلەر قر قك-ءنىڭ 99-بابى 2-بولىگى (ادام ءولتىرۋ) بويىنشا سوتقا دەيىنگى ءىس جۇرگىزۋدى باستادى.
«ماتەريالداردى العاشقى جيناۋ بارىسىندا كۇدىكتى مەن ونىڭ ەكى تانىسى, 87 جاستاعى ەر ادام مەن 55 جاستاعى ايەلدىڭ ىشىمدىك ىشكەندەرى انىقتالدى. وتىرىس بارىسىندا ەرلەر اراسىندا جانجال تۋىنداپ, ناتيجەسىندە كۇدىكتى ەگدە جاستاعى ەر ادامعا, سودان كەيىن ايەلگە بىرنەشە رەت پىشاق سالعان. كەيىن قىلمىس قۇرالىنان قۇتىلىپ, كۇدىكتىنىڭ ءوزى «102» ارنايى جەلىسىنە قوڭىراۋ شالىپ, جاقىن ماڭداعى پوليتسيا بەكەتىنە كەلگەن», دەلىنگەن حابارلامادا.
سوتقا دەيىنگى تەرگەۋ اياسىندا پوليتسەيلەر ەر ادامنىڭ وسىعان ۇقساس قىلمىسى ءۇشىن بۇرىن ءىستى بولعانىن انىقتادى. ول 2008 جىلى ادام ولتىرگەنى ءۇشىن 8 جىلعا باس بوستاندىعىنان ايىرىلعان. كەيىن ول اقمولا وبلىسى مەن كوكشەتاۋ قالاسىنىڭ اۋماعىندا تۇرعان.
تەرگەۋ كەزەڭىندە قىلمىسكەر ۇستالىپ, ۋاقىتشا ۇستاۋ يزولياتورىنا قامالدى.
