وڭىرلەردە كوكونىستەرگە تاۋارلىق ينتەرۆەنتسيالار باستالادى

2023 جىلعى 8 اقپاندا پرەمەر-ءمينيستردىڭ ورىنباسارى – ساۋدا جانە ينتەگراتسيا ءمينيسترى سەرىك جۇمانعاريننىڭ توراعالىعىمەن وتكەن جەدەل كەڭەستە اكىمدىكتەرگە الەۋمەتتىك ماڭىزى بار كوكونىس قورلارىنا بروندى الىپ تاستاۋ سحەماسى ۇسىنىلدى. ساۋدا جانە ينتەگراتسيا ءبىرىنشى ۆيتسە-ءمينيسترى ارمان شاققاليەۆ ايتقانداي، وسى اپتادا وڭىرلىك كوميسسيالار، ءبىرىنشى كەزەكتە پيازعا، ودان كەيىن سابىز، كارتوپ، قىرىققابات بويىنشا، كولەمدەرىن، باعاسىن، شارتتارى مەن ساۋدا نۇكتەلەرىن ايقىنداي وتىرىپ، تاۋارلىق ينتەرۆەنتسيالاردى وتكىزۋ تۋرالى شەشىم قابىلداۋى ءتيىس. باقىلاۋ-كاسسالىق اپپاراتتاردى پايدالانۋ مىندەتتى بولۋى قاجەت. تاۋار ينتەرۆەنتسيالارىنىڭ ۇزاقتىعى – اقپاننان ساۋىرگە دەيىن. نەگىزگى شارتتاردىڭ ءبىرى – بولشەك ساۋدا باعاسى قول قويىلعان كەلىسىم-شارتتار شەڭبەرىندە بولۋى كەرەك.

اۋىل شارۋاشىلىعى ۆيتسە-ءمينيسترى باعلان بەكباۋوۆ جاريالاعان اكىمدىكتەردىڭ ناقتىلانعان دەرەكتەرىنە سايكەس، ەل بويىنشا پياز قورىنىڭ دەڭگەيى 130%، كارتوپ 118%، ءسابىز 103%، قىرىققابات 74%-دى قۇرايدى. اۋىل شارۋاشىلىعى مينيسترلىگى وڭىرلەرگە ساتىپ الۋ ءۇشىن ۇسىنعان قورلاردىڭ دەڭگەيى ماۋسىمارالىق قاجەتتىلىكتەن ەسەپتەلگەنىن اتاپ ءوتۋ ماڭىزدى، بۇل قالا حالقىنىڭ 4 ايلىق تۇتىنۋىنىڭ 30%-ىن قۇرايدى. وسىلايشا، ايماقتار كوكونىستەردىڭ قورلارىن برونداۋدى باستاي الادى.

«پرەمەر-مينيستر نەگىزگى ازىق-ت ۇلىك باعاسىنا قاتىستى جاعدايدى تۇراقتاندىرۋ جونىندە ناقتى تاپسىرما بەردى. ۇكىمەتتىڭ ۇسىنىستارى بار، ەڭ باستىسى – ءتارتىپ پەن ورىنداۋ تالاپ ەتىلىپ جاتىر. قىرىققابات بويىنشا ءوز قورلارىن ءالى قامتاماسىز ەتپەگەن ايماقتار ءۇشىن قىرعىزستاندا ارزان باعامەن كەلىسىمشارت جاساۋدى ۇسىنامىن، ءبىز «Qaztrade» اق ارقىلى قولداۋ كورسەتە الامىز. وسى ۋاقىتتا كوكونىس قورلارىن برونداۋدى دەرەۋ باستاڭىزدار»، دەدى ساۋدا جانە ينتەگراتسيا ءمينيسترى سەرىك جۇمانعارين.