2023 جىلدىڭ III توقسانىنا دەيىن جول ءجۇرۋ بيلەتى جوق بالالاردى قوعامدىق كولىكتەن تۇسىرۋگە زاڭمەن تىيىم سالۋ ماسەلەسى رەتتەلەدى. اتالعان شاراعا بيۋدجەتتەن قاراجات بولىنبەيدى. بۇل تۋرالى وقۋ-اعارتۋ مينيسترلىگى ءبىلىم سالاسىندا ساپانى قامتاماسىز ەتۋ كوميتەتىنىڭ 2023-2025 جىلدارعا ارنالعان كەشەندى جوسپارىندا جازىلعان.
بۇل رەتتە كامەلەت جاسىنا تولماعان بالالاردىڭ قازا بولۋىنا نەمەسە جاراقاتتانۋىنا اكەپ سوققان جازاتايىم وقيعالاردىڭ بىرىڭعاي ستاتيستيكالىق ەسەبى ازىرلەنەدى.
«بالالاردىڭ قۇقىقتارىن قورعاۋ سالاسىنداعى ۋاكىلەتتى ورگاننىڭ جانىنان كامەلەتكە تولماعانداردىڭ ءىسى جانە ولاردىڭ قۇقىقتارىن قورعاۋ جونىندەگى ۆەدومستۆوارالىق كوميسسيا قۇرىلادى. وعان قوسا, جول ءجۇرۋ قۇجاتى جوق بالالاردى اۆتوبۋستان تۇسىرۋگە تىيىم سالۋ ماسەلەسى رەتتەلەدى», دەلىنگەن كەشەندى جوسپار ماتىنىندە.
مينيسترلىك ناقتىلاعانداي, بالالاردى قورعاۋعا باعىتتالعان بىرقاتار شارا كەلەسى ناتيجەلەرگە قول جەتكىزۋگە مۇمكىندىك بەرەدى:
- بالالارعا قاتىستى زورلىق-زومبىلىق سيپاتتاعى قىلمىستار 2%-عا ازايادى;
- كامەلەت جاسىنا تولماعاندار اراسىندا سۋيتسيد جاساۋ نەمەسە وقتالۋ 1,5%-عا تومەندەيدى;
- جىل سايىن قوسىمشا بىلىممەن قامتىلاتىن بالالار سانى 5%-عا ارتادى;
- توتەنشە جاعداي, جول-كولىك وقيعاسى جانە باسقا دا جازاتايىم وقيعادان كوز جۇماتىن بالالار سانى ازايادى;
- بالالاردىڭ قۇقىقتارىن قورعاۋ سالاسىنداعى مەملەكەتتىك ورگانداردىڭ ۆەدومستۆوارالىق ءوزارا ءىس-قيمىلىنىڭ تيىمدىلىگى ارتادى.
