باس رەداكتورلار كلۋبىنىڭ باسشىلىق قۇرامى سايلاندى

«باس رەداكتورلار كلۋبى» – 2007 جىلى قۇرىلعان جانە قۇرامىنا قازاقستاننىڭ 250-دەن استام بۇقارالىق اقپارات قۇرالدارىنىڭ باس رەداكتورلارى مەن جەتەكشىلەرى كىرەتىن ەرىكتى قوعامدىق بىرلەستىك. باس رەداكتورلار كلۋبىنىڭ نەگىزگى ماقساتى – مەملەكەتتە شىعارماشىلىق اتموسفەراسىن نىعايتۋ، بۇقارالىق اقپارات قۇرالدارى اراسىندا ءتيىمدى باسەكەلەستىكتى نىعايتۋ، قوعامدا ۇلتارالىق كەلىسىم مەن تۇراقتىلىقتى نىعايتۋ.

كونفەرەنتسيا بارىسىندا كلۋبتىڭ قۇرىلعان كۇنىنەن باستاپ اتقارعان جۇمىسىنا شولۋ جاسالىپ، ەسەپتى كەزەڭدە ۇيىمداستىرعان ءىس-شارالارى تۋرالى بەلگىلى جۋرناليست، مەديامەنەدجەر، پارلامەنت سەناتىنىڭ دەپۋتاتى، ۇلتتىق قۇرىلتاي توراعاسىنىڭ ورىنباسارى، «باس رەداكتورلار كلۋبى» قوعامدىق بىرلەستىگىنىڭ پرەزيدەنتى بيبىگۇل جەكسەنباي باياندادى. باسقوسۋعا قاتىسقان ارىپتەستەردىڭ سۇراقتارىنا جاۋاپ قايتارىپ، كلۋب مۇشەلەرىنىڭ ۇسىنىس-پىكىرلەرى تىڭدالدى.

ەسەپ بەرۋ-سايلاۋ كونفەرەنتسياسى سوڭىندا قوعامدىق بىرلەستىكتىڭ جاڭا قۇرامداعى باسقارما مۇشەلەرى مەن جاڭا اتقارۋشى ديرەكتورى سايلاندى. باس رەداكتورلار كلۋبىنىڭ پرەزيدەنتى بولىپ بيبىگۇل جەكسەنباي قايتادان سايلانىپ،  كلۋبتىڭ اتقارۋشى ديرەكتورى  بولىپ حالىقارالىق تەلەۆيدەنيە جانە راديو اكادەمياسىنىڭ اكادەميگى، بەلگىلى جۋرناليست ماحات سادىقتىڭ كانديداتۋراسى بىراۋىزدان قولداۋ تاپتى. 

«باس رەداكتورلار كلۋبى» قوعامدىق بىرلەستىگىنىڭ جاڭا قۇرامداعى باسقارما مۇشەلەرى – ۆيتسە پرەزيدەنتتەرى:

1. مۇراتبەك توقتاعازين - رەسپۋبليكالىق  «ادىلەت.رۋحاني جاڭعىرۋ»  گازەتىنىڭ باس رەداكتورى، پروفەسسور;
2. ىسقاق ەگەمبەرديەۆ - «ايقىن-ليتەر» جشس ديرەكتورى، Phd دوكتور ;
3. قامبار احمەتوۆ – جۋرناليست، «قازاق گازەتتەرى» جشس باس ديرەكتورىنىڭ ورىنباسارى;
4. مارات باشيموۆ – قوعام قايراتكەرى، «چەلوۆەك ي زاكون»  گازەتىنىڭ باس رەداكتورى;
5. دوعان يىلدىز – جۋرناليست، «kazaknews.kz» جانە «kazakistan.kz» اقپاراتتىق اگەنتتىكتەرىنىڭ جەتەكشىسى.

كونفەرەنتسيا جۇمىسى بارىسىندا اقپارات جانە قوعامدىق دامۋ مينيسترلىگىنىڭ اقپارات كوميتەتىنىڭ توراعاسى مىندەتىن اتقارۋشى نۇرلىبەك جەڭىسبەك ۇلى  ءسوز سويلەپ، اقپاراتتىق كەڭىستىكتە ارىپتەستىكپەن جۇمىس ىستەۋگە دايىن ەكەندىكتەرىن ءبىلدىردى.