مۇحتار تىلەۋبەردى رەسمي ساپارمەن باحرەين كورولدىگىنە باردى

باحرەين تاراپى قازاقستاننىڭ سىرتقى ساياسي ۆەدومستۆوسى باسشىسىنىڭ ساپارىنا ەرەكشە ءمان بەردى. ءمينيستردى باحرەين كورولى حاماد بەن يسا ءال-حاليفا قابىلداپ، وعان قر پرەزيدەنتى قاسىم-جومارت توقاەۆتىڭ اتىنان جىلى لەبىزدەرى مەن تىلەكتەرىن جەتكىزدى.

م.تىلەۋبەردى سۇحباتتاسىن قازاقستاننىڭ ساياسي جانە ەكونوميكالىق جاڭعىرۋىنىڭ جاڭا كەزەڭىمەن تانىستىردى. ءوز كەزەگىندە كورول ەلىمىزدىڭ قازىرگى دامۋ قارقىنىن جوعارى باعالاپ، قازاقستان حالقىنىڭ يگىلىگى ءۇشىن جۇرگىزىلىپ جاتقان پرەزيدەنت رەفورمالارىنا قولداۋ ءبىلدىردى.

قازاقستان-باحرەين ساياسي ءوزارا ءىس-قيمىلىنىڭ دامۋ سەرپىنىن ەسكەرە وتىرىپ، تاراپتار ديالوگتى جوعارى دەڭگەيدە جالعاستىرۋدىڭ ماڭىزدىلىعىن اتاپ ءوتتى. ساۋدا-ەكونوميكالىق بايلانىستاردى كەڭەيتۋ ماقساتىندا كولىكتىك-لوگيستيكالىق ماسەلەلەردى شەشۋ ءۇشىن بىرلەسكەن كۇش-جىگەر جۇمساۋعا كەلىستى. سونداي-اق الەمدەگى حالىقارالىق جاعداي، وڭىرلىك جانە جاھاندىق قاۋىپسىزدىك ماسەلەلەرى بويىنشا پىكىر الماسۋ بولدى.

پرەمەر-ءمينيستردىڭ ورىنباسارى حاليد بين ابدۋللا ءال-حاليفامەن كەلىسسوزدەر بارىسىندا تاراپتار ءتۇرلى سالالارداعى ەكىجاقتى ىنتىماقتاستىقتى تەرەڭدەتۋ جولدارىن قاراستىردى. قازاقستاندىق تاراپ باحرەين تاياۋ شىعىستاعى ەلىمىزدىڭ ماڭىزدى سەرىكتەسى ەكەنىن اتاپ ءوتتى.

ء«وزارا ساياسي قولداۋدىڭ ارقاسىندا ءبىز قازىر ءوزارا سەنىم مەن بەلسەندى ىنتىماقتاستىققا نەگىزدەلگەن دوستىق قارىم-قاتىناستامىز»، دەدى م.تىلەۋبەردى. 

تاراپتار ەكى ەلدىڭ ءوزارا ءىس-قيمىلىنىڭ جوعارى دەڭگەيىن وڭ باعالادى، بۇل رەتتە ساۋدا-ەكونوميكالىق سالاداعى قولدا بار الەۋەت تولىق كولەمدە پايدالانىلمايتىنىن اتاپ ءوتتى. وسىعان بايلانىستى قازاقستان مەن باحرەين اراسىنداعى ىنتىماقتاستىقتىڭ جول كارتاسىن ازىرلەۋ تۋرالى كەلىسىم جاسالدى. وندا ودان ءارى ءوزارا ءىس-قيمىلدىڭ ناقتى باعىتتارى كورسەتىلەدى.

سىرتقى ىستەر ءمينيسترى ابدۋللاتيف بەن راشيد ءال-زايانيمەن كەزدەسۋ بارىسىندا ساياسي، ساۋدا-ەكونوميكالىق، ينۆەستيتسيالىق جانە مادەني-گۋمانيتارلىق سالالارداعى ەكىجاقتى قاتىناستاردىڭ بارلىق ماسەلەلەرى تالقىلاندى. مينيسترلەر ءوزارا قىزىعۋشىلىق تۋدىراتىن ايماقتىق جانە حالىقارالىق ماسەلەلەر بويىنشا پىكىر الماستى. «ورتالىق ازيا – شىعاناق اراب مەملەكەتتەرىنىڭ ىنتىماقتاستىق كەڭەسى» ديالوگتىق پلاتفورماسى شەڭبەرىندە وڭىرارالىق كووپەراتسياعا ەرەكشە نازار اۋدارىلدى.

باحرەين تاراپى ەكىجاقتى قاتىناستار تاريحىنداعى قازاقستان ءسىم باسشىسىنىڭ باحرەينگە العاشقى رەسمي ساپارىن وڭ باعالاپ، ونىڭ بارلىق سالالارداعى ىنتىماقتاستىقتى ودان ءارى ارتتىرۋعا قوسىمشا سەرپىن بەرەتىنىنە سەنىم ءبىلدىردى.

ساپار باعدارلاماسى باحرەيننىڭ ساۋدا-ونەركاسىپ پالاتاسىنداعى كەلىسسوزدەرمەن اياقتالدى. ءسوپ توراعاسى سامير ناسس جانە باحرەين بيزنەس توپتارىنىڭ وكىلدەرىمەن ساۋدا-ەكونوميكالىق جانە ينۆەستيتسيالىق بايلانىستاردى جانداندىرۋ جولدارى، سونداي-اق «استانا» حالىقارالىق قارجى ورتالىعى مەن باحرەيننىڭ حالىقارالىق يسلام قارجى نارىعى اراسىنداعى ىنتىماقتاستىق قارالدى. بيزنەسمەندەر اراسىنداعى تىكەلەي بايلانىستاردى ىنتالاندىرۋ جانە ىنتىماقتاستىقتىڭ پەرسپەكتيۆالى سالالارىن ايقىنداۋ ءۇشىن ەكى ەل اراسىندا ىسكەرلىك كەڭەس قۇرۋ تۋرالى كەلىسىم جاسالدى.

كەلىسسوزدەر قورىتىندىسى بويىنشا تاراپتار ءوزارا ساۋدانى كەڭەيتۋگە جانە ينۆەستيتسيالار كولەمىن ۇلعايتۋعا، سونداي-اق ەكونوميكانىڭ ءتۇرلى سەكتورلارىندا كووپەراتسيانى دامىتۋعا باعىتتالعان ءوزارا ءىس-قيمىلدى جالعاستىرۋعا ۋاعدالاستى.