يسلامبەك سالجانوۆتىڭ ايتۋىنشا, كوكپار, جامبى اتۋ, اۋدارىسپاق, تەڭگە ءىلۋ, بايگە, قۇسبەگىلىك, ءداستۇرلى ساداق اتۋ, توعىزقۇمالاق جانە اسىق اتۋ سەكىلدى ۇلتتىق سپورت تۇرلەرىنىڭ فەدەراتسيالارى قاۋىمداستىق اياسىنا بىرىكتىرىلدى. سونىمەن قاتار ۇلتتىق سپورتتىڭ دامۋىنا ساراپتاما جاسالىپ, جەكە-جەكە رەسپۋبيكالىق فەدەراتسيالارمەن ينستيتۋتسيونالدىق تۇرعىدا جۇمىس جۇرگىزىلە باستاعان.
ونىڭ ايتۋىنشا, 2024 جىلى V دۇنيەجۇزىلىك كوشپەندىلەر ويىندارىن وتكىزۋگە بەرگەن قازاقستاننىڭ ءوتىنىمىن بىلتىر قىركۇيەك ايىندا بۇكىلالەمدىك ەتنوسپورت كونفەدەراتسياسى ءبىراۋىزدان قولدادى.
كەزدەسۋ بارىسىندا قاسىم-جومارت توقاەۆ كەلەسى جىلى ەلىمىزدە وتەتىن اۋقىمدى ءىس-شارانى ساپالى ءارى جوعارى دەڭگەيدە ۇيىمداستىرۋ جونىندە ناقتى تاپسىرمالار بەردى.
مەملەكەت باسشىسىنىڭ ايتۋىنشا, V دۇنيەجۇزىلىك كوشپەندىلەر ويىندارى ۇلتتىق سپورت شارالارىمەن شەكتەلىپ قالماۋى كەرەك. اتالعان حالىقارالىق سپورت سايىسى قولونەر, تۋريزم, قىزمەت كورسەتۋ سالاسى سياقتى شاعىن جانە ورتا بيزنەس وكىلدەرى ءۇشىن دە ءتيىمدى ۇيىمداستىرىلىپ, كاسىپتەرىن ىلگەرلەتۋگە جاعداي جاسالۋى قاجەت.
كەزدەسۋ سوڭىندا پرەزيدەنت ۇلتتىق سپورت تۇرلەرىنىڭ دامۋ تۇجىرىمداماسىن ازىرلەۋ قاجەت ەكەنىن جانە ات سپورتى ويىندارىنداعى قاۋىپسىزدىك ماسەلەسىن قاراستىرۋدى تاپسىردى.
