ۇكىمەتتە اگروونەركاسىپتى دامىتۋدىڭ جوباسى قارالدى

اۋىل شارۋاشىلىعى ءمينيسترى ەربول قاراشوكەەۆ قۇجاتتىڭ الداعى جىلدارى وتاندىق اگروونەركاسىپتىك كەشەنى سالاسىنا اسەر ەتەتىن جاھاندىق سىن-قاتەرلەر مەن الەمدىك ترەندتەر، سونداي-اق بيزنەس پەن ساراپشىلاردىڭ ۇسىنىستارى ەسكەرىلە وتىرىپ ازىرلەنگەنىن اتاپ ءوتتى.

تۇجىرىمدامانىڭ نەگىزگى مىندەتتەرى: سالادا ەڭبەك ونىمدىلىگىن 2 ەسەگە ارتتىرۋ، اۋىل شارۋاشىلىعى ونىمدەرىنىڭ ەكسپورتىن 3 ەسەگە ۇلعايتۋ، سونداي-اق بارلىق ازىق-ت ۇلىك تاۋارلارى بويىنشا ءوزىن-ءوزى قامتاماسىز ەتۋدى كەمىندە 90%-عا جەتكىزۋ. سونىمەن قاتار اۋىل شارۋاشىلىعىنىڭ نەگىزگى كاپيتالىنا تارتىلعان ينۆەستيتسيا كولەمىن ورتا ەسەپپەن 2،5 ەسەگە ارتتىرۋ جوسپاردا بار.

اتاپ ايتقاندا، تۇقىم ساتىپ الۋدى سۋبسيديالاۋ جانە تۇقىم شارۋاشىلىقتارىن جاڭعىرتۋ ەسەبىنەن بيداي ونىمدىلىگىن 20 تس/گا دەيىن ارتتىرۋ جونىندە شارالار قابىلدانادى. سۋارمالى جەرلەر اۋماعىن اتالعان مەرزىمدە 3 ملن گەكتارعا، ال مينەرالدى تىڭايتقىشتاردى ەنگىزۋ دەڭگەيىن 40%-عا جەتكىزۋ جوسپارلانۋدا. بۇل رەتتە اۋىل شارۋاشىلىعى تەحنيكاسىن جاڭارتۋ قارقىنى جەڭىلدىكتى ليزينگ پەن باسقا دا مەملەكەتتىك قولداۋ شارالارىنىڭ ارقاسىندا 7%-عا جەتۋى ءتيىس. 

«وسى ينديكاتورلارعا قول جەتكىزۋ ءۇشىن دارا داقىلدى ەگىستەن باس تارتىپ، عىلىمي نەگىزدەلگەن اۋىسپالى ەگىستەردى ساقتاۋ، سونداي-اق وندىرىسكە زاماناۋي رەسۋرس ۇنەمدەۋشى تەحنولوگيالاردى ەنگىزۋ قاجەت. تۇقىم شارۋاشىلىعىن دامىتۋ بويىنشا ارنايى كەشەندى جوسپار ازىرلەنىپ جاتىر، ونىڭ اياسىندا عىلىمي ۇيىمداردى سەلەكتسيانىڭ زاماناۋي ادىستەرىنە كوشىرۋ جۇمىستارى باستالدى. تۇقىم شارۋاشىلىقتارىنىڭ ۇيلەسىمدى جۇيەسى قۇرىلىپ وتىر، ونىڭ نەگىزگى سۋبەكتىلەرى ءبىزدىڭ ۇاعبو عىلىمي جانە تاجىريبەلىك شارۋاشىلىقتارى بولادى»، دەدى اۋىل شارۋاشىلىعى ءمينيسترى. 

جەر رەسۋرستارىن باسقارۋدىڭ تيىمدىلىگى مەن اشىقتىعىن ارتتىرۋ ءۇشىن اۋىل شارۋاشىلىعى جەرلەرىنىڭ بىرىڭعاي تسيفرلىق پلاتفورماسىن ىسكە قوسۋ، ۋچاسكەلەردى رەسىمدەۋ پروتسەسىن اۆتوماتتاندىرۋ، سونداي-اق پايدالانىلمايتىن جەرلەردى انىقتاۋ جانە اينالىمعا تارتۋ جونىندەگى جۇمىستى جالعاستىرۋ كوزدەلگەن. 

مال شارۋاشىلىعىندا سەلەكتسيانىڭ زاماناۋي ادىستەرىن ەنگىزۋگە، جەمشوپ ءوندىرىسىن ىنتالاندىرۋعا، جايىلىم ينفراقۇرىلىمىن دامىتۋعا جانە جالپى اۋىل شارۋاشىلىعى جانۋارلارىنىڭ سانىن كوبەيتۋگە باسا نازار اۋدارىلادى.

وتاندىق ءونىم ەكسپورتىنىڭ كولەمىن ارتتىرۋ ماقساتىندا شەتەلدىك جەتكىزۋشىلەر تىزىلىمدەرىندە قازاقستاندىق كاسىپورىنداردىڭ تىزبەسىن كەڭەيتۋ بويىنشا جۇمىس جۇرگىزىلەدى. بۇل ەكسپورتتى $9،9 ملرد-قا دەيىن ۇلعايتۋعا مۇمكىندىك بەرەدى. جالپى، 2030 جىلعا دەيىن اۋىل شارۋاشىلىعىنىڭ بارلىق سالالارىندا جالپى قۇنى 4،5 ترلن تەڭگەنى قۇرايتىن 1،7 مىڭنان استام ينۆەستيتسيالىق جوبانى ىسكە اسىرۋ كوزدەلگەن، بۇل رەسپۋبليكانىڭ ەكسپورتتىق الەۋەتىن ەداۋىر ارتتىرادى.  

اگرارلىق عىلىمعا كەلەتىن بولساق، وندىرىسكە قولدانبالى ازىرلەمەلەردى ەنگىزۋمەن جانە ولاردى كوممەرتسيالاندىرۋمەن بايلانىستى پروبلەمالاردى شەشۋ، سونداي-اق دامىعان ەلدەردىڭ تاجىريبەسى بويىنشا ءبىلىمدى تاراتۋدىڭ زاماناۋي ۇلتتىق جۇيەسىن قۇرۋ جوسپارلاندى.

«اگرارلىق عىلىمدى باعدارلامالىق-ماقساتتى قارجىلاندىرۋدى جىل سايىن ۇلعايتۋ، جاس عالىمدار ءۇشىن سالالىق گرانتتىق قارجىلاندىرۋدى ەنگىزۋ كوزدەلىپ وتىر. ناتيجەسىندە اوك-تە ەنگىزىلگەن عىلىمي ازىرلەمەلەردىڭ ۇلەسى 14،5%-دان 40%-عا دەيىن ۇلعايۋى ءتيىس»، دەدى ەربول قاراشوكەەۆ.

جالپى، تۇجىرىمدامانى ىسكە اسىرۋ ىشكى نارىقتى وتاندىق ءوندىرىستىڭ ازىق-ت ۇلىك تاۋارلارىمەن مولايتۋعا، 70 مىڭعا جۋىق شارۋاشىلىق پەن شامامەن 400 مىڭ جۇمىس ورنىن قۇرۋعا مۇمكىندىك بەرەدى.