قازاقستان مەن ەستونيا ەكىجاقتى ىنتىماقتاستىقتى كەڭەيتۋگە مۇددەلى

كەزدەسۋ بارىسىندا تاراپتار ەلدەر اراسىنداعى ساياسي، ساۋدا-ەكونوميكالىق جانە مادەني-گۋمانيتارلىق سالالارداعى ىنتىماقتاستىقتى ودان ءارى دامىتۋ جولدارىن تالقىلادى.

ر.ۆاسيلەنكو ەۋروپالىق سەرىكتەستەردى ەلدەگى ساياسي جانە الەۋمەتتىك-ەكونوميكالىق رەفورمالاردىڭ ىسكە اسىرىلۋ بارىسى، قر پارلامەنتى ءماجىلىسى دەپۋتاتتارىنىڭ الداعى سايلاۋعا دايىندىعى تۋرالى جانە حالىقارالىق ۇيىمدار مەن شەتەلدىك سايلاۋ كوميسسيالارى وكىلدەرىنىڭ، ونىڭ ىشىندە ەستونيانىڭ رەسپۋبليكالىق سايلاۋ كوميسسياسىنىڭ توراعاسى اتىنا جولدانعان شاقىرۋلار جىبەرىلگەنى تۋرالى حاباردار ەتتى.

قازاقستان مەن ەستونيا تۇراقتى ساياسي ديالوگتى جانە ەكى ەل باسشىلىعىنىڭ ءوزارا ساپارلارى ارقىلى ىنتىماقتاستىقتى ودان ءارى كەڭەيتۋگە قىزىعۋشىلىق تانىتتى.

ساۋدا-ەكونوميكالىق جانە ينۆەستيتسيالىق ىنتىماقتاستىق جوسپارلى تۇردە دامىپ كەلەدى. ەكىجاقتى ءوزارا ءىس-قيمىلدىڭ باسىم باعىتتارى ىشىندە – كولىك، لوگيستيكا، تسيفرلاندىرۋ جانە جاسىل ەكونوميكا. 2022 جىلى ەلدەر اراسىنداعى تاۋار اينالىمى 121،9 ملن اقش دوللارىنا جەتكەن. 2021 جىلدىڭ سايكەس كەزەڭىمەن سالىستىرعاندا ول 6،4 ەسە ءوستى. قازىرگى ۋاقىتتا قازاقستاندا ءوز قىزمەتىن 73 ەستوندىق كومپانيا جۇزەگە اسىرادى. ساۋدا-ەكونوميكالىق بايلانىستاردى دامىتۋ جولىندا ەكونوميكالىق جانە عىلىمي-تەحنيكالىق ىنتىماقتاستىق جونىندەگى قازاقستان-ەستونيا ۇكىمەتارالىق كوميسسياسى ماڭىزدى ءرول اتقارادى.

قر ءسىم ەۋروپا دەپارتامەنتىنىڭ ديرەكتورى ولجاس سۇلەيمەنوۆ تەڭ توراعالىق ەتكەن ساياسي كونسۋلتاتسيالار شەڭبەرىندە تاراپتار قازاقستان مەن ەستونيانىڭ ەكىجاقتى جانە كوپجاقتى فورماتتا دا ءوزارا ءىس-قيمىلدى ەگجەي-تەگجەيلى تالقىلادى. شارتتىق-قۇقىقتىق بازانى ودان ءارى كەڭەيتۋ، پارلامەنتارالىق ىنتىماقتاستىق پەن حالىقارالىق ۇيىمدار شەڭبەرىندەگى ءوزارا ءىس-قيمىلدى جانداندىرۋ ماسەلەلەرى بويىنشا پىكىر الماستى.

كەلىسسوزدەر قورىتىندىسى بويىنشا تاراپتار ەكىجاقتى قاتىناستاردىڭ بارلىق سپەكترى بويىنشا ىنتىماقتاستىقتى ودان ءارى كەڭەيتۋگە دايىن ەكەندىگىن راستادى.