ەلىمىزدە پويىزداردىڭ كەشىگۋى جولاۋشىلار اراسىندا دۇربەلەڭ تۋدىرىپ، كوپشىلىكتى تولعاندىرعان باستى ماسەلەلەر قاتارىنا شىقتى. جاڭا جىل الدىنداعى 3-4 ساعاتقا كەشىگۋ قازىر اينالايىن بولىپ قالعان. 2023 جىل باستالا سالىسىمەن بىرقاتار باعىت بويىنشا پويىزدار استاناعا 10-12 ساعاتقا كەشىگىپ كەلىپ جاتتى. جەكەلەگەن ادامداردىڭ كۋالىگى مەن الەۋمەتتىك جەلىدەگى جازبالاردان اڭعارعانىمىز – وزگە وڭىرلەردەگى احۋال دا وڭىپ تۇرعان جوق.
وسىلايشا، ۆوكزال مەن ۆاگوندارداعى ءتيىستى ينفراقۇرىلىم، جولسەرىكتەر مەن باسقا دا قىزمەت كورسەتۋشى پەرسونالداردىڭ ەتيكاسى، نەگىزسىز وسكەن بيلەت باعاسى سەكىلدى اسا وتكىر پروبلەمالار ەكىنشى پلانعا ەرىكسىز ىسىرىلدى. «قازاقستان تەمىر جولى» ۇلتتىق كومپانياسى ءبىزدىڭ سۇراعىمىزعا بەرگەن جاۋابىندا كەشىگۋگە نەگىزگى ءۇش سەبەپتى اتاپ كورسەتىپتى.
ۇلتتىق كومپانيانىڭ حابارلاۋىنشا، قازاقستان تەمىرجول جەلىسىندە 139 جولاۋشىلار (ونىڭ ىشىندە 15 حالىقارالىق) جانە قالا ماڭىنا قاتىنايتىن پويىزدار جۇرەدى. «قوزعالىس قاۋىپسىزدىگىن قامتاماسىز ەتۋ ماقساتىندا جۇك ۆاگوندارىنىڭ رەلستەن شىعىپ كەتۋىنە، اۋا رايىنىڭ قولايسىزدىعىنا، سونداي-اق جوسپارلى تەمىرجول جەلىسىنىڭ جوندەۋ جۇمىستارىنا بايلانىستى تەمىرجول ۋچاسكەلەرىنىڭ وتكىزۋ قابىلەتى تومەندەتىلدى. وسىعان بايلانىستى جولاۋشىلار پويىزدارىنىڭ جول ءجۇرۋ جيىلىگىندە قوزعالىس كەستەسى وزگەردى. 2022 جىلدىڭ 17 قاراشاسىنان قازىرگى كۇنگە دەيىن 1 ساعاتتان استام ۋاقىتتان كەشىگىپ كەلگەن پويىزداردىڭ سانى تىركەلدى. دەي تۇرعانمەن، پويىزداردىڭ بارلىعى ۇزاق ۋاقىتقا كەشىگىپ كەلىپ جاتقان جوق»، دەلىنگەن جاۋاپتا.
بۇل رەتتە پويىزداردىڭ قوزعالىس كەستەسىنە ساي ۋاقتىلى ءجۇرۋى ءۇشىن قىسقارتىلعان جانە توقتاتىلعان پويىزداردىڭ جولاۋشىلارىن تاسىمالداۋعا ستاندارتتى ۆاگونداردان قۇرىلعان 18 بىررەتتىك پويىزدار جولعا شىققان.
«سونداي-اق «Patentes Talgo S.L.» جشس-مەن بىرلەسىپ، قالىپتاستىرۋ پۋنكتىندە پويىزدارعا تەحنيكالىق قىزمەت كورسەتۋ ۋاقىتى قىسقارتىلدى. ۋاقىتشا قىسقارتىلعان تەحنيكالىق دايىندىق جانە بىرجولعى پويىزداردىڭ جول ءجۇرۋىن جاراقتاندىرۋ جۇمىسىمەن قامتاماسىز ەتىلۋدە. كومپانيا وكىلدەرىمەن ءموبيلدى توپتار ۇيىمداستىرىلىپ، تەمىرجول ۆوكزالدارىندا جولاۋشىلارعا ءتۇسىندىرۋ، جولاۋشىلاردى ۆاگوندارعا وتىرعىزۋ جۇمىستارى جۇرگىزىلىپ جاتىر. جول ءجۇرۋ قۇجاتتارىن جانە ولاردىڭ ايىرماسىن قايتارۋ جۇمىستارى جۇرگىزىلۋدە. بۇقارالىق اقپارات قۇرالدارى، ۆەب-سايتتار، الەۋمەتتىك جەلىلەر ارقىلى تەمىرجولداعى وزگەرىس تۋرالى جاڭالىقتار تاراتىلىپ جاتىر. كەشىكتىرىلگەن پويىزداردىڭ جوسپارلى جونەلتىلۋى ءۇشىن بارلىق قاجەتتى شارالار قابىلدانۋدا»، دەلىنگەن حابارلامادا.
جىلجىمالى قۇرام مەن تەمىرجول ينفراقۇرىلىمىنىڭ جىلدان-جىلعا توزىپ بارا جاتقانىن ۇلتتىق كومپانيا مويىنداپ وتىر. وزدەرىنىڭ مالىمدەۋىنشە، جىل سايىن ورتا ەسەپپەن 450-500 كم تەمىرجولعا كۇردەلى جوندەۋ، سونداي-اق اعىمداعى ۇستاپ تۇرۋ جۇمىستارى جۇرگىزىلەدى ەكەن.
«قوزعالىس قاۋىپسىزدىگىن قامتاماسىز ەتۋ ءۇشىن ۋچاسكەلەردە قوزعالىس جىلدامدىعىنا شەكتەۋلەر ەنگىزىلسە، بۇل پويىزداردىڭ كەشىگۋىنە اكەلەدى. كومپانيا جول بويىندا پويىزدار كىدىرىسىنىڭ سانىن ازايتۋ بويىنشا ۇيىمداستىرۋشىلىق جانە تەحنولوگيالىق شارالار قابىلداۋدا. جولاۋشىلار پويىزى ۆاگوندارىنىڭ تەحنيكالىق جاي-كۇيى نورماتيۆتىك جانە وزگە دە تەحنيكالىق تالاپتارعا ساي»، دەپ حابارلادى ۇلتتىق كومپانيا.
ماگيسترالدىق تەمىرجول جەلىسىندە 45 جول ديستانتسياسى قىزمەت كورسەتەدى ەكەن. ءار جول ديستانتسياسىنىڭ قىزمەت كورسەتۋ شەكاراسى، جولدىڭ كۇندەلىكتى تەكسەرىلۋىن، اعىمداعى جۇمىستاردىڭ ورىندالۋىن قامتاماسىز ەتۋ ەسەبىمەن بەلگىلەنگەن. وعان قوسا، باس جولداردى كەستە بويىنشا ايىنا ەكى رەت جىلجىمالى دياگنوستيكالىق كەشەندەرمەن جولدىڭ گەومەتريالىق ولشەمدەرى مەن رەلس اقاۋلارىن تەكسەرىپ وتىرادى.
كومپانيا دەرەگى بويىنشا، 2022 جىلى جولاۋشىلار پويىزدارىنىڭ كەشىكتىرىلىپ كەلگەنى ءۇشىن 3 پايىز مولشەرىندەگى وتەماقى 1 700-دەن استام جولاۋشىعا تولەنگەن.
باتىس قازاقستان وبلىستىق ءماسليحاتىنا كىمدەر سايلاندى؟
سايلاۋ • كەشە
تۇركىستان وبلىستىق ءماسليحاتىنا سايلانعان دەپۋتتار كىم؟
سايلاۋ • كەشە
بىرقاتار وڭىردە اۋا رايىنا بايلانىستى ەسكەرتۋ جاسالدى
اۋا رايى • كەشە
ۇقساس جاڭالىقتار
