ابىرويلى اعزام اقساقال

ەرىكتى تۇردە وسىنداي ساۋاپتى ءىس اتقارعان اقساقالدىڭ سويى – ميننياگزام اۆلياروۆ. ميننياگزام اقساقالدى ەل ءىشى «سارىوزەننىڭ سۋپەرمەنى» دەسە، اۋىلداستارى «اعزام اعا» دەيدى ەكەن. باشقۇرتستاندا دۇنيەگە كەلگەن. بىراق تىڭ يگەرۋ جىلدارى قازاقستانعا قونىس اۋدارىپتى. سودان وسىندا ءسىڭىپ كەتسە كەرەك. كوپ جىل اۋىلدا مەحانيزاتور بولعان. بەس بالاسىنىڭ ءبارى – ۇيا مەن قيادا. اۋىلداستارىنىڭ ايتۋىنشا، اعزام اقساقال قىس تۇسە «شىنجىر تابانىن» تاقىمىنان بوساتپايتىن كورىنەدى. اۋىل ىشىندەگى قارمەن كۇرەسكە بى­لەك سىبانا كىرىسەدى ەكەن. كوكتەمدە ارىقتاردى، سۋ ارناسىن تازالايدى. بوگەتتەردىڭ بۇزىلىپ كەتپەۋىن قاداعالايدى. جازدا بەل جازباي ءشوپ شابادى. ال قىستا قار كۇرەيدى.

– قازاقستانعا 1958 جىلى 19 جاسىمدا تىڭ جەرلەردى يگەرۋگە كەلدىم. 1961 جىلى وسىندا جىبەردى. ول كەزدە مىنا جەرلەر قۋ دالا بولاتىن. كەڭشار قۇرىلىسىنا قاتىستىم. سودان بەرى مەن وسىندا تۇرامىن. تىكەنەكتى – بۇل مەنىڭ وتانىم. مەن اۋىلداستارىما شىن جۇرەكتەن كومەكتەسەمىن. اللا تاعالا ماعان كۇش بەرگەندىكتەن، مەن ادامدارعا كومەكتەسۋىم كەرەك دەپ سانايمىن. سونىمەن قاتار قازىر ءبىزدىڭ اۋىلدا كوبىنە قارتتار عانا قالدى. اۋىلىمىزدى قار باسىپ قالعاندا ولارعا ءجۇرىپ-تۇرۋ قيىن، – دەيدى اقساقال.

ءبۇتىن اۋىل توبەسىنە كوتەرىپ قۇرمەت كورسەتەدى. ءبىر جىل ەمەس، اتتاي قىرىق جىل بويى اۋىلداستارىنا جاقسىلىق جاساۋدان جالىقپاعان اقساقالعا اۋىل جۇرتى ءدان ريزا.

– اعزام اقساقالدى ءبارىمىز قۇر­مەت­تەيمىز. ول كىسى جەرگىلىكتى حالىققا قىرىق جىل بويى كومەكتەسىپ كەلەدى. ونىڭ شاعىن شارۋا قوجالىعى بار. قىستا قار تازالايدى، جازدا جەرگىلىكتى تۇرعىندارعا ءشوپ جيناۋعا كومەكتەسەدى. بيىل قونىس اۋدارۋ باعدارلاماسى بويىنشا پاۆلودار وبلىسىنان وسىندا كوشىپ كەلەتىن وتباسىنا كومەك كورسەتۋگە دايىن. كەلەتىن وتباسى – كوپبالالى. ولارعا شارۋا قوجالىقتارىنىڭ باسقا باسشىلارى دا كومەك كورسەتەدى. ال اقساقالعا زور دەنساۋلىق تىلەيمىز. ءدال وسىنداي ادامدار ءبىزدىڭ جاستارىمىزعا ۇلگى، – دەيدى سارىوزەن اۋىلدىق وكرۋگى اكىمى ەرلان وسپانوۆ.

قاراعاندى وبلىسى