تۇرىكمەنستان ەلشىسى «ەگەمەن قازاقستانعا» كەلدى

مارتەبەلى مەيمانمەن بولعان كەزدەسۋدە «قازاق گازەتتەرى» جشس باس ديرەكتورى ديحان قامزابەك ۇلى «ەگەمەن قازاقستان» گازەتىنىڭ تاريحىن جانە جاقىندا عانا «قازاق گازەتتەرى» مەن «ەگەمەن قازاقستان» جشس-ءنىڭ بىرىگۋ جۇمىستارى ءساتتى اياقتالعانىن حاباردار ەتتى. ەندى «قازاق گازەتتەرى» جشس شاڭىراعىنا «ەگەمەن قازاقستان»، «كازاحستانسكايا پراۆدا»، «انا ءتىلى»، «اقيقات»، «مىسل»، «تەڭگە مونيتور»، «ۇيعىر اۆازي»، «ۇركەر»، «اقجەلكەن»، «بالدىرعان»، «ۇلان»، «درۋجنىە رەبياتا» باسىلىمدارى بىرىكتىرىلىپ، دامۋدىڭ جاڭا كەزەڭىنە اياق باسقانىن ايتتى.

ءوز كەزەگىندە ب.رەدجەپوۆ باۋىرلاس قازاقستان مەن تۇرىكمەنستان مەملەكەتتەرى قاي كەزدە دە ءبىر-ءبىرىن قولدايتىنىن جانە ەكىجاقتى ىنتىماقتاستىق ءاردايىم دامىپ كەلە جاتقانىن جەتكىزدى. سونداي-اق ەلشى «ەگەمەن قازاقستان» گازەتىن تۇرىكمەنستاننىڭ باستى گازەتتەرىنىڭ بىرىمەن مەموراندۋمعا قول قويۋىنا اتسالىسۋعا نيەت ءبىلدىردى.

جىلى جۇزدەسۋدە تۇركى ادەبيەتىنىڭ  كلاسسيگى ماحتىمقۇليدىڭ 300 جىلدىعى دا ءسوز بولدى. سول ايادا تاراپتار بالالار مەن جاسوسپىرىمدەر باسىلىمدارىندا تۇركىمەننىڭ ۇلى اقىنى تۋرالى شىعارماشىلىق بايقاۋ وتكىزۋگە مۇددەلى ەكەنىن جەتكىزدى.