الىبەك قۋانتىروۆ ماجارستاندا قازاقستاندىق ستۋدەنتتەرمەن كەزدەستى

مينيستر ستۋدەنتتەردىڭ سۇراقتارىنا جاۋاپ بەردى جانە وتاندىق، ۆەنگريالىق كومپانيالاردا وندىرىستىك پراكتيكادان ءوتۋ مۇمكىندىكتەرى تالقىلاندى. سونداي-اق حالىقارالىق عىلىمي-ءبىلىم بەرۋ ىنتىماقتاستىعى تۋرالى ءسوز قوزعالدى. ۇەم باسشىسىنىڭ ايتۋىنشا، مۇنداي تاعىلىمدامالار تاجىريبە جيناۋعا جانە ماماندىق تاڭداۋ كەزىندە دۇرىس شەشىم قابىلداۋعا كومەكتەسەدى.ء مينيستردىڭ سوزىنشە، ەلىمىز جاستارعا ەرەكشە كوڭىل ءبولىپ كەلەدى. بۇگىنگى تاڭدا جاس كادرلار ەلدىڭ الەۋمەتتىك-ەكونوميكالىق، ساياسي جانە مادەني-رۋحاني ومىرىنە بەلسەندى قاتىسۋى كەرەك. اڭگىمە سوڭىندا ءا.قۋانتىروۆ ستۋدەنتتەرگە وقۋدا تابىس تىلەدى.

سونىمەن قاتار مينيستر «Globalia Kft» كومپانياسىنىڭ باس اتقارۋشى ديرەكتورى گابور شاگيمەن كەزدەسۋ وتكىزدى.

تاراپتار جاسىل ەنەرگەتيكانى دامىتۋ بويىنشا جوبالاردى ىسكە اسىرۋ ماسەلەلەرىن تالقىلادى. اتاپ ايتقاندا، شەتەلدىك كومپانيا شىمكەنت، تۇركىستان جانە تاراز قالالارىندا كۇن جانە جەل ەلەكتر ستانتسيالارىنىڭ قۇرىلىسىن جۇزەگە اسىرىپ جاتىر. بۇدان بولەك، كاسىپورىن اتىراۋ وبلىسىندا جاڭارتىلاتىن ەنەرگيا كوزدەرى سالاسىنداعى جوبانى ىسكە اسىرۋدى پىسىقتاۋدا.

مينيستر قازاقستان ءوز الدىنا جاسىل ەنەرگەتيكاعا كوشۋ بويىنشا ءورشىل ماقساتتار قويىپ وتىرعانىن اتاپ ءوتتى. ەسكە سالايىق، قر 2016 جىلى پاريج كەلىسىمىن الەمدە العاشقىلاردىڭ ءبىرى بولىپ راتيفيكاتسيالادى.

وسى قۇجاتتى ىسكە اسىرۋ شەڭبەرىندە 2030 جىلعا قاراي قازاقستان پارنيكتىك گازدار شىعارىندىلارىن 15% - عا قىسقارتۋعا نيەتتى. وسى ۋاقىت ىشىندە جاڭارتىلعان ەنەرگيا كوزدەرىنىڭ ۇلەسىن قازىرگى 4% - دان 15% - عا دەيىن جەتكىزۋ جوسپارلانىپ جاتىر. وسىعان بايلانىستى ۆەنگريالىق كومپانيالاردىڭ جاسىل تەحنولوگيالاردى دامىتۋ بويىنشا ۇسىنىستارى قولداۋ تابادى.

سونداي-اق ۇەم باسشىسى قر ۇكىمەتى قولايلى ينۆەستيتسيالىق احۋال قالىپتاستىرۋعا جانە شەتەلدىك ينۆەستيتسيالاردى بەلسەندى تارتۋعا ەرەكشە نازار اۋداراتىنىن ايتتى.