پرەزيدەنت تەمىرجول ينفراقۇرىلىمىن دامىتۋدى تاپسىردى

مەملەكەت باسشىسىنا ۇلتتىق كومپانيانىڭ بىلتىر اتقارعان جۇمىستارىنىڭ نەگىزگى ناتيجەسى، تەمىرجول سالاسىن دامىتۋدىڭ الداعى كەزەڭگە ارنالعان جوسپارى، سونداي-اق بەرىلگەن تاپسىرمالاردىڭ ورىندالۋ بارىسى جونىندە مالىمەت بەرىلدى.

نۇرلان ساۋرانباەۆتىڭ ايتۋىنشا، «قازاقستان تەمىر جولى» ۇق» اكتسيونەرلىك قوعامىنىڭ جۇك تاسۋ اينالىمى 252 ميلليارد توننا-شاقىرىمعا دەيىن ارتتى. بۇل – ەلىمىزدىڭ تاۋەلسىزدىك جىلدارىنداعى ەڭ جوعارى كورسەتكىشى. جپە-مەن (جيىرما پۇتتىق ەكۆيۆالەنتپەن) ەسەپتەگەندە، جالپى كونتەينەرمەن تاسىمالداۋ كولەمى 1،129 مىڭعا دەيىن ءوستى.

سونىمەن قاتار قاسىم-جومارت توقاەۆقا ينفراقۇرىلىمدىق جوبالاردىڭ ىسكە اسىرىلۋى جونىندە باياندالدى. ءۇش جىلدا بارلىعى 1285 شاقىرىم جول سالۋ جوسپارلانىپ وتىر.

بۇل جۇك تاسىمالىنىڭ كولەمىن ۇلعايتىپ، ەلىمىزدىڭ ەكسپورتتىق الەۋەتىن ارتتىرۋعا مۇمكىندىك بەرەدى. تەمىرجول قۇرىلىسىندا پايدالانىلاتىن وتاندىق ونىمدەر مەن قىزمەتتەردىڭ ۇلەسى – 85 پايىز.

بۇدان بولەك، «قازاقستان تەمىر جولى» باسشىسى پرەزيدەنتكە حالىقارالىق كولىك دالىزدەرىن دامىتۋ جانە اقتاۋ، قۇرىق تەڭىز پورتتارىنىڭ وتكىزۋ قابىلەتىن كەڭەيتۋ جۇمىستارىنىڭ بارىسى، سونداي-اق حالىقارالىق ءىرى كولىك-لوگيستيكالىق كومپانيالارمەن ىنتىماقتاستىق ماسەلەلەرى جونىندە ايتتى.

كەزدەسۋ سوڭىندا مەملەكەت باسشىسى تەمىرجول ينفراقۇرىلىمىن دامىتۋعا جانە جاڭعىرتۋعا قاتىستى بىرقاتار ناقتى تاپسىرما بەردى.