بۇگىن تاڭعى ساعات ءتورت شاماسىندا جامبىل وبلىسىنىڭ جولشىلارى اۆتوموبيل قوزعالتقىشى بۇزىلىپ «سارىشاعان-مىڭارال» ۋچاسكەسىندە قالىپ قويعان وزبەكستاننىڭ بەس ازاماتىنا كومەك كورسەتتى. شەتەل ازاماتتارى 1403 بايلانىس ورتالىعىنا حابارلاسىپ كومەككە جۇگىنگەن. وقيعا ورنىنا دەرەۋ جەتكەن جولشى ماماندار وزبەكستان ازاماتتارىن پريوزەرسك قالاسىنا ەۆاكۋاتسيالادى.
سونداي-اق كەشە كەشكى ساعات 20:00 شاماسىندا شىعىس قازاقستان وبلىسىنىڭ جولشىلارى ارنايى تەحنيكانىڭ كومەگىمەن «الماتى-وسكەمەن» تاسجولىنىڭ 989 شاقىرىمىندا بۇزىلىپ قالعان «Volvo» ماركالى جۇك كولىگىن قالباتاۋ اۋىلىنا دەيىن سۇيرەپ اپارعان.
بۇگىن تاڭعى ساعات 10 شاماسىندا اقمولا ءوڭىرىنىڭ جولشىلارى «استانا-ەرەيمەنتاۋ-شىدەرتى» اۆتوجولىنىڭ 77 شاقىرىمىندا وتىنى تاۋسىلىپ, تۇرىپ قالعان فۋرانىڭ جۇرگىزۋشىسىنە كومەك كورسەتتى.
«25 قاڭتارداعى احۋالعا سايكەس رەسپۋبليكالىق ماڭىزداعى جول ۋچاسكەلەرىندە قوزعالىسقا ەنگىزىلگەن شەكتەۋلەر جوق. تاسجولدار اشىق. ماماندار قىسقى كۇتىپ-ۇستاۋ اياسىنداعى جۇمىستاردى جالعاستىرىپ جاتىر», دەلىنگەن قازاۆتوجول حابارلاماسىندا.
