گەوساياسي احۋالدىڭ جۇك تاسىمالىنا اسەرى

حالىقارالىق ATI.SU جۇك تاسىمالداۋ بيرجاسىنىڭ مالىمەتى بو­يىنشا، قازاقستاننان وزگە ەلدەرگە جۇك جەتكىزۋگە سۇرانىس قاتتى ءوسىم كورسەتتى. بيرجادا ورنالاستىرىلعان ءوتىنىم سانى ەكى ەسەدەن ارتىق كوبەيگەن (+122 پايىز). بۇل رەتتە تاسىمال قۇنى ورتا ەسەپپەن 41 پايىزعا قىمباتتاعان. جىل باسىندا بەلسەندىلىك ءبىرشاما تومەن بولدى. بىراق كوكتەمنەن باستاپ جىل سوڭىنا دەيىن ديناميكا جەدەل جۇرگەن.

بىلتىرعى ءوسىمنىڭ باستى درايۆەرى – قازاقستاننان رەسەيگە جاسالعان جۇك تاسىمالى (+109 پايىز). جاڭا باعىت­تاردىڭ ناتيجەسىندە رەسەيلىك تاسى­مال­داۋشىلار ەۋروپالىق جۇكتەر­دىڭ، سونداي-اق ەلگە تەڭىز ارقىلى جەتكىزىلگەن جۇكتەردىڭ شىعىنىن وتەۋگە تىرىستى. سونىمەن قاتار بەلا­رۋس، پولشا، گەرمانيا، وزبەكستان ەلدەرىنە جۇك تاسىمالىن جەتكىزۋ سۇرانىسى دا جوعارى دەڭگەيدە.

ادەتتەگى باعىتتار بويىنشا جۇ­مىس ىستەۋدى جالعاستىرعىسى كەلگەن ونداعان رەسەيلىك جانە بەلارۋستىك اۆتو­پاركتەر ەرتە كوكتەمدە قازاق­ستاندا تىركەلىپ العان. بۇل ىشكى نارىقتاعى باسەكەنى كۇشەيتكەن. بيرجا باسشىلىعىنىڭ ايتۋىنشا، قازاقستاننىڭ ەۋرازياداعى جاڭا لوگيستيكالىق تىزبەكتەردى قۇرۋداعى ءرولىنىڭ كۇشەيۋى حالىقارالىق تاسى­مالداۋعا وتىنىمدەر سانىنىڭ ايتارلىقتاي وسۋىنە اكەلدى، بۇل سۇرانىس پەن ۇسىنىستىڭ تەڭگەرىم­دىلىگىن ساقتاۋعا مۇمكىندىك بەردى.

– ءبىر جاعىنان ەۋروپا مەن وزگە ەلدەردەن يمپورتتىڭ كۇيرەۋى رەسەيلىك كومپانيالاردى باسقا باعىتتار، ونىڭ ىشىندە قازاقستان بويىنشا جاڭا جەتكىزىپ بەرۋشىلەر ىزدەۋگە ءماجبۇر ەتتى. ەكىنشى جاعىنان، كومپانيالار رەسەيدەن كەتىپ جاتىر جانە ولار ءوز بيزنەستەرىن باسقا ەلدەردە، سونىڭ ىشىندە قازاقستانعا دا كوشىرۋدە. بۇل ەلدەگى ەكونوميكانىڭ جاڭارۋىنا، سوعان سايكەس تاسىمالدىڭ وسۋىنە دە ىقپالىن تيگىزەدى، – دەيدى حالىقارالىق ATI.SU جۇك تاسىمالداۋ بيرجاسى قازاقستاندىق وكىلدىگىنىڭ باسشىسى رەناتا زوبوۆا.

يمپورتتىق تاسىمالداۋ بويىن­شا سۇرانىس اسا جوعارى ەمەس. وتكەن جىل قورىتىندىسى بويىنشا ءوتىنىم سانى – 10 پايىزعا، قۇنى 7 پايىزعا عانا جوعارىلاعان. بىرقاتار ەۋروپا­لىق ەلدەردەن – بەلارۋس، پولشا، گەرمانيا، يتاليادان جانە تۇركيا مەن گرۋزيادان دا جەتكىزۋ كولەمى ارتقان. بىراق رەسەي باعىتىنا قاراي تاسىمال كولەمى كەرىسىنشە، 3 پايىزعا قىسقارعان.

– لوگيستيكالىق نارىقتاعى ايتار­لىقتاي ءوسىم نەگىزىنەن ەلدەگى سايا­سي تۇراقتىلىقپەن جانە باتىس ەل­دەرىنىڭ رەسەيگە سالىپ جاتقان سانكتسيالارىمەن بايلانىستى. 2022 جىلى لوگيستيكالىق تىزبەكتە اۋقىمدى قايتا قۇرۋ بولدى – جۇك جىبەرۋشىلەر جاڭا سەرىكتەستەر مەن جاڭا وتكىزۋ نارىعىن ىزدەسە، جۇك تاسىمالداۋشىلار جاڭا باعىتتارعا وتە باستادى. بۇل جاعدايدا كوپ كومپانيالار ءبىراز جىلعى سەرىكتەستەرىن جوعالتىپ، بيرجادا تىڭ تاپسىرىس ىزدەۋگە ءماجبۇر، – دەيدى ر.زوبوۆا.