كوروناۆيرۋس • 24 قاڭتار، 2023

تۇماۋ باسەڭدەدى

26 رەت كورسەتىلدى

اقتوبە وبلىسىندا قاڭتاردا كوروناۆيرۋس ينفەكتسياسىنا شالدىققان 24 ناۋقاس تىركەلسە، كەيىنگى اپتادا بىردە-ءبىر كوروناۆيرۋس بەلگىسى بار ادام تابىلماعان. 17 قاڭتاردا انىقتالعان ەڭ سوڭعى ناۋقاس – تۇماۋ بەلگىلەرىمەن جۇقپالى اۋرۋلار اۋرۋحاناسىنا تۇسكەن جۇكتى كەلىنشەك. اۋرۋحانادا ودان كوروناۆيرۋسقا قارسى پتر-تەست الىنعاندا، وڭ ناتيجە كورسەتكەن.

دەگەنمەن ەلىمىزدىڭ ەپيدەميا­لىق احۋال بويىنشا «جاسىل» اي­ماق­تا تۇرعانىنا قاراماستان، ار­قا­نى كەڭگە سالۋعا بولمايدى. ويت­كەنى كوروناۆيرۋستىڭ ءالسىز شتام­دارىنىڭ تۇماۋ جانە ۆيرۋستى ينفەكتسياعا قوسىلىپ كەتۋ جاع­دايىن دا جوققا شىعارمايدى دارى­گەر­لەر. ونىڭ ۇستىنە كەيىنگى ايدا الەمدە كوروناۆيرۋستىڭ جاڭا شتامدارى تىركەلىپ جاتىر. سوندىقتان كوروناۆيرۋسقا قارسى ۆاكتسينا الۋ جالعاسا بەرەدى. الداعى ناۋرىز ايىنىڭ سوڭىنا دەيىن اقتوبە وبلىسىنا Pfizer ەكپەسى اكەلىنەدى دەپ جوس­پارلانىپ وتىر. بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگتە باياندالدى.

جەلتوقساننان باستاپ وڭىردە ادامنىڭ جوعارعى تىنىس جولدارىن زاقىمدايتىن ءجىتى رەسپيراتورلى ۆيرۋستى ينفەكتسيا جانە تۇماۋ ءورشىپ كەتتى. وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى بەكبولات ءىزباساروۆتىڭ حابارلاۋىنشا، بيىل تۇماۋمەن بالالار كوپ اۋىردى. جانە ءبىر ەرەكشەلىگى – تۇماۋ ادامنىڭ اعزاسىنان ۇزاق ۋاقىت كەتپەيتىنى بايقالدى.

«بيىل قاڭتار ايىندا اقتوبە وبلىسىندا تۇماۋعا شالدىققان 626 مەكتەپ وقۋشىسى، 938 جۇكتى ايەل تىركەلدى. كەيىنگى ەكى ايدا تۇرعىندار اراسىندا تۇماۋدىڭ ا جانە ر ءتۇرى قاتار تارادى. دارىگەرگە جۇگىنگەن ناۋقاستاردان پوليمەرالدى تىزبەك رەاكتسياسىمەن 2 675 ۇلگى زەرتتەلگەندە، ونىڭ 238-ىنەن تۇماۋ بەلگىلەرى انىقتالدى. تىركەلگەن ناۋقاستاردىڭ 85 پايىزى تۇماۋدىڭ رينوۆيرۋستى ينفەكتسياسىنا، 15 پايىزى ادەنوۆيرۋستى تۇرىنە شالدىققانى انىقتالدى. دەنە قىزۋى جوعارىلاپ، قاتتى جوتەل مەن تىنىس الۋى قيىنداعان 126 جۇكتى ايەل، ءبىر جاسقا دەيىن­گى 104 ءسابي جۇقپالى اۋرۋلار اۋرۋحاناسىنا جاتقىزىلدى. كەيىن­گى اپتادا تۇماۋ مەن ءجىتى رەسپيراتورلى ۆيرۋستى ينفەكتسياعا شالدىعۋشىلار سانىنىڭ باسەڭدە­گەنى بايقالادى. قازىرگى ۋاقىتتا 65 تۇرعىن ستاتسيونارلىق جاعدايدا ەم قابىلداپ جاتىر. ونىڭ 61-ءى اقتوبە قالاسىندا، تورتەۋى اۋداندىق اۋرۋحانالاردا ەمدەلۋدە. وبلىستىق كلينيكالىق جۇقپالى اۋرۋلار اۋرۋ­حاناسىندا تۇماۋى اسقىنعان ءبىر جاسقا دەيىنگى 25 بالا، 3 جاس­قا دەيىنگى 19 بالا، 10 جۇكتى ايەل ەم قابىلداپ جاتىر»، دەيدى ب.ءىز­باساروۆ.

وبلىستىق سانيتاريالىق-ەپيدە­ميولوگيالىق باقىلاۋ دەپارتا­مەنتىنىڭ دەرەگىنە قاراعاندا، اقتوبە وبلىسىندا كەيىنگى سەگىز اي ىشىندە ءجىتى رەسپيراتورلى ۆيرۋستى ينفەكتسيا جانە تۇماۋمەن 43 835 ادام اۋىرىپ، دارىگەرلەر كومەگىنە جۇ­گىنگەن. سونىڭ ىشىندە 14 جاسقا دەيىن­گى بالالاردىڭ اراسىندا 24 869، ءبىر جاسقا دەيىنگى بالالار اراسىندا 1 254 جاعداي تىركەلدى. قاراشا، جەل­توقسان، قاڭتار ايىندا 208 مەكتەپ وقۋشىسى جرۆي جانە تۇماۋمەن اۋىرىپ شىققان. قىستىڭ سوڭعى ايى دا تاياۋ قالعا­نىنا قاراماستان، سانيتارلىق-ەپيدەمولوگيالىق قىز­مەت ماماندارى تۇرعىنداردىڭ ساقتىق شارالاردان باس تارتپاۋىن سۇرايدى. جۇقپالى اۋرۋعا شالدىقپاۋ ءۇشىن قوعامدىق ورىنداردا ماسكا تاعىپ، بەلسەندى دەنە جاتتىعۋلارىن جاساپ، اشىق اۋادا سەرۋەندەۋ كەرەك، ءۇي-جايلاردى ۇنەمى جەلدەتىپ تۇرۋ قاجەت دەپ كەڭەس بەرەدى. قىس كەزىندە ادام اعزاسىندا دارۋمەندەر جەتىسپەۋشىلىگى بايقالاتىندىقتان، دۇرىس تاماقتانۋعا ءمان بەرۋ كەرەك.

بۇل رەتتە قازان ايىنان باس­تاپ اقتوبە وبلىسىندا الدىن الا تۇماۋعا قارسى 170 مىڭنان اسا تۇرعىن ەكپە العانىن ايتا كەت­كەن ءجون. قازىرگى ۋاقىتتا تۇرعىندار ارا­سىندا تۇماۋ مەن ءجىتى رەسپيراتور­­لى ۆيرۋستى ينفەك­تسياعا شال­دىق­قاندار سانى ايتارلىقتاي تومەندەدى.

 

اقتوبە وبلىسى 

سوڭعى جاڭالىقتار

الماتىدا ەكى اۆتوبۋس سوقتىعىستى

ايماقتار • بۇگىن، 11:33

ءوندىرىس كولەمى كەمىگەن

قازاقستان • بۇگىن، 08:58

ۇقساس جاڭالىقتار