ونىڭ العاشقى تاريحي سۋرەتى – اباي. شىعارماشىلىق كوزقاراسپەن قاراساق, اركىمنىڭ ءوز ابايى بار دەيمىز: وقىرماننىڭ دا, اقىننىڭ دا, سۋرەتشىنىڭ دە. جاس اۆتوردىڭ ابايعا قالاي كەلگەنى, عاسىر جىلناماسىمەن بىرگە تالاي قالاممەن سالىنعان اقىن وبرازىن قالاي الىپ شىققانى ويلاندىرادى.
«قىتايدا ءبىر كىسىمەن ابايدىڭ «كوزىمنىڭ قاراسىن» تىڭداپ وتىرعانبىز. سوسىن ول انىنە ەلىتىپ, ءسوزىن اۋدارتىپ, كوڭىلى اۋدى. كەيىن اقىننىڭ كىتاپتارى قىتايشا شىققان كەزدە دە الىپ وقىپ ءجۇردى. ابايعا تابىندى. بىردە ماعان حاكىمنىڭ پورترەتىن سالىپ بەر دەپ ءوتىنىش ايتتى. سوندا ابايدىڭ ۇلدارىمەن تۇسكەن سۋرەتىنە قاراپ جازدىم. قازىر ءۇيىنىڭ تورىندە ءىلىنىپ تۇر. بۇدان كەيىن اقىنعا قايتىپ ورالمادىم. تاريحي تاقىرىپتا باتىرلاردى سالىپ كەتتىم. بىراق ابايعا باسقا ءبىر فورمادا ورالۋ ويدا بار», دەيدى سۋرەتشى.
ءيا, الەمدە ايگىلى مۋزەيلەرگە بارا قالساڭىز, لۋۆر, ەرميتاج, بريتان مۇراجايى بولسىن, ءار كارتينادان سول ۇلتتىڭ ءبىر ناقىشى بىلىنەدى. دەندەپ قاراساق, تاريحىنا دا كۋا بولامىز. تولقىن تابىسبەك تاڭعاجايىپ وسى مۋزەيلەردە مىقتى شەبەرلەردىڭ ءبارى ءوز تاريحىن تۇگەندەپ تاستاعان دەيدى.
«بارشا الەم مىقتى سۋرەتشىلەردىڭ شىعارمالارىنا ەسسىز تاڭعالادى. ياعني ءار تالانتتى شەبەردىڭ قالامى, ەڭ الدىمەن ءوز تاريحىنان سۋسىندايدى. سۋرەتشى بولعان سوڭ, ۇلت الدىنداعى پارىز رەتىندە تاريحي تاقىرىپتاردى جازا باستادىم. تاريحتى بوياۋمەن سالعاندا دا بارلىعىن قامتي المايسىڭ. بىرەۋ شايقاستاردى بەينەلەسە, ەندى بىرەۋ تەك التىن وردانى زەرتتەيدى», دەدى ول.
سۋرەتشى بۇگىندە الاش سەرياسىن جازىپ جاتىر. الەۋمەتتىك جەلىلەردە كەڭ تاراعان ءاليحاننىڭ زاماناۋي بەينەسى – تولقىن تابىسبەكتىڭ قالامىنان شىققان. ايتا كەتەيىك, اتالعان كارتينا مادەنيەت پورتالى ۇيىمداستىرعان ء«سوز بەن سۋرەت» بايقاۋىندا باس جۇلدەنى يەلەندى. اۆتور شىعارماشىلىعىنداعى الاش سەرياسىنىڭ كەلەسى كەيىپكەرى – احمەت. سۋرەتشىنىڭ ايتۋىنشا, اقاڭنىڭ بەينەسى اياقتالۋعا جاقىن. بۇگىندە جۇمىستىڭ جەتپىس پايىزعا جۋىعى ورىندالعان. اۆتور مۇندا احمەتتى العاشقى كوسەم قىلىپ وتىرعىزعان. ال ارتى گالاكتيكا – ءار پلانەتا ءبىر قازاق سىندى سۋرەتتەلگەن.
«بۇل الاشتىقتار ەشقانداي تاپسىرىسسىز, ءوز ەركىممەن جازىلعان تۋىندىلار. جالپى, بىزدە الاشتىقتاردى سالعان كەزدە تەك سۇرەڭسىز حالدەرى بەينەلەندى. ماعان ء«اليحاندى نەگە زاماناۋي نۇسقادا سالاسىڭ؟» دەۋشىلەر دە بولدى. شىن مانىندە, ءساندى كيىنۋدىڭ, شاش قويۋدىڭ تاماشا ۇلگىسىن وسى الاشوردالىقتار كورسەتكەن. كەي ورىستار ينتەلليگەنتسيالىق وبرازدى ءاليحانداردان ۇيرەنگەن. جاعام قيسايماسىن دەپ ارتىنا بۇرىلمايتىن ادامدار عوي. قاشانعا دەيىن ءبىز ۇرپاققا ولاردىڭ تۇرمەدەگى قاجىعان, وشكەن, قور بولعان بەينەسىن كورسەتەمىز؟! كەرىسىنشە, ءبىز الاشتىقتاردىڭ جىعىلمايتىن, سىنبايتىن رۋحىن بەرۋىمىز كەرەك. قالعان شىندىقتى تاريح ايتادى», دەيدى سۋرەتشى.
شىعارماشىلىق عادەتىنە ساي اۆتور سۋرەتىن ءبىر سالعان سوڭ ءبىراز ۋاقىت سۋىتىپ بارىپ, قايتا قارايدى. وسى الاش سەرياسىن تۇگەل جازىپ, كەيىن ءبارىنىڭ باسىن پانورامالى كارتينادا ءبىر جەرگە بىرىكتىرەتىن جوسپارى دا بار. سونداي-اق ونىڭ تاريحي تاقىرىپتىڭ تاعى ءبىر كەيىپكەرى – تۇمار پاتشايىم. ونىڭ بويىنداعى ىرىلىك, ۇلت الدىنداعى ادالدىعى كىمدى دە بولسىن قايران قالدىرادى. سۋرەتشى وسى تۇماردىڭ تاعدىرىنا دەگەن ءوزىنىڭ كىشكەنتاي ۇلەسى رەتىندە سۋرەتىن سالعان.
تولقىن تابىسبەك كوركەم سۋرەتتەن بولەك قالا بەزەندىرۋ جۇمىستارىمەن دە اينالىسادى. اۆتوردىڭ ءوزى بۇل باعىتتاعى جۇمىستار, ەڭ الدىمەن كاسىپتەن الشاقتاماۋ ءارى كۇنكورىس ءۇشىن جاسالاتىنىن ايتادى.
«قاي قالاعا بولسىن ءوزىڭنىڭ قولتاڭباڭدى قالدىرۋ دا ءبىر جاقسى اسەر سىيلايدى. بۇل باعىتتا دا ءار ءوڭىردىڭ مەنتاليتەتىنە ساي جۇمىس ىستەۋىڭ كەرەك. ياعني ەۋروپالىق تەحنولوگيانى قولدانا وتىرىپ, ۇلتتىق دۇنيە تۋدىراسىڭ. قالا بەزەندىرۋ نەگىزىنەن وسىنداي تالاپتارعا قۇرىلادى. جالپى, ۇلتتىق ناقىش دەگەندە كوبىسى تەك ويۋ-ورنەك, كيىز بەن شاڭىراقتى ەلەستەتەدى. بۇل ەلەمەنتتەردى زاماناۋي باعىتتا ءتۇرلى ۇلگىدە قولدانۋعا بولادى», دەيدى ول.
سۋرەتشىنىڭ قالامى جاڭا قۇرىلعان ۇلىتاۋ وبلىسىنىڭ قابىرعالارىندا دا قالدى. اۆتور جوشى حاننىڭ كۇمبەزىنىڭ ىشىنە پانورامدى ءتورت كارتينا جازعان. « ۇلى ۇلىس» دەپ اتالاتىن ءبىرىنشى تۋىندىدا ەل مەن جەردىڭ يەسى قازاق ەكەنى, باتىرلاردىڭ كەزەكتى جەڭىسىنەن كەيىنگى كورىنىسى بەينەلەنگەن. وسى كارتينانىڭ جالعاسى التىن وردانىڭ ءبىرىنشى حانى بەركەنىڭ شەتەل ەلشىلەرىن قابىلداۋىنا ۇلاسادى. ءۇشىنشى كارتينا ء«تاڭىردىڭ سىيىندا» ءبىر جاق قابىرعاسى جوشى حان ۇلىسىنا ارنالسا, ءبىر جاعىندا ۇلىتاۋ وبلىسىنىڭ تاريحى بەينەلەندى.
بۇدان بولەك بىلتىر بالالار جىلىنا وراي مادەنيەت جانە سپورت مينيسترلىگىنىڭ قولداۋىمەن جاسالعان «مەنىڭ اتىم قوجا» كومپوزيتسياسىنىڭ دا اۆتورى. سۋرەتشىنىڭ ايتۋىنشا, بايقاۋعا كوپتەگەن ەسكيز ۇسىنعان. ماسەلەن, سۇلتان ەكەۋىنىڭ بالىققا كەتىپ بارا جاتقان, قوجانىڭ قازى-ۇيرەكتىڭ اراسىمەن شۋلاتىپ جۇگىرگەن, راگاتكا اتىپ تۇرعان, باسقا دا جيىرما شاقتى كورىنىس بولدى. سونىڭ ىشىندە قوجانىڭ ءوزىن-ءوزى سوتتاپ, تاربيەلەپ تۇرعان ءساتى كوميسسيادان ءوتىپتى.
سۋرەت ونەرىندە مىڭنان وزىپ, جۇزدەن جۇيرىك اتانۋ دا مەحناتتى ءىس. سايىپ كەلگەندە, ءبارى تالانت پەن ەڭبەكتىڭ, شەبەرلىكتىڭ ۇشتاسۋىنا بايلانىستى. ال سۋرەتشى تولقىن تابىسبەك بۇل ونەرگە تابىس تابۋ ءۇشىن ەمەس, اتاقتى بولامىن دەپ كەلۋ كەرەك دەيدى. بۇل دا ابسۋرد. ادام ونەرىن ومىرىنە قاجەت ەتە الماسا, تۇنعان تالانت نە ءۇشىن كەرەك؟!
«تابىس تابامىن دەگەن سۋرەتشى ارباتتان, كافە بۇرىشتارىنان ءبىر-اق شىعادى. ول تەك قاراپ وتىرىپ سالادى. ياعني ۇقساتادى. ۇقساتۋدان قالام دا جالىعادى, ونەر ولەدى. ال سۋرەتشى ءوز بەتىمەن ىزدەنىپ, وزگەرىس جاساي الۋى كەرەك. سوندا عانا بويداعى تالانتتىڭ تىنىسى اشىلادى, قاناتى كەڭەيەدى», دەيدى اۆتور.
ءسوز-اق. رۋحاني قۇندىلىقتار قۇلدىراعان بۇگىنگى قوعامنان ءوتىپ, شىعارماشىل جانداردىڭ ەركىن جازىپ-سىزۋىنا مۇمكىندىك تۋاتىن ۋاقىت تا كەلەر دەپ سەنەمىز.
